Read South Giziga LUK 19 Bible Online

LUK 19 - South Giziga bible

LUK 19

¹Yesu mindil a Zeriko na, ara ngira walahaya.

²Mbur ada, a zilaka Zake, i madiɗa ngi micikila buutuhoy , i mbur misi zlili.

³A wuɗ ɓa a pura Yesu, da i waka na. Na, Zake i mbur midegweleˀ haɗi, a puraŋ gu ta, asi zigiduw mihaɗi na.

⁴A kil nga mbuŋ, a jiɗ ar widis ɓa a sa pura Yesu masa cuh ti kẽh na.

⁵Yesu mindil ar li nah tuwa na, a zuɓa hiri, a ɓaŋ: «Zake, po sar kutum, anja yi hin dana a hay ɗiki.»

⁶Zake tuwa a po sar kutum, a tiɓa Yesu ngi hay naŋ ti mumul haɗi.

⁷Mizli gar mupuraka kanah na, a dirɗakaŋ, a ɓam: «A ra hin a hay mbur migi mungra ma sukwa?»

⁸Amma Zake a slikiɗ, a ɓa Buy Yesu: «Cin ɗi Buy, yi sa vula zlili ɗu cah da misi murgahay. Da yi tiɓi gwat le avu mbur zleˀe ti wer na, yi sa wurkaŋ di is mufaɗa.»

⁹Dar Yesu a ɓi: «Lih a so le dana ar hay hana. Asi naŋ kwana, i dideˀ ngi Abraham aya.

¹⁰Asi mike na, Mangal ngi mbur a so ngi sipa mizli mizizahay, ɓa a laha taŋ.»

¹¹Mizli muroko cinam mingiɓi hana na, a wulkam kaɓa Zumabuy ngi Buymisemuŋ a wuɗ a njiko vu gweˀ si, asi tapasa, Yesu, naŋ gweˀ avu Zeruzaleme. Vurˀe, Yesu a wa taŋ ɓi ani.

¹²A ɓi na: «Mbur miyakaŋ ar sukwi ngi buyo, aru nga hirwuy mikileŋ, ɓa ara cakaŋ buy madiɗa a diga, a dirba nah, ɓa a sa mawa a muŋ.

¹³A zilo gawla kuruˀ a wuzla gawla naŋhaya, dar a wuɗka taŋ suloy ngi ɓiri tapasl tapasl pal pal gar, a ɓa taŋ: «Mbuɗam di haŋ, hã tapas ya misa mo le.»

¹⁴Amma mizli ngi hirwuy naŋhay a hirsakaŋ le, a slinam mizli aseˀe ɓa ara ɓam: «Ndr'anta i wuɗam ɓa a zum buy angi ndra ta.»

¹⁵A dirba taŋ mucakaŋ ar buyo, a mo nga hirwuy naŋ a muŋ, a zilo gawla naŋhay, naŋ muwuɗka taŋ dala tuwa ɓa a si na yam naŋ, taŋ mulumam anga.

¹⁶Joˀ gawla mudumbuŋ a sawa, a ɓaŋ: ‹Buy, suloy ka muvuliy di tuwa, yi lum yam naŋ le anga kuruˀu.›

¹⁷Buy a ɓaŋ: ‹Naŋ kuy, gawla mezle. Ki gi slra mikaslsla le ti gwat mineˀkini, zum buy ar walahay kuruˀu.›

¹⁸Mucuw naŋ a sawa ya, a ɓaŋ: «Buy, suloy ka muvuliy di na, a siko le anga zlum.»

¹⁹Buy a ɓa mbur nah kanah ma: ‹Ka, zum buy ar walahay zlum.›

²⁰Gawla mekelem a sawa, a ɓaŋ: ‹Buy, suloy ɗike n'ani. Yi mbuza mbizeˀ, ɗum ti kecekece.

²¹Yi zluwun le ti ka, asi ki mbur mihimaˀ. Gwat ka mika ta, ki zuɓa. Ki gi sifi ngi gwat manja ki zligi.›

²²Buy a ɓaŋ: ‹Gawla malambaˀ vu! Yi guw kiita ti mingiɓi ɗik tehhe a muŋ. Ki si na le yi mbur mihimaˀ, gwat ya mika ta, yi zuɓa, yi gi sifi ngi gwat ya mizliga ta ma na,

²³anja ki pa dala ɗu angi baŋke ta vur mike? Ya mimawa ani na, anja yi hila ti yam naŋ anga takwa?›

²⁴Joˀ buy a ɓa mizli misi akẽh na: ‹Tuɓaka suloy nga naŋ, vulaka da mbur misi suloy kuruˀ tuwa.›

²⁵A ɓakaŋ: ‹Buy, nga naŋ ada kuruˀ si!›

²⁶Buy a mbiɗa taŋ di: ‹Yi ɓukum na: Mbur misi gwat, a sa vulakaŋ ava ma. Yo mbur manja gwata, mineˀ ngi si haŋ naŋ na, a sa tiɓaka ava.

