Read South Giziga LUK 4 Bible Online

LUK 4 - South Giziga bible

LUK 4

¹Yesu a nih le ti ˀUf Mipal , a mo ti mizaw Zurdeŋ, dar ˀUf Mipal a ngi di hirnga nga wuzlaɓuh.

²Satan ara tikinaŋ a diga hin kukur mufaɗa. Angi hin tayna gar na, anta zum gwat ta. A dirba nah so na, may ara jaŋ.

³Joˀ Satan a ɓaŋ: «Da ki Mangal ngi Buymisemuŋ na, ɓa ɗugur misenna ɓa a tiri ɗaf sini.»

⁴Yesu a mbiɗaŋ di: «A tohoko na: ‹Mbur a ndir ti siifa, sey ti ɗaf pal naŋ ta.›»

⁵Satan a jiɗ di nga muwã, a bigaŋ Zumabuy ngisi ruwuyoy gar wiliɗ,

⁶a ɓaŋ: «Gidaŋ ati dudok ngi Zumabuy hana gar, yi sa vuluw di. Asi a vulikiy di le da ya, yo i vula ko da waka gar, ya muwuɗ le.

⁷Ka so na, da ki huruk huruk le a mbuŋ ɗu na, a sa ndir da ka keɗeɗe gar.»

⁸Yesu a mbiɗaŋ di: «A tohoko na: ‹Dilik a mbuŋ Bumbulvuŋ, Buymisemuŋ ɗik, yo putukul a mbuŋ naŋ pal naŋ tewle.›»

⁹Dar Satan aru di nga Zeruzalem, a cicaŋ a mitimɗek ngi hay ngi Bumbulvuŋ, a ɓaŋ: «Da ki Mangal ngi Buymisemuŋ na, hil sar baɗ aka nga ruwuy.

¹⁰Asi a tohoko na: ‹Buymisemuŋ a sa ɓa modro naŋhaya ɗaˀ vur ka sina, ɓa a jiginukuw.›

¹¹Yo ma na, ‹a sa puˀukuw paˀ paˀ a haŋ taŋhay, vur ka masa dunuko sar avu ɗugur.›»

¹²Yesu a mbiɗaŋ di: «Ɓi mutoho a ɓi na: ‹Ki tikina Bumbulvuŋ, Buymisemuŋ ɗike ta.›»

¹³A dirba Satan mikiɗa mi ngi tikina Yesu ti wer pal pal gar na, a kirih kileŋ ava, hã tapas mekelem Buymisemuŋ misla.

¹⁴Dar Yesu a mi nga Galile, naŋ gboŋgboŋ ti ˀUf Mipal Slimiɗ naŋ ara zil nga mbuŋ nga mbuŋ angi li vay nah gar.

¹⁵A dubuna gwat da mizli ar hay ngi dira dibiɗ taŋhay, yo mizli gar ara ngilam di wuy.

¹⁶Yesu a so a Nazaret, walahay, naŋ migil angaŋ. Ngi hin ngi sabat na, a ci ar hay ngi dira dibiɗ, ka naŋ maga hõyyõ. A slikiɗ ɓa a sluf ɗerewol.

¹⁷A vulakaŋ ɗerewol ngi mijiviɗ Ezayi. Naŋ mupuska na, a lum di i ɓi ani mutohoko anga:

¹⁸«ˀUf ngi Bumbulvuŋ naŋ da angi ya. Asi a winiy le ngi tila mi ti Ɓimezle da misi murgahay. A slino ya ɓa ngi tila mi ti ɓi ngi laha dangayay, ngi tila mi ti ɓi ngi wuna hiri ngi dangaray, ɓa ngi pula mizli masam bonoyo, ɓa a lumam hirnga taŋ,

¹⁹ɓa ngi tila mi ti ɓi ngi vi, Bumbulvuŋ masa tiɓa mizli ngi hay naŋ.»

²⁰Yesu a fuɗa ɗerewol tuwa a muŋ, a vula da gawla ngir hay ngi dira dibiɗe, dar a cifi joˀ. Mizli ngir hay ngi dira dibiɗe gar a roko hiri puyõˀ ng'ar naŋ.

²¹Dar a ɓa taŋ: «Ɓi mutohoko hana, a gi le dana vur kum micin naŋhay wurenna na.»

²²Mizli gar a hĩyãka ɓi naŋ le, ɓi mezle mabo ti balam naŋ na, a zuma taŋ hirnga le, a ɓam: «Hana i mangal ngi Zozef tuwa takwa?»

