Read South Giziga DEU 11 Bible Online

DEU 11 - South Giziga bible

DEU 11

¹Moyis a ɓi: Wuɗam Bumbulvuŋ Buymisemuŋ kumo Ɓimujuwa naŋhay, sirik naŋhay, waɗ ɓimuɗuva naŋhaya, jaka taŋ ndrehhe a hirnga.

²Na ki sinaka le, ya maɓi dana ani na, i ziri kumoy ta, asi jiviɗ Bumbulvuŋ mibigi di gidaŋ naŋ na, taŋ a puraka ta, a si na ka ta Amma yi ɓi di i kum migam sedewo ngi madiɗa naŋ ati gidaŋ naŋ mihaɗa na.

³Gwatay mabigam gwat mekelemey ati gwat naŋ miga taŋ a Ezipte na, ki puraka taŋ le takwa, gwat naŋ miga da buy madiɗa ngi Ezipte waɗ hirwuy naŋ gar na, ki puraka le,

⁴gwat naŋ miga da soje ngi Eziptehey, da pilis taŋhay ati mota ngi vurum taŋhaya. Ti taŋ masupukum na, a mo ti yam ngir mubuliy lavaɗa ng'ar taŋ, a ngizla taŋ leɗeɗ hã dana,

⁵gwat naŋ miga vur kum, diga a wuzlaɓuh hã kum mindiloko akaka na,

⁶gwat naŋ miga da Dataŋ ati Abiram, ziri ngi Eliyapay, mbur ngir sukwi ngi Ruben. Hirwuy a wucuh wucah a mbuŋ Israyele gar, a nda taŋ ati mizli ngi hay taŋhaya cek, guɗuk taŋhay ati mizli gar masipaka ɓi taŋ.

⁷Haˀaw, gwat madidiɗahay Bumbulvuŋ miga taŋ na, ki puraka taŋ le ti hiri kumo.

⁸Na, gam slra ti ɓimuɗuvahay gar, ya mavulukum taŋ dana na so. Naɓa kisa lumam gidaŋ ngi tiɓa hirwuy kumo masa cam ng'ara na,

⁹ɓa hutuŋ kumo a sa ndir subur asi hirwuy Bumbulvuŋ miɓi ti hudum, da dideˀ kumoy a sa vula taŋ di waɗ da dideˀ taŋhay nga mbuŋ na, i hirwuy misi ɗuwa ati mam ara ɓulam ara.

¹⁰Moyis a ɓi: Naŋ kine gisiŋ, hirwuy kum masa tiɓaka, ɓa a ndir da kum na, naŋ kaɓa Ezipte kum mupuloko di na ta. Adiga, ki zligaka gwata le na, sey ki pakaŋ yam sek le kaɓa mapam yam da jarne.

¹¹Amma hirwuy kum masa ra tiɓaka da kum na, i hirwuy muwã ati sozohoy, hirwuy vuŋ magi ti gi ar taŋ.

¹²I hirwuy Bumbulvuŋ Buymisemuŋ kumo majigina kuy kuy, hiri taˀ ava hã tiŋ wãˀ.

¹³Ɓimuɗuva ɗuwoy ya mavulukum taŋ dana ani na, da ki ra jaka taŋ a hirnga gisiŋ, yo ki ra wuɗaka Bumbulvuŋ Buymisemuŋ kum, ki ra gaka gwat ya mawuɗo ti mevel purla, ti membezleŋ ngi vu kum wãˀ na,

¹⁴naɓa a sa ga vuŋ asi ruwuy kumo ar hin naŋ kaslsla, ti mohor waɗ ti sifi, ɓa ki lumam gwat ngi migamaya kuy kuy: daw, mbaazla waɗ mal.

¹⁵a sa puso giziŋ da ginew kumoy a ɓuh ma, yo gwat ngi zum avu kumo ka zay.

¹⁶Jam lesl kuy kuy so, ɓa ki pulaka mevel kum a tikinukum ta, ki ngizlam avu jiviɗe ta, ki hurukom ngi putukul a mbuŋ kuliheye ta.

