Read South Giziga LUK 24 Bible Online

LUK 24 - South Giziga bible

LUK 24

¹Dimas cẽht ngi miprik prik na, ngwasay a ram nga mi zivi ti mal ati urdihey, taŋ miɗiyaka taŋ tuwaŋ.

²A ra lumaka ɗugur i migidigila le kileŋ avu mi ngi zivi.

³Taŋ micam na, a lumaka vagay ngi Buy Yesu ta.

⁴A ga taŋ welele teˀ. Keɗ na, mizli cuw a bigaka taŋ vu, zana minjazlazl njazlazl ɓaˀ ɓaˀ avu vu.

⁵Ngwasay tuwa a zluwunam haɗa, midibiɗ jik jik a ruwuy. Mizli tuwa a ɓaka taŋ: «Mbur misi ti siifa ma na, ki ram ti sipakaŋ a wuzla mizli mumucahay mbri maka?

⁶N'anta aka ta, a slikiɗ le. Wulkaka ɓi naŋ muɓukum di zleˀe ti naŋ misi a Galile na.

⁷A ɓi zleˀe na: ‹Anja sey a vulaka Mangal ngi mbur asi haŋ ngi mizli migi mungrahay, anja a dirakaŋ avu dum, yo ɓa angi hin mimakir naŋ na, a sa slikiɗi.›»

⁸Dar a wulkaka mingiɓi ngi Yesu so.

⁹A mam ti mi zivi, ara slufaka ɓi nah gar da mizli ngi si Yesu mukuruˀ ngaŋ kaˀhaya waɗ da mizli mekelemey gar.

¹⁰Ngwasay vuna, i ti Mariya ngi Magdala, Zan ati Mariya, mumuŋ ngi Zak. Cil taŋ mekelemey ara slufaka ɓi nah da misliney aya.

¹¹Misliney a tiɓaka ɓi ngi ngwasay na ta, taŋ a waka kaɓa a ɓam di i ɓi ngi gilaway.

¹²Amma Piyer a slikiɗ, a kil ngra mi zivi, a guɓ guɓ nga huroˀo. Keɗ keɗ na, gwat anta, sey gabagahay sek tewle. Dar a mi a muŋ, gwat migi hana, a zumaŋ hirnga le.

¹³Dambala tapasa vuna si na, mizli cuw a wuzla mizli ngi si Yesuhoy a ra ram ng'ar walahay mekelem ada, mazilaka Emawus. A gi kilometir kuruˀ ngaŋ kaˀa avu Zeruzaleme.

¹⁴A ra kiɗaka slir ngi gwat migi hana gar ar wala taŋ.

¹⁵Yo ti taŋ mira ɓam, taŋ mira kiɗaka slir naŋ na, Yesu vuna a sa luuma taŋ, a ram bumoˀ.

¹⁶Tˀada puraka ngbaŋ, amma gwat a tika taŋ le, ɓa a sinakaŋ ta.

¹⁷Yesu a ɓa taŋ: «Kum maram bal na, ti kiɗa slir ngi mike?» Dar a cicam dedeŋ, ara ndurɓom hiri.

¹⁸Mbur pal a wuzla taŋ mazilaka Kleyopas a mbiɗaŋ di: «Mbur mulak a Zeruzalem micina gwatay migam ar hin hanayna ta na, i ka pal ɗiki.»

¹⁹A ɓa taŋ: «I gwat mihey migam ska?» A mbiɗakaŋ di: «Gwat migi avu Yesu mbur Nazarete! Naŋ i mijiviɗ migidaŋ ngi gi slra ati ngi ɓi ɓi a mbuŋ Buymisemuŋ waɗ a mbuŋ mizli gar.

²⁰Masay madiɗa ndrahay ati mizli mucawwa ndrahay a vulakaŋ ɓa a gakaŋ kiita ngi mucu, yo a dirakaŋ avu dum mizliraŋ. Amma wãˀ naŋ vuna ma na, zle ti gwat tayna migam na, hana i hin mimakir naŋ si.

²¹Ndr'i waka zleˀe na, kaɓa i mbur masa laha Israyeley.

²²Ngwas mekelemey a wuzla ndra, a slufam ndra ɓi muzuma ndra hirnga le ma, asi nga dana, cẽht ngi miprik prik na, a ram nga mizivi,

²³ko a lumaka vagay ngi Yesu ta. A moko, a ɓam ndra na, a puram modro ngi Buymisemuŋhoy le, a ɓaka taŋ, Yesu, naŋ da ti siifa.

²⁴Cil ndra mekelemey kwana, a ram le nga mizivi aya, yo gwat taŋ mulumaka gar na, taŋ kasl kasl ka ngi ngwasay miɓaka ɓi naŋ tuwa, amma a puraka Yesu vuna ta.»

²⁵Dar Yesu tuwa a ɓa taŋ: «Kayya, kum mizli manja lesley, ɓi mijiviɗey miɓaka gar na, mevel kumo tiɓa zayãˀ zayãˀ haɗi.

