Read South Giziga DEU 12 Bible Online

DEU 12 - South Giziga bible

DEU 12

¹Moyis a ɓi: Bumbulvuŋ Buymisemuŋ ngi dideˀ kumoy a sa vulukum hirwuyo da kum. Ɓimujuwa ati sirikey ani, ɓa ki kam slimiɗ ar taŋ kuy kuy, ki gam taŋ slra ar hin ngi siifa kum gar.

²Kulihey misi a hirnga muwãhay, ar li miɗigirey, a wuzla widis mutukuzohoy gar na, kisa nguɓucaka taŋ avra wãˀ, asi sukwi ngi mizli kum masa ɓulaka taŋ na, ada huruk hurukam a mbuŋ kulihey vuna a diga.

³Ki sa wahaka li gi mikuli taŋhay ati ɗugur taŋhay mikaˀ kaˀa, kuli taŋ ɓamtalaya, kisa wuraka taŋ, kuli taŋ miciɗaka taŋ ti ciɗeye, kisa wahaka taŋ, kisa susuyumoko slimiɗ ngi kuli tayna ar li nah wãˀ.

⁴Da kum mira huruk hurukam a mbuŋ Bumbulvuŋ Buymisemuŋ kumo na, ki gaka ka mizli tayna magaka da kuli taŋhay na ta.

⁵Ki sa ra huruk hurukam a mbuŋ Bumbulvuŋ, sey ar li naŋ masa wuna a wuzla sukwi kumoy, ɓa a ndir araŋ, yo ɓa a biga vu naŋ a diga.

⁶Mikuli kumoy ti ginew zlam zlam, mikuli ngi jumoˀaya nga diga. Mukuruˀngi gwat ngi migam kumoy, gwat ngi vul ngi mongoy kum, waɗ kum masoko di ngi mevel kum malla ngi ji mi ngi Bumbulvuŋ, modogom ngi sla, ngi ˀaw ati ngi tumuŋ kumoy gar na, kisa ram taŋ nga diga.

⁷Kum ati ziri kumoy gar arleˀe, kisa zumaka ɗaf ar hay ngi Bumbulvuŋ Buymisemuŋ kum. Ki sa mumulom haɗa, asi Bumbulvuŋ Buymisemuŋ kumo a ɗuwulukum mi le ar gwat ngi gi kum gar si.

⁸Ki sa huruk hurukam a mbuŋ Bumbulvuŋ ti jiviɗ ndra mahuruk hurukam di dana na mata, anta misi mbur gar a gi ka naŋ mawuɗ na ta.

⁹Asi hirwuy Bumbulvuŋ Buymisemuŋ kumo masa vulukum di da kum, ɓa ki cifam setete anga na, ki ndilam anga t'aruŋ.

¹⁰Amma kisa tuwuɗam nga dubazaw Zurdeŋ, ki cifam angi hirwuy Bumbulvuŋ Buymisemuŋ kumo muvulukum di da kum na. A sa jiginukum avu mesene kumoy mugun hirnga kum na, joˀ kisa cifam bidas manja zluwun.

¹¹Gwat ya maslufukum t'ani gar na, kisa ram taŋ da Bumbulvuŋ Buymisemuŋ kumo, ar li naŋ masa wunaŋ ngi biga vu naŋ na: mikuli mizlam zlam wãˀ, mikuli ngi jumoˀay, mikuruˀ ngi gwat ngi migam kumoy, waɗ gwat ngi vul ngi mongoy kum ati gwat gar kum majuwaka le a mevel kum ngi ji mi ngi Bumbulvuŋ.

¹²A mbuŋ Bumbulvuŋ, kisa mumulom haɗa, kum ati ziri kum mizilehey ati mongosohoy, beke kum mizilehey ati mongosohoyo, waɗ mizli levihey micifam ar walahay kumoy, asi hirwuy muwunkaka na, t'anta ti mi nga taŋ ta.

¹³Li mipal ko wanaka gar kum mi puraka le na, jam lesl, anja ki gam mikuli mizlam zlama anga ta.

