Read South Giziga LUK 8 Bible Online

LUK 8 - South Giziga bible

LUK 8

¹A dirba nah, Yesu a bula walahay madiɗahay ati prokoy gar, ara til mi, yo ara ɓi Ɓimezle ngi Zumabuy ngi Buymisemuŋ. Naŋ ati mizli ngi seˀe mukuruˀ nga cuwoyo.

²Ngwasay, naŋ muɓula setenehey ti hirnga taŋhay waɗ naŋ mumbulo taŋ tir jijiheye, t'ada ma. I ti: Mariya ngi Magdala, setenehey tarnaˀ mubam ti vaˀa,

³Zan, ngwas ngi Kuza, mbur madiɗa ngi hay Herod, Suzan ati ngwas mekelemey haɗi majinaka taŋ ti zlili taŋhay.

⁴Mizli a soko tir walahayaya gar ng'avu Yesu, zigiduw mukus haɗi na, Yesu a ɓa taŋ ɓi miweˀ ti wi ani:

⁵«Mbur a bi nga zliɗa [2] hilfa gwat ar guva. Ti naŋ mazliɗa na, mengeleleŋ mekelemey a ndilam aciki jiviɗ, mizli a kirpaka taŋ asi sar, yo ɗiyuw ngi ɓuhoy a ndaka taŋ ceke.

⁶Numuŋhoy a ndilam ar li ɗugur, a pusam, yo a muˀulom, asi li anta hir ta.

⁷Mekelemey a ndilam a wuzla hadaw. Ti hadaw magil rak rak ati taŋ na, a vuso taŋ.

⁸Amma mekelemey a ndilam ar li mezle. A gilam, a gam mengeleleŋ avu taŋ skat skat.» Ar nah na, Yesu a ɓi ˀay paɗ a muŋ: «Mbur misi ti slimiɗ macin na, anja a cin!»

⁹Mizli ngi seˀehey a cufuɗaka mbiɗeˀvra ngi ɓi naŋ miɓa taŋ di weˀ ti wi na.

¹⁰Yesu a ɓi: «Ɓi muɗum vur Zumabuy ngi Buymisemuŋ na, a njukukum di le ɓa ki sinaka. Amma mizli mekelemeye, sey yi ɓa taŋ di weˀ ti wi, ɓa t'ada ngrimme ɓula, amma anta puraka ta, yo ɓa a cinam ti cin ɓula, amma anta slaka wala nah ta.

¹¹Yesu a ɓa mizli ngi seˀeheye: «Ɓi ya muɓukum weˀ ti wi na, mbiɗeˀvra naŋ ani: hilfa, i mingiɓi ngi Buymisemuŋ.

¹²Mengeleleŋ midiɗ aciki jiviɗ na, i mizli macinam ɓi, dar Satan a sawa, a muɗa mingiɓi tuwa tir mevel taŋ, vur taŋ masa tiɓam, ɓa a laham.

¹³Numuŋhoy mindilam ar li ɗugur na, i mizli macinam mingiɓi ngi Buymisemuŋ, matiɓaka ti mumul. Amma dimbasl anta avu taŋ ta. A tiɓam ngi hin neˀkini si. Amma gwat mutuwaˀ mindilo le na, a pulaka tiɓi.

¹⁴Mindilam angi hadaw na, i mizli macinam ɓi. Yo wuluk, zlili ati gwat macira taŋ hiri a vuso taŋ angi jiviɗ taŋ ngi ru nga mbuŋ nga mbuŋ, mbak a ndilaka hin ɓa a nahama mata.

¹⁵Misi angi li mezle na, i mizli macinam mingiɓi tuwa ti mevel mezle, mukuy, yo majaka a hirnga, a hurdumom, hã a sikam.

¹⁶Mbur a ja vu avu lampe ɓa a ɗupo kisa ara, malla a ca asi arngawo na, a gi ta. Amma a ɗuvaka taˀ ar li ɗuf naŋ, ɓa mizli macam ngi haya, a puraka li njahha.

¹⁷Asi gwat miyaŋŋa masa njik ta na anta. Yo gwat muɗumo masa bo bidas ta na anta.

¹⁸Kum macinama, mbri mbri na, gam wer so. Asi mbur misi gwata, a sa vulakaŋ ava ma. Yo mbur manja gwata, gwat mineˀ ngi si haŋ naŋ, naŋ misi hiri taˀ ava vuna ma na, a sa tiɓakaŋ di.»