²³Dar a ɓa taŋ: «Mizli ndrahay maɓam: ‹Doftor, mbulo hirnga ɗike ti haŋ ɗike› na, ko mbri, kisa ɓikiy di zleˀe si. Yo ma na, kisa ɓikiy: ‹Gwatay, ka miga taŋ a Kapernahum gar na, i cinaka ɓi taŋ le. Inga ga taŋ aka, angi walahay muyukuw anga na y'ayɗi.›»

²⁴Joˀ a ɓi ma: «Gisiŋ, yi ɓukum na: mijiviɗe, ko anta tiɓakaŋ angi hirwuy miyakaŋ anga ta.

²⁵Yi ɓukum njah wãˀ: Ti hin ngi Eli na, ngwas wudigahay ada haɗi angi hirwuy Israyele ngbaŋ. Vuŋ migi ta vi makir ti kiya merkeɗ na, may a gi le haɗi angi hirwuy gar.

²⁶Amma Buymisemuŋ a slina Eli ng'avi ngwas wudiga ko pal asi taŋ ta, sey ng'avi ngwas wudiga misi ar walahay Sarepta, hirwuy Sidoŋ.

²⁷Angi hin ngi Elize ma na, misi kukulahay ada haɗi angi hirwuy Israyele, ko mbur pal a wuzla taŋ miɗiyi anta, sey Naˀaman, mbur Siri.»

²⁸Mizli ngir hay ngi dira dibiɗe gar micinaka mingiɓi hana na, a slikiɗam himaˀ.

²⁹A slikiɗam, a bam di nga duba gala, a ram di sesẽŋ a hirnga muwã, taŋ mupaka walahay taŋ anga, ɓa a pakaŋ haŋ nga ruwuy.

³⁰Amma naŋ, a bi kwaŋ tir wala taŋ, a cuh gwaɗ naŋ.

³¹Akẽh na, Yesu aru nga Kapernahum, walahay ngi hirwuy Galile. Ngi hin ngi sabat na, a dubuna gwat da mizli.

³²Gwat naŋ madubuna taŋ di na, a zuma taŋ hirnga le, asi a ɓa taŋ ti gidaŋ ngi miwi mizli.

³³Ar hay ngi dira dibiɗe, mbur ada na, setene a hirnga. A widi ti gidaŋ:

³⁴«Yooho! Ki wuɗ mi avu ndra ka, Yesu mbur Nazarete? Ki so ɓa ngi ziza ndra kwa? Yi sunuw le, ki mbur mipal ngi Buymisemuŋ!»

³⁵Yesu a mbura himaˀ da setene tuwa, a ɓaŋ: «Taˀa mi, bi ti vu mbur hana.» Setene a hizigiɗa mbur tuwa pararah a wuzla taŋ, a bi, ko a gaŋ gwat neˀ ta.

³⁶Taŋ gar, a zluwunam le haɗa, a ɓam ar wala taŋ: «I ɓi wana hana ma ka? A ɓa seteneheye ɗaˀ ti gidaŋ sina, a bam!»

³⁷Joˀ slimiɗ naŋ a zil nga mbuŋ nga mbuŋ angi li vay nah gar.

³⁸Yesu mibi tir hay ngi dira dibiɗe na, aru ngi hay Simoŋ. Mular ngi Simoŋ, naŋ gu ta, vu culok ava. Joˀ a tumbuloko Yesu ɓa a gi gwat vurˀeŋ.

³⁹Yesu a guɓ ng'ar naŋ guɓ, a mbura himaˀ da jiji tuwa. Jiji a pulaŋ. A haŋhaŋ si na, ngwas a slikiɗ, a ga taŋ gwat ngi zum.

⁴⁰Pas midiɗ na, mizli a soko ti misi jijihey ti sukwi wal wal ti hay taŋhaya gar ng'avu Yesu. Joˀ naŋ, a buca haŋ ar taŋ pal pal gar, a mbulo taŋ.

⁴¹Setenehey a bam ti vu misi jijihey haɗi, a wudam, a ɓam: «Ki Mangal ngi Buymisemuŋ!» Dar a buca taŋ, a tika taŋ ɓa a ɓam ta, asi taŋ a sinakaŋ le, naŋ i Mesi.

⁴²Li muwun na, Yesu a bi, aru silaŋ nga ɓuh. Zigiduw haɗi a ram ti sipi naŋ. Ti taŋ mulumakaŋ na, a wuɗam tik naŋ, ɓa aru kileŋ avu taŋ ta.

⁴³Amma Yesu a ɓa taŋ: «Ɓimezle ngi Zumabuy ngi Buymisemuŋ na, sey yi til di mi angi walahay mekelemey aya, asi a slinoko ya vurˀe.»

⁴⁴Dar a til mi ti Ɓimezle ngi Buymisemuŋ ar hay ngi dira dibiɗey wal wal angi hirwuy Yude.