Read South Giziga LUK 7 Bible Online

LUK 7 - South Giziga bible

LUK 7

¹Ti Yesu mikiɗa mi ngi tila mi da mizli na, aru nga Kapernahum.

²Madiɗa ngi soje ngi romahay ada a diga. Gawla naŋ, naŋ mawuɗ haɗa, naŋ gu ta, gweˀ ngi mucu.

³Naŋ micina maɓaka ɓi ngi Yesu na, a slin mizli micawwa ngi Yudehey ng'ava ɓa a tumbulokoŋ, a so mbuloŋ gawla naŋ na.

⁴Mizli tuwa mindilam avu Yesu na, a tumbulokoŋ hirdam hirdam, a ɓakaŋ: «Mbur nah na, a ndila le ɓa ki jinaŋ.

⁵Asi ada wuɗ sukwi ndra, yo mindira ndra hay ngi dira dibiɗe i naŋ ma.»

⁶Dar Yesu a ram bumoˀ. Naŋ mindil gweˀ avu haya na, madiɗa ngi sojehey a slino ngama naŋhay ɓa a ɓakaŋ: «Ki giro vu ta Buy, asi yi ndila ter ɓa ki ci nga viŋ ɗu ta.

⁷Ya mupura vu ɗu, i ndila ɓa hã ngi ru ng'avi ka ti hirnga ɗu ta na vurˀe. Ɓi ɗaˀ purla si na, gawla ɗu a sa mbul si.

⁸Naŋ kine, miwi ɗuwoy ada, ya kwana, y'ada ti sojehey, ya muwa taŋ. Yi ɓa numuŋ le: «Aru!» na, a ru. Yi ɓa mekeleme le: «Sawa!» na, a sawa. Yi ɓa gawla ɗu le: «Ga gwat ani» na, a gaŋ.»

⁹Yesu micina mingiɓi hana na, a hĩyãŋ teˀe. A mbiɗi hiri ng'avi zigiduw masipaŋ na, a ɓa taŋ: «Yi ɓukum na: Ko a wuzla Israyeleye, mbur misi tiɓi kahana, yi lum ɗaˀ ta.»

¹⁰Mislin ngi madiɗa ngi sojehey mumam ngi hay na, a lumaka gawla tuwa kuy kuy ti vu naŋ muduba.

¹¹A dirba nah, Yesu ara ru ng'ar walahay mazilaka Nayin. Mizli ngi seˀehey waɗ zigiduw haɗi ara zuɓam jiviɗ bumoˀ.

¹²Ti naŋ mindil gweˀ avu mizlingre ngi walahaya [1] na, kasl ti nah, mizli ara soko ti vagay ngi mbur nga diki. I mangal kirmalay ngi ngwas wudiga. Mizli haɗi ngir walahay ara ram aseˀeŋ.

¹³Buy Yesu mupura ngwas tuwa na, a puraŋ ˀircece, a ɓaŋ: «Ki tuwuy mata!»

¹⁴A kirih, a wusa cacala ngi mbur vagay tuwa. Mijijir naŋhaya cicam. Joˀ a ɓi: «Gawla, i ɓuw, slikiɗi!»

¹⁵Dar mbur mumuca tuwa a slikiɗ joˀ, a zla a ɓi, Yesu a vula da mumuŋ a muŋ.

¹⁶Zluwun a ga mizli le gar, a hunumaka Buymisemuŋ, a ɓam: «Mijiviɗ madiɗa a bo le ar wala ndra. Buymisemuŋ a so le jina mizli naŋhaya.»

¹⁷Gwat Yesu miga na, ara ɓaka ɓi nah asi hirwuy Yude ati prok naŋhay gar.

¹⁸Mizli ngi si Zaŋhay a slufaka gwat migam tayna gar da kumani taŋ Zaŋ vuna. Zaŋ a zil mizli cuw a wuzla taŋ,

¹⁹a slina taŋ ng'avu Buy Yesu, ɓa a cufuɗakaŋ: «Ki mbur masa so na kwa? Malla sey i kutukom mbur mekelem kwa mbrike?»

²⁰Mizli tayna mindiloko avu Yesu na, a ɓakaŋ: «I Zaŋ mici mizli ar yam mislino ndra ng'avi ka, ɓa i cufuɗukuw: Ki mbur masa so na kwa? Malla sey i kutukom mbur mekelem kwa mbrike kini?»

²¹Kasl ti nah na, Yesu ara mbul misi jijihey ati misi blehey haɗi, ara ɓul setenehey ti vi mizli, yo ara wun hiri ngi dangaray haɗi.

²²Joˀ a mbiɗa da mislin ngi Zaŋhay tuwa: «Gwat kum mupuraka ati ɓi kum micinaka na, a ram, slufaka da Zaŋ: Dangaray ara puram, jegwerey ara ram, misi kukulahay a ɗiyam le, midigizlahay ara cinam kwaŋ kwaŋ, mumucahay ara slikiɗam, yo mizli ara tilam mi ti Ɓimezle da misi murgahaya.

²³Mbur mapula tiɓi naŋ asi ya ta na, naŋ ar mumul!»

²⁴A dirba mislin ngi Zaŋhay mucohom na, Yesu a ɓa ɓi ngi Zaŋ da zigiduwo: «Ki ram nga pura mi a wuzlaɓuh ka? Lavaɗ himiɗ mawusa na kwa?

²⁵Na, ki ram nga pura mi ska? Mbur miki zana hirnga kwa? Ani mizli miki zana ngi slimiɗey, yo muroko ar wuya na, t'ani ar mugum ngi buy madiɗahay mayse.