¹⁹Sukum ngi Yesuhoy ati mumuŋ a soko ɓa a purakaŋ, amma a ndilam gbaˀ ava gu ta, asi zigiduw haɗa.

²⁰Mizli a ɓaka Yesu: «Ti munuk ati sukum ɗikeye, t'ani dedeŋ avra, a wuɗam pur ɗike.»

²¹A mbiɗa taŋ di: «Maha ati sukum ɗuwoy, i mizli macinam mingiɓi ngi Buymisemuŋ, yo majaka a hirnga.»

²²Ngi hin mekelem ada na, Yesu a cam palalam ati mizli ngi seˀeheye, a ɓa taŋ: «Tuwuɗukum nga dubazaw vay diga.» Joˀ ara tuwuɗam.

²³Ti taŋ matuwuɗam ti palalam na, Yesu ara hinje. Himiɗ a curbuɗ ar yama, hã yam a naha palalama, a ndir mata ɓa a zizam.

²⁴Mizli ngisi Yesuhoy a kiraham ng'ava, a puɗkakaŋ, dar a ɓakaŋ: «Buy, Buy, i ra zizam.» Yesu a puɗuk, a buca himiɗ tuwa ati diɓel ngi yama. Himiɗ a cici, diɓel ngi yam a mbizli kip, waɗ li a cici kiŋ.

²⁵Dar a ɓa taŋ: «Tiɓi kum ama ani ska?» Zluwun a ga taŋ le, a zuma taŋ hirnga le, a ɓam ar wala taŋ: «I mbur wa hana ska, a ɓa himiɗ ati yama ɗaˀ na, a cinakaŋ mi?»

²⁶Yesu ati mizli ngi seˀehey a ndilam le angi hirwuy ngi Gerasenihey, puɗak ar Galile.

²⁷Ti naŋ mabi tir palalama na, mbur ada angi walahaya, a so ji di hirnga, i mbur misi setene a hirnga. A zik le, naŋ anta ki zana avu vu ta, anta cifi a haya ta, sey angi zivihey.

²⁸Naŋ mupura Yesu keɗ na, a diɗ asi sar naŋ ti widi, a ɓi ˀay paɗ a muŋ: «Yesu, Mangal ngi Buymisemuŋ Mimadiɗa, ki wuɗ mi avu ya ka? Ambuh, anja ki giy bonoy ta!»

²⁹Yesu a ɓa setene tuwa ɗaˀ, ɓa a bi ti vu mbur nah. Asi setene a hizigiɗaŋ le is mbeˀ mbeˀe. Mizli a juwakaŋ ti celeluhoy ati sesele ɓa a ndir joˀo. Amma a mburca celeluhoyo, setene a bi di nga pala.

³⁰Yesu a cufuɗaŋ: «Slimiɗ ɗike mbrike?» A mbiɗaŋ di: «Zigiduw», asi setenehey micam a hirnga naŋ na, taŋ haɗa.

³¹Joˀ setenehey a tumbuloko Yesu, ɓa a ɓula taŋ ng'ar heleleŋ ta.

³²Naɓa fedemey ada taˀ gezleŋ akẽh, ara jiginaka taŋ ar li miɗingir. Setenehey a tumbuloko Yesu, ɓa a pula taŋ jiviɗ, ara cam ar fedemey tuwa. A pula taŋ jiviɗe.

³³Setenehey a bam tivu mburo, ara cam a hirnga fedemeye. Fedemey mitaˀ gezleŋ tuwa, a kilam wuw tir li miɗingire, ara ndilam griv griv ng'ar yam madiɗa, yam a nda taŋ cek.

³⁴Mijigina fedemey mupuraka gwat migi nah na, a kilam ti labara nah ng'ar walahay ati prokoy gar.

³⁵Mizli a ram ɓa ara puraka gwat migi vuna. A ndilam avu Yesu, a lumaka mbur misi setenehey mubam ti vaˀa tuwa, naŋ da asi sar ngi Yesu, ti zana ɓaˀ avu vu, yo naŋ ti lesl naŋ kuy kuy muduba. Zluwun a ga taŋ.