¹⁷Da kanah ta na, naɓa Bumbulvuŋ a sa ji mevel ar kum, a sa gica muŋ, vuŋ a go mata, hirwuy anta sa gi gwat mata, joˀ kisa susuymom kutum angi hirwuy mezle Bumbulvuŋ muvulukum di tuwa.

¹⁸Ɓimuɗuvahay ya mavulukum taŋ na, caka taŋ ng'ar mevel kumoy, ng'ar membezleŋ ngi vu kumoy. Ɓa ki puyukom taŋ hirnga ta na, juwaka a hirbazla kumoy waɗ a midibiɗi kumoyo ma.

¹⁹Ki sa dubunaka taŋ da ziri kumoyo. Ki sa ɓaka taŋ di, ko kum mujoa hay kum, malla kum maram a jiviɗi. Kum mutup ti tup malla kum mideŋ ti deŋ.

²⁰Ki sa tohoko taŋ avu dum ngi miviŋ ngi viŋ kumoy waɗ a mizlingre ngi walahay kumoy,

²¹ɓa kum ati ziri kumoyo, kisa zikam haɗi angi hirwuy Bumbulvuŋ muvula ti hudum da dideˀ kumoy tuwa. Ki sa zikam haɗi kaɓa birngiŋ micay a hirnga hirwuy.

²²Asi, ɓimuɗuvahay ya ɓukum taŋ na, da ki ra jaka taŋ gisiŋ a hirnga, ki ra gam taŋ slra, ki ra wuɗam Bumbulvuŋ Buymisemuŋ kumo, ki ra jumom ng'avaŋ ngi sipa jiviɗ naŋ na,

²³naɓa sukwi ngi mizli mihaɗi fineˀ kumo, migidaŋ fineˀ kumo na, Bumbulvuŋ a sa ɓula taŋ gar, mber mber a mbuŋ kum avra, joˀ kisa tiɓaka hirwuy taŋ da kum.

²⁴Li kum muɗuvam sar kum le taˀ ara gar na, i ngi kum: hirwuy kum a sa zli zle a wuzlaɓuh mikirɗak kirɗak waɗ Libaŋ ara. Zle a mizaw Efrat tisi pas ngi miprik, hã sesẽŋ a mi mubuliy Mediterane tisi pas ngi pastaˀa.

²⁵Mbur masa cici zlak a mbuŋ kumo gu anta. Angi li kum misa ram le gar na, Bumbulvuŋ Buymisemuŋ kum, a sa ga ɓa mizli ngi digahay a zluwunam ti kum, a jijikam ti kum kirkir, kaɓa naŋ muɓukum di ɗaˀ le vuna si.

²⁶Cinam ɗi, dana i ɗuwulukum mi malla i nisukum kwa, wunam asi taŋ:

²⁷ɓimuɗuva ngi Bumbulvuŋ Buymisemuŋ kum, ya maɓukum di dana na, da ki ra jaka a hirnga na, naɓa i sa ɗuwulukum mi,

²⁸amma da ki jaka ɓimuɗuva ngi Bumbulvuŋ Buymisemuŋ kumo a hirnga ta, yo ki ngizlam le avu jiviɗ ya maɓukum di dana na, ɓa ngi ra huruk huruk a mbuŋ kulihey kum misinaka taŋ ta na, naɓa i sa nisukum.

²⁹Da Bumbulvuŋ Buymisemuŋ kumo a sa ci ti kum le nga hirwuy kum masa tiɓaka da kum tuwa na, kisa ɗuwulam mi dedeŋ a hirnga muwã Garizim, yo kisa nisam vu a hirnga muwã Ebal.

³⁰Muwã tayna, taŋ ti duba Zurdeŋ, ti duba jiviɗ misi tisi pas ngi pastaˀa, angi hirwuy ngi Kanaˀanay misi ar sozo ngi Zurdeŋ, taŋ gweˀ avu widis madiɗa a More, taŋ sek duba cakay ati Gilgal.

³¹Asi ki ra tuwuɗaka Zurdeŋ, ɓa nga tiɓa hirwuy Bumbulvuŋ Buymisemuŋ kumo muvulukum di na. Ki sa tiɓaka da kum, joˀ ki pam ara.

³²Tumom vu ɓa ki gam slra ti ɓimujuwahay ati sirikey ya maɓukum taŋ dana na gar.