²⁶Na, ki ram nga pura mi ska? Mijiviɗ kwa? Haˀaw, yi ɓukum na: A funa mijiviɗe le ma jaka.

²⁷Asi mike na, Zaŋ i mbur mutohoko ɓi naŋ zleˀe miɓam: «Ani, i ra slina modro ɗu a mbuŋ ɗike, a sa ɗiyuw jiviɗ a mbuŋ ɗike.»

²⁸Yi ɓukum na: A wuzla mizli miyaka taŋ ti yi gar na, mifineˀ Zaŋ anta. Amma mbur mizlew wãˀ ar Zumabuy ngi Buymisemuŋ na, a funaŋ le.

²⁹Mizli gar, ko micikila buutuhoy micinam ɓi ava na, a sinaka le, Buymisemuŋ naŋ jeŋŋe, joˀ Zaŋ a ca taŋ ar yam.

³⁰Amma Farisahay ati buy ngi ɓimujuwahaya, gwat Buymisemuŋ muwuɗ vur taŋ na, a hizigaka avra, a ngumam ɓa Zaŋ a ca taŋ ar yama ta.

³¹Mizli migwenehey na, yi sa wa taŋ ati waka? A bam vu ati wa ska?

³²A bam vu ati ziri mujoar li ngi luuma, matilam mi da cil taŋ mekelemey, a ɓaka taŋ: «I fukum bozloro ngi ɓuruku. Na, ki ɓurgam ta ma! I zlukum dimis ngi vagay. Na, ki tuwam ta ma!»

³³Asi mike na, Zaŋ mici mizli ar yama, a so na, anta zum gwat ta, anta si mbaazla ta, joˀ ki ɓam: «Setene ada a hirnga!»

³⁴Mangal ngi mbur a sawa, ara zum gwat, ara si gwat, joˀ ki ɓam: «Puraka misi may ani, a wi ti mbaazla. Ingama ngi micikila buutuhoy ati ngi mizli migi mungrahay ma!»

³⁵Amma mizli gar matiɓaka sin nijileŋ na, a sinaka le, naŋ jeŋŋe.»

³⁶Mbur Farisa a zila Yesu nga zuma ɗaf a hay naŋ. Yesu a ci ngi hay mbur Farisa tuwa, a cifi le joˀ ngi zuma ɗafa.

³⁷Ngwas sulome ada ar walahaya, a ndilawa. A cine le zleˀe, Yesu ara zum ɗaf a hay mbur Farisa. A so ti urdi mbaf ar gojogoɗ ngi ɗugur marava.

³⁸A cifi ti dirba, a tuwuy ng'ar sar ngi Yesu, hã a bunaŋ sara ceɗ ceɗ ti tuwuyo. A sumuɗoŋ taŋ ti himac ngi hirnga, a jaŋ saraya paˀ, a pa taŋ urdi tuwa.

³⁹Mbur Farisa muzulo Yesu tuwa mupura na, a ɓi ti kwacay naŋ: «Da mbur hana i mijiviɗ na, ngwas muwusaŋ hana i migi mungra na, anja a si na gu zleˀe.»

⁴⁰Yesu a slaŋ di: «Simoŋ, y'ada ti ɓi neˀ ngi ɓuw di.» Simoŋ a ɓaŋ: «Kumani, ɓaŋ.»

⁴¹Yesu a ɓi: «Mbur ada, naŋ ti misi duvus naŋhay cuw: avu mbur mekeleme, gabal skat skat zlum, avu mbur numuŋ, gabal kukur zlum.

⁴²Taŋ cuw taŋ na, gwat anta ɓa a wurkakaŋ di ta, a pula taŋ duvus misi avu taŋ cuw taŋ gar. Masa wuɗaŋ dum le asi taŋ, i waka?»

⁴³Simoŋ a mbiɗaŋ di: «Yi wa na, i mbur naŋ mupulaŋ duvus naŋ haɗi na.» Yesu a ɓaŋ: «Ki sla ɓi nah le kaslsla.»

⁴⁴Dar Yesu a mbiɗi hiri ng'avi ngwas tuwa, a ɓa Simoŋ: «Kˀada pura ngwas hana kwa? Yi co a hay ɗike, ki buniy saraya ta, amma naŋ, a buniy saraya le ti tuwuy naŋ, yo a sumuɗiy taŋ le ti himac ngi hirnga naŋ.

⁴⁵Ki jiy kuɓuy ta, amma naŋ, zle ti naŋ muco na, a ro ti sar ɗuwoyo paˀ paˀa.

⁴⁶Ki piy mal mazĩˀĩ ndum a hirnga ɗu ta, amma naŋ, a piy urdi le da saraya.

⁴⁷Da yi ɓuw le, mungra naŋhay mihaɗi na, a puyam le avra na, asi naŋ mibiga wuɗavu naŋ mihaɗa na. Amma mbur mapuyakaŋ mungra naŋ avra neˀkini na, wuɗavu naŋ, naŋ haɗa ta ya.»

⁴⁸Joˀ a ɓa ngwasa: «Mungra ɗikey a puyam le avra.»

⁴⁹Mizli miziloko taŋ tuwa, a zlaka a ɓam ar wala taŋ: «I mbur wa hana, ɓa hã a puy mungrahay avra na ka?»

⁵⁰Dar Yesu a ɓa ngwasa: «Tiɓi ɗik a lihuw le. Aru zuy.»