Read South Giziga LUK 18 Bible Online

LUK 18 - South Giziga bible

LUK 18

¹Yesu a wa taŋ ɓi miweˀ ti wi ɓa a biga taŋ di na, anja sey a diram dibiɗ ndrehhe, a giram ta wãˀ.

²A ɓa taŋ: «Ar walahay mekelem ada na, migi kiita ada zleˀe. N'anta cika hirnga da Buymisemuŋ ta, ɓi ngi mizli a caŋ ta.

³Angi walahay nah vuna, ngwas wudiga ada, a so ndrehhe a luuma mbur migi kiita tuwa, a ɓaŋ: «Sla ndra kiita ani ar wala ndra ati mesene ɗu.»

⁴Migi kiita nah tuwa a ngum ta, a ngum ta, hã a zik le. A dirba nah, a ɓi ti kwacay naŋ: «Ko ti ya mazluwun ti Buymisemuŋ ta, yo ɓi ngi mizli miciy ta na tekeɗe kwana,

⁵ngwas hana ara giriy, yi sa slaŋ kiita naŋ na, ɓa a so ndrehhe ngi giriy mata.›»

⁶Buy Yesu a ɓi ma: «Cinaka mbur migi kiita mijjeŋ ta hana maɓi.

⁷Na, mizli Buymisemuŋ muwuna taŋ, matuwam ng'ava papas ti duvuɗ na, a ɗiya taŋ ɓi taŋ takwa? A jina taŋ kutum takwa?

⁸Yi ɓukum na: A sa sla taŋ ɓi taŋ kutum jaka. Na, da Mangal ngi mbur misa so le na, a sa lum tiɓi a ruwuy aka aruŋ kwa?»

⁹Yesu a wa ɓi ani weˀ ti wi, vur mizli mekelemey mawaka kaɓa taŋ jeŋŋe, amma mapuraka mizli numuŋhoy gar hiris le na:

¹⁰«Mizli cuw a ram nga dira dibiɗ ar hay ngi Bumbulvuŋ. Pal numuŋ i mbur Farisa , mipal mekeleme, i micikila buutu.

¹¹Mbur Farisa a cici, a dir dibiɗ a mevele, a ɓi: ‹Aw Buymisemuŋ ɗu, yi guw sise, asi y'anta kaɓa mizli mekelemey ta, taŋ i muhuloy, i malambaˀhay, i migi madamahay, yo y'anta ka mbur micikila buutu hana ta ma.

¹²Angi hin tarnaˀ gar na, yi gi dalyama hin cuw. Mukuruˀngi gwat ɗu, ya muluma le gar na, i ra vuluw di.›

¹³Amma mbur micikila buutu, naŋ a cici zar neˀ, ko a wuɗ zuɓa hiri nga muŋ ta, a buca haŋ a didak, dar a ɓi: ‹Aw Buymisemuŋ ɗu, yi mbur migi mungra, puriy ˀircece.›

¹⁴Yi ɓukum na: Mbur nah mimi ngi hay naŋ na, naŋ jeŋŋe, amma mbur Farisa, kanah ta. Mbur gar maɗuva hirnga da vu naŋ na, a sa mam di nga ruwuy. Mbur gar mama vu naŋ nga ruwuy na, a sa gilakaŋ nga mbuŋ.»

¹⁵Mizli a soko hã ti ziri ngi dubahay ng'avu Yesu, ɓa a buca haŋ avu taŋ, amma mizli ngi seˀehey mupuraka taŋ kanah na, a bucaka taŋ.

¹⁶Amma Yesu a zilo ziri tuwa ng'avaŋ, a ɓi: «Pulaka ziri a soko ng'avi ya. Ki tikaka taŋ ta, asi Zumabuy ngi Buymisemuŋ , i ngi mizli misi ka taŋ na.

¹⁷Gisiŋ, yi ɓukum na: Mbur matiɓa Zumabuy ngi Buymisemuŋ kaɓa zuŋ meciɗek ta na, anta sa ci anga ta wãˀ.»

¹⁸Mbur madiɗa ngi Yudehey ada, a cufuɗa Yesu: «Kumani mezle, sey yi gi mi ɓa yi lum siifa ngi sete ka?»

¹⁹Yesu a ɓaŋ: «Ki ziliy mbur mezle vur mike? Mbur mezle anta, sey i Buymisemuŋ pal naŋ.