³⁶Mbur misi setenehey a hirnga miɗiyi na, mizli mupur naŋhay a slufaka taŋ ɓi nah, a cuh kahana kahana.

³⁷Akẽh na, mizli ngi hirwuy Gerasenihey gar a ɓaka Yesu ɓa a cuh, a pula taŋ, asi zluwun a ga taŋ le haɗi. Joˀ naŋ, a ci palalam, a mi a muŋ.

³⁸Mbur misi setenehey mubam ti va tuwa, a tumbuloŋ ɓa a aru aseˀeŋ. Amma Yesu a ɓaŋ:

³⁹«Mi ngi hay, gwat Buymisemuŋ muguw di gar na, slufa ɓi nah da mizli.» Mbur a ru, a bula walahaya gar ti tila mi ti ɓi ngi gwat Yesu migaŋ di tuwa gar.

⁴⁰Ti Yesu mumo na, zigiduw a tiɓaŋ mulaka, asi mizli gar ara kutukokoŋ zleˀe.

⁴¹Mbur mekelem ada, a ndilawa, a zilaka Zayirus. I buy ngi hay ngi dira dibiɗ. A hin kuɓ asi sar ngi Yesu, a tumbuloŋ ɓa a so ngi hay naŋ.

⁴²Asi zuŋ naŋ kirmalay ada, vi naŋ a gi gwat ngi kuruˀ nga cuw gu, ara mucu. Ti Yesu maru nga diga na, zigiduw ara ngislaŋ ka ngi ɓutoŋ.

⁴³Ngwas mekelem ada akẽh ma, ara si bonoy ti nguf, anta sli sleˀ le ta, a gi di le vi kuruˀ nga cuw. A tika zlili naŋ le gar da doftoroy, ko mbur pal mumbuloŋ gu anta.

⁴⁴A gumbuˀ ng'avu Yesu ti dirba, a wusaŋ avu mi ngi zana. A haŋhaŋ si na, pumbus tuwa a sli.

⁴⁵Yesu a cufuɗ vu: «Muwusiy i waka?» Piyer mupura mizli gar majam mi na, a ɓaŋ: «Buy, i zigiduw mugun hirnga ɗik mangisluw ti ka, ti ka na.»

⁴⁶Amma Yesu a ɓi: «Mbur a wusiy le, yi cine le, gidaŋ a bi le ti vu vu ɗu.»

⁴⁷Ngwas tuwa mupura a sumuɗ gu mata na, a so ti jijik, a hin kuɓ asi sar ngi Yesu. Ɓi naŋ muwusaŋ hĩˀĩ aseˀe ati naŋ miɗiyi a haŋhaŋ gar na, a slufa a mbuŋ mizli gar.

⁴⁸Dar Yesu a ɓaŋ: «Zuŋ ɗu, tiɓi ɗik a lihuw le. Aru zuy.»

⁴⁹Ti naŋ mira ɓi aruŋ na, mbur ngi hay Zayirus, buy ngi hay ngi dira dibiɗ tuwa, a ndilawa, a ɓa Zayiruso: «Zuŋ ɗik a muc le, anja ki gira Kumani mata.»

⁵⁰Amma Yesu a cine le, a ɓa Zayiruso: «Ki zluwun ta, ka tiɓi a mevel ɗike si. Zuŋ a sa mbul.»

⁵¹Yesu mindil a haya na, a pul mbur pal ɓa a ci aseˀe ta, sey Piyer, Zaŋ ati Zak waɗ cine ati mumuŋ ngi zuŋ.

⁵²Mizli gar ara hislikam ti tuwuy asi zuŋ tuwa. Yesu a ɓa taŋ: «Ki tuwam ta, a muc ta, a hinje ti hinje.»

⁵³Joˀ mizli a singiram araŋ, asi a sinaka le, zuŋ a muc le.

⁵⁴Amma Yesu a ja haŋ ngi zuŋ tuwa kaw, a zilaŋ: «Zuŋ ɗu, puɗuku!»

⁵⁵Musuwun naŋ a mo le, zuŋ a slikiɗ a haŋhaŋ si. Dar Yesu a ɓi ɓa a vulakaŋ gwat ngi zum.

⁵⁶Ɓi nah a zuma hirnga le da miyi naŋhaya, Yesu a ɓa taŋ ɗaˀ le, anja a ɓaka ɓi nah da mbur ta.