²⁶A ɓam na: Anja sey Mesi a si bonoy seˀ le, ɓa a sa ci angi dudok naŋ takwa?»

²⁷Dar a biga taŋ wala ngi Ɓimutoho miɓi vur naŋ gar. A zlo di avu ɗerewol ngi Moyis, hã bal bal ti ɗerewol ngi mijiviɗeye gar.

²⁸Ti taŋ mindilam gweˀ avu walahay, taŋ maram nga ra tuwa na, Yesu a gi kaɓa a cuh kileŋ nga mbuŋ ava.

²⁹Amma a tikakaŋ, a ɓakaŋ: «Cifi ati ndra, asi pas anta mata, yo hiikuɗ ara ji si.» Joˀ a ci ngi haya, a cifam bumoˀ.

³⁰Ti naŋ micifi ɓa a zumam ati taŋ na, a zuɓa ɗaf, a ɗuwul mi anga, a ngila, dar a vula taŋ di.

³¹Ar nah so na, hiri taŋ a wun, a sinakaŋ le muduba. Joˀ a susuyum a mihiri taŋ susuyum.

³²Dar a ɓam ar wala taŋ: «Ti naŋ maɓa ndra, yo naŋ mabiga ndra wala ngi Ɓimutoho a jiviɗ na, ɓi nah a ga ndra vekeɗ vekeɗ a mevele ta mbrike?»

³³A slikiɗam a haŋhaŋ si, a mam nga Zeruzaleme a muŋ. A ra lumaka mukuruˀ ngaŋ kaˀhaya, a kusom le ati cil taŋhaya.

³⁴Joˀ a ɓaka taŋ: «Buy Yesu tuwa a slikiɗ le ti wuzla mumucahaya gisiŋ gisiŋ! Yo a biga vu le da Simoŋ.»

³⁵Joˀ taŋ ya kwana, a slufaka taŋ gwat migi avu taŋ a jiviɗ waɗ taŋ misinaka Yesu hirak ti naŋ mangila ɗaf na.

³⁶Ti taŋ maɓam kanah na, Yesu a bo deŋ a wuzla taŋ, a ɓa taŋ: «Ndiram zuy zuy!»

³⁷Didak a muɗa taŋ le, yo a zluwunam haɗi teˀe, asi a waka kaɓa a puram di i musuɗuk ngi mbur mumuca.

³⁸Amma Yesu a ɓa taŋ: «Lesl kumo welele vur mike, yo ki wulkam cuw cuw vur mike?

³⁹Puraka haŋ ati sar ɗuwoyo: i ya gisiŋ! Tutumikiy, puraka! Musuɗuk ngi mbur mumuca, naŋ anta ti meficek ati tesl ka ya misi ti naŋ na ta.»

⁴⁰Naŋ miɓa mingiɓi hana na, a biga taŋ haŋ ati saraya.

⁴¹Taŋ mamumulom haɗi tuwa na, a tiɓakaŋ gu taruŋ. Yo ɓi nah mazuma taŋ hirnga na, Yesu a ɓa taŋ: «Gwat ngi zum ada avu kum aka kwa?»

⁴²A vulakaŋ kilif mufuko ɓuluˀu.

⁴³A tiɓa, a zuma a mihiri taŋ.

⁴⁴Dar a ɓa taŋ: «Puraka, ti ya misi zleˀe ati kumo, yi ɓukum na: ‹Anja ɓi mutohoko ar ya gar ar ɓimuɗuva ngi Moyis ati ngi mijiviɗey waɗ ar ɗerewol Dimis na, sey a gi muduba.›»

⁴⁵Joˀ a wuna taŋ lesl ɓa a slaka wala ngi Ɓimutoho muduba so.

⁴⁶Waɗ a ɓa taŋ: «Naŋ kaɓa mutohoko miɓi: ‹Anja sey Mesi a si bonoy seˀ le, yo a sa slikiɗ ti wuzla mumucahay ar hin mimakir naŋ na.

⁴⁷Waɗ ma na, ɓi ngi mbiɗi mevel ati ɓi ngi puya mungra na, anja sey a tilam di mi avu sukwi ngi mizli gar, a ɗuvaka virzi naŋ a Zeruzalem.

⁴⁸Kumo, migi sedewo ngi gwat tayna gar.

⁴⁹Yo i sa slinukum ti gwat Baha miɓa ɗaˀ le da zleˀe tuwa. Amma kumo so na, cifam angi walahaya, hã tapas gidaŋ ngi muŋ misa po sar le ar kum.»

⁵⁰Dar Yesu aru ti taŋ, kini ngir ti Betani. A zuɓa haŋ, a ɗuwula taŋ mi a diga.

⁵¹Yo ti naŋ maɗuwula taŋ mi tuwa na, a guh avu taŋ, a cuh nga muŋ.

⁵²Taŋ kwana, a dirba taŋ midilkam a mbuŋ naŋ na, a mam nga Zeruzalem a muŋ, bal ti mumul haɗi.

⁵³Yo t'ada ndrehhe ar hay ngi Bumbulvuŋ, ara hunumaka Buymisemuŋ.