²⁷Amma mesene ɗuwoy mawuɗam ɓa yi cifi buy ar taŋ ta na, soko taŋ nga mbuŋ ɗu aka, slaka ˀay taŋ.›»

²⁸A dirba mingiɓi hana na, Yesu a ki ɓaˀ a mbuŋ ɓa aru nga Zeruzalem.

²⁹Ti naŋ mindil ng'ar walahay Betfaze ati Betani, kini ng'avu muwã mazilaka muwã Tutumbur na, a slin mizli ngi seˀehey cuw,

³⁰a ɓa taŋ: «A ram ng'ar walahay ngi mbuŋ kum na. Kum masa cam na, kisa lumam zinga ngi zungu mujuwa le kaˀ, mbur a jiɗ ɗaˀ ara taruŋ. Puskoko di, soko di.

³¹Da mbur a cufuɗukum le: ‹Ki puskaka ngi gi mike› na, kisa mbiɗakaŋ di: ‹I Buy mawuɗo.›»

³²Dar misliney a ram, ara lumaka gwata ka Yesu miɓa taŋ di tuwa.

³³Ti taŋ mapuskaka zungu tuwa na, buy ngi zunguhoy a ɓaka taŋ: «Ki puskaka zungu nah ngi gi mike?»

³⁴A mbiɗaka taŋ di: «I Buy mawuɗo.»

³⁵A ram ti zungu tuwa da Yesu, dar a ciyaka zana taŋhay a duba naŋ, a zuɓaka Yesu anga.

³⁶Naŋ mira ru gar na, mizli ara ciyaka zana taŋhay a jiviɗe.

³⁷Taŋ gweˀ avu li pi sar tir muwã Tutumburo si. Mizli ngi seˀehey gar a jam kaw kaw, a zluzluɓam ti mumul haɗi, a zlaka a hunumaka Buymisemuŋ ti ˀay paɗ a muŋ vur cekenehey, taŋ mupuraka taŋ gar,

³⁸a ɓam: «Anja Buymisemuŋ a ɗuwula mi da buy madiɗa maso ti slimiɗ naŋ na! Anja muŋ andir ti zuy, yo anja dadala muŋ a lum dudoko!»

³⁹Farisa mekelemey ngi wuzla zigiduwo, a ɓaka Yesu: «Kumani, ɓa mizli ɗikey na ɓa a taˀaka mi.»

⁴⁰Amma a mbiɗa taŋ di: «Yi ɓukum na: Da taŋ a taˀaka mi le na, i ɗuguroy masa wudam.»

⁴¹Yo ti Yesu mindil gweˀ avu Zeruzaleme, naŋ mupura keɗ na, a tuwaŋ.

⁴²A ɓi: «Zeruzalem, ko ki si na jiviɗ ngi luuma zuyo ar hin hanayna ta! Amma kay, i muɗumo le a mihiri ɗike.

⁴³Asi hin ɗik a sa ndilawa, tapasa, mesene ɗikey a sa gunukuw gun ti gwat ngi vurumoy, a sa nguslukuw ti ka ti ka gar.

⁴⁴Ka ati ziri ɗikeye, a sa zuzukum wãˀ, anta sa pulukuw ɗugur mijirngasl a hirnga cala ta, asi ko ki ki slimiɗ ngi si na hin ngi Buymisemuŋ misawa ɓa a jinuw na mata.»

⁴⁵Joˀ Yesu a ci ng'ar hay ngi Bumbulvuŋ a Zeruzaleme, a zla a ɓula migi terereheye ng'avra.

⁴⁶A ɓa taŋ: «A tohoko na: ‹Hay ɗu, a sa gi i hay ngi dira dibiɗi.› Na kumo, ki tiram di butum ngi mufuyovuhoy mbrike? [13]!»

⁴⁷Vur hin gar na, Yesu ara dubuna gwat da mizli ar hay ngi Bumbulvuŋ. Masay madiɗahay ati buy ngi ɓimujuwahay waɗ mizli madiɗa ngi Yudehey ara puram jiviɗ ɓa a kiɗakaŋ vagay.

⁴⁸Amma a sinam wer ngi zizi naŋ ta, asi mizli gar ara jikam slimiɗ ngi cine mingiɓi naŋ.