Read South Giziga DEU 10 Bible Online

DEU 10 - South Giziga bible

DEU 10

¹Moyis a ɓi: Dar Bumbulvuŋ a ɓiy na: «Hirik belelerey cuw kaɓa mudumbuŋhoy tuwa ma, jiɗo ng'avi ya a muwã aka. Ɗiyi akoti ngi dum ma.

²Beleler mudumbuŋhoy, ka muwaha taŋ tuwa, mingiɓi misi zleˀe ar taŋ na, i sa toho taŋ toh toh ng'ar beleler tayna, a dirba nah, kisa pa belelereye sek ng'ar akoti tuwa.»

³akẽh na, yi ɗiyi akoti ti dum ngi ngalalay, i hirik belelerey cuw kaɓa mudumbuŋhoy tuwa ma, i jiɗ taŋ a haŋ nga muwã.

⁴Ar beleler tayna, Bumbulvuŋ a tuh gwat mupurla kaɓa naŋ mutoho zleˀe ar beleler mudumbuŋhoy tuwa. I ɓimuɗuva mukuruˀhoy, naŋ mutulukum di mi ti wuzla vu, tapas kum mukos kos a sar muwã tuwa. A dirba nah, Bumbulvuŋ a vuliy beleler tayna asi haŋ ɗu.

⁵Dar yi po sar ti muwã, i pa belelerey tuwa sek ng'ar akoti, ya miɗiya tuwa, ɓa a ndiram ara kaɓa Bumbulvuŋ miɓiy di ɗaˀ tuwa.

⁶Israyeley a slikiɗam baɗ a mi vigiɗ ngi yam misi a Bene-Yakaŋ, a ram nga Mosera. Aroŋ a muc, a dikakaŋ a diga. Mangal naŋ Elazar a tiri masay ar li naŋ.

⁷Israyeley a slikiɗam baɗ akẽh, a ram nga Guɗgoda, ti Guɗgoda, a ram nga Yotbata. Mizaway a Yotbata mbeˀ mbeˀe.

⁸Hirak ti nah na, Bumbulvuŋ a gwaha sukwi ngi Levi gwah ngi jijira akoti ngi jumoˀay naŋ, ngi cici deŋ a mbuŋ naŋ, ɓa ngi gaŋ slra waɗ ngi ɗuwula mi da mizli naŋhay ti slimiɗ naŋ. A ra gaka slra nah hã dana aruŋ.

⁹Vurˀe, sukwi ngi Levi a lum hirwuy muwunkaka da mizli na ta, yo a lum zlili kaɓa sukum naŋhaya ta, zlili nga naŋ i Bumbulvuŋ, naŋ kaɓa Bumbulvuŋ Buymisemuŋ kumo miɓaŋ di ɗaˀ le.

¹⁰Naŋ kine, yi ndir a muwã, i vi hiipas hiipas kukur mufaɗ, duvuɗ duvuɗ kukur mufaɗ, kaɓa mudumbuŋ tuwa ma. Bumbulvuŋ a cine diradibiɗ ɗu le ɓula ma ni, joˀ Bumbulvuŋ a pulukum, a ngizlukum mata.

¹¹Akẽh na, Bumbulvuŋ a ɓiy: «Slikiɗi, ara ki ɓaˀ a mbuŋ mizli, ɓa ara tiɓaka hirwuy, ya miɓi ti hudum a mbuŋ dideˀ taŋhay, i sa vula taŋ di tuwaˀ.»

¹²Moyis a ɓi: Na wurenna so na Israyeley, Bumbulvuŋ Buymisemuŋ kumo a kutuk di i mi avu kumo ka? A wuɗ ɓa ki zluwunam di, ki sipaka jiviɗ naŋ, ki wuɗakaŋ, ki gakaŋ gwata ti mevel purla, ti membezleŋ ngi vu kum wãˀ.

¹³A wuɗ ɓa ki gam slra ti ɓimuɗuva naŋhay ati ɓimujuwa naŋhay, ya mavulukum taŋ dana, ɓa ki ndiram di ar wuya na.

¹⁴Birngiŋ micay waɗ hirwuy ati gwat ngi raˀahay gar na, i ngi Bumbulvuŋ Buymisemuŋ kum.

¹⁵Ti zlezle na, Bumbulvuŋ mujum ati mizli ɓa a wuɗ taŋ na, ati cine kumoy, yo a dirba taŋ kwana, i kum dideˀ taŋhay, a wunukum a wuzla sukwi ngi mizli gar, kaɓa kum mapuraka dana ani na.

¹⁶Anja ki ndiram wãˀ, kum i migi slra ngi Bumbulvuŋ Buymisemuŋ kum, ki slikiɗam ɓi ava mata.

¹⁷Naŋ kine, Bumbulvuŋ Buymisemuŋ kumo, i Buymisemuŋ mufuna buymisemuŋhoy, i Bumbulvuŋ mufuna bumbulvuŋhoy, i Buymisemuŋ madiɗa haɗa, migidaŋ, magi zluwun da mizli, anta gi ti mizli wal wal ta, yo a hiɗikakaŋ ti gwat ngatara gu ta.

¹⁸A jiniˀis asi mutuhuhoy ati wudigahay. A wuɗ moholoyoy misi asi ruwuy kumo, yo a vula taŋ gwat ngi zum ati zanahay.

¹⁹Anja kumo kwana, ki wuɗam moholoyoy misi a wuzla kumo, asi kum zleˀe i moholoyoy a Ezipte ya.

²⁰Zluwunam ti Bumbulvuŋ Buymisemuŋ kumo, huruk hurukam a mbuŋ naŋ, hinam mevel aseˀe tewle, yo kisa hudumomo, sey ti slimiɗ naŋ.

²¹Anja sey ki hunumam i naŋ, Buymisemuŋ kumo pal i naŋ, a gukum gwat madiɗahay le haɗi ati gwat magam zluwunoy, kum mupuraka taŋ ti hiri kum.

²²Dideˀ kumoy miram nga Ezipte na, a funaka mizli kukur tarnaˀ ta. Ani wurenna, Bumbulvuŋ Buymisemuŋ kumo a tiri ti kum le wenewene kaɓa wurzlaŋhay a muŋ.