²⁰Ki si na ɓimuɗuvahaya le: «Ki gi madama ta, ki kiɗ hirnga ta, ki hul ta, ki gi sedewo ti slir ta, ɗuva hirnga da bunuk ati munuko.›»

²¹Mbur madiɗa tuwa a ɓaŋ: «Ɓi tayna, yi ja taŋ le gar a hirnga, zle ti gawla ɗu si.»

²²Yesu micina kanah na, a ɓaŋ: «A ndiruw le gwat purla: hiɗika gwat ɗikeye gar avra, yo wuɗka dala nah da misi murgahay, ɓa kisa lum zlili ngi muŋ. A dirba nah, so sipiy.»

²³Amma mbur tuwa micina na, a nduruɓ hiri haɗa, asi i mbur misi zlili haɗi.

²⁴Yesu a puraŋ cum cum na, a ɓi: «Kay, naŋ tuwaˀ ɓa misi zlilihey a cam ng'ar Zumabuy ngi Buymisemuŋ!

²⁵Gisiŋ, zlogomo a ci kutum tir vigiɗ ngi batala, fineˀ mbur misi zlili maci ng'ar Zumabuy ngi Buymisemuŋ.»

²⁶Mizli micinama a ɓam: «Da kine na, masa lih gu, i waka?»

²⁷Yesu a mbiɗa taŋ di: «Gwat mizli magaka gu ta na, Buymisemuŋ a ga gu.»

²⁸Dar Piyer a ɓaŋ: «Ani ndra, i puloko gwat ndraˀahaya le gar, i ra supukuw.»

²⁹Yesu a ɓa taŋ: «Gisiŋ, yi ɓukum na: Da mbur a pulo hay naŋ le, malla ngwas naŋ, sukum naŋhay, miyi naŋhay, malla ziri naŋhaya le asi Zumabuy ngi Buymisemuŋ na,

³⁰a sa lum gwatay haɗi, fineˀ gidaŋ angi hin misi wurenna. Yo angi hin masa sawa na, a sa lum siifa ngi sete.»

³¹Yesu a zila mizli ngi seˀe mukuruˀ nga cuwoyo ng'avaŋ, a ɓa taŋ: «Puraka, ani i ra ram nga Zeruzalem. Ɓi mijiviɗey mutohoko gar vur Mangal ngi mbur tuwa, a sa gi gisiŋ muduba.

³²Asi a sa vulakaŋ asi haŋ ngi mizli duniyahay, a sa singiram angaŋ, a sa zakaŋ, a sa tufakaŋ tazlay,

³³a sa sliɗakaŋ, waɗ a sa kiɗaka vagay. Amma angi hin mimakir naŋ na, a sa slikiɗ a muŋ.»

³⁴Amma mizli ngi seˀehey a slaka wala ngi ɓi hana ko neˀ ta. Mingiɓi nah a ndir i ɓi muɗumo avu taŋ. Yesu a wuɗ a ɓi kahana na, a si na ka ta

³⁵Ti Yesu mindil gweˀ nga Zeriko na, mbur dangar ada, a cifi le aciki jiviɗi, ara suk gwat avu mizli.

³⁶Naŋ micina zigiduw macuh na, a cufuɗ vu: «I mi migi ka?»

³⁷Mizli a ɓakaŋ: «I Yesu mbur Nazaret macuhu.»

³⁸Dar a tilaŋ mi: «Yesu, Mangal ngi Daviti, puriy ˀircece takwa!»

³⁹Mizli maram a mbuŋ, a bucakaŋ ɓa a taˀa mi, amma naŋ, a til mi ti gidaŋ ava ma jak: «Mangal ngi Daviti, puriy ˀircece takwa!»

⁴⁰Yesu a cici, a ɓi ɓa a sakaŋ di. Ti naŋ mupuyaha na, Yesu a cufuɗaŋ:

⁴¹«Ki wuɗ ɓa yi guw mike?» A mbiɗaŋ di: «Yi wuɗ ɓa yi pur takwa Buy!»

⁴²Yesu a ɓaŋ: «Pur, tiɓi ɗik a lihuw le.»

⁴³Ar nah si na, ara pur, a sipa Yesu ti ga sise da Buymisemuŋ. Mizli mupur naŋhay gar na, a zlaka a hunumaka Buymisemuŋ ya.