¹⁴Ki sa gaka sey ar li Bumbulvuŋ masa wuna, a ruwuy pal a wuzla ngi sukwi kumoy. Ki sa gaka gwat ya maɓukum di ɗaˀ le na, gar a diga.

¹⁵Ar li kum masa cifama, da Bumbulvuŋ Buymisemuŋ kumo a vulukum gwat ngi lum, kum muwuɗam le gar na, ki kiɗam ginew ngi humbuɗu. Mbur manja dili malla misi dili gar na, a humbuɗ zuy, kaɓa i useˀ ngi mangazaw malla ngi fugum.

¹⁶Amma ki zumaka pumbus ngi ginewe ta, kisa pulaka a pi a ruwuy ka yam.

¹⁷Mukuruˀngi alkamari kum, ngi mbaazla si kum, ngi mal kum, ko modogom ngi sla kumoy, ngi tumuŋ kumoy, ngi ˀaw kumoy, ko gwat kum mavulaka ngi mongoy kum, waɗ kum mavulaka ngi mevel kum malla ngi ji mi ngi Bumbulvuŋ gar na, ki zumaka taŋ ar walahay kumoy tehhe ta.

¹⁸Ki sa zumaka taŋ sey a mbuŋ Bumbulvuŋ Buymisemuŋ kumo, ar li naŋ muwuna le. Ki sa zumaka ati ziri kum mizile ati mongosohoy, beke kum mizile ati mongosohoy waɗ levihey misi ar walahay kumoy. A mbuŋ Bumbulvuŋ Buymisemuŋ kumo, kisa mumulom ar gwat ngi gi kum gar.

¹⁹Angi hin ngi siifa kum a ruwuyo gar na, anja ki gam jalaɓi ti leviheye ta.

²⁰Ti Bumbulvuŋ Buymisemuŋ kumo masa ga ɓa hirwuy kum a tiri kirngiŋ kaɓa naŋ muɓukum di ɗaˀ le tuwa na, da ki wuɗam useˀe le na, kisa zumam ka kum mawuɗam.

²¹Amma da kaɓa li Bumbulvuŋ Buymisemuŋ kumo muwuna ngi biga vu naŋ, naŋ kileŋ avu kumo na, kisa jam ginew ngir gezleŋ kumoy: sla, tumuŋ, malla ˀaw Bumbulvuŋ Buymisemuŋ kumo muvulukum di le, kisa gaka ka ya muɓukum di ɗaˀ ɗaˀ le na. Dar kisa zumam ka kum mawuɗam, ar walahay kum tehhe.

²²Haˀaw mbur misi dili malla manja dili gar na, a sa zumam jom arleˀe, kaɓa ki zumam di i useˀ ngi mangazaw malla ngi fugum.

²³Amma cicam kaŋ kaŋ, anja ki zumaka pumbuso ta, asi pumbuso i siifa. Anja ki zumaka siifa jom ti useˀ naŋ ta.

²⁴Ki zumaka pumbuso ta, amma kisa pulaka a pi a ruwuy kaɓa yam.

²⁵Ki zumaka pumbuso ta ndiɗaˀ wãˀ. Da ki zumaka ta na, naɓa kisa ndiram ar wuya, kum ati ziri kumoy nga mbuŋ, kite ki gam di i gwat macira hiri da Bumbulvuŋ.

²⁶Gwat ngi so di ng'ar li Bumbulvuŋ masa wuna na, sey ginew muvula le da Bumbulvuŋ malla ngi ji mi ngi Bumbulvuŋ tewle.

²⁷Ki sa gam mikuli mizlam zlam wãˀ, useˀ naŋ ati pumbus naŋ, kisa vulaka taŋ ar li ngi mikuli da Bumbulvuŋ Buymisemuŋ kum. Da i mikuli ngi jumoˀay na, kisa paka pumbus naŋ ar li gi mikuli, joˀ ki zumaka useˀ na.

²⁸Ɓimuɗuvahay gar, yaŋ maɓukum t'ani na, cinaka kuy kuy, yo jaka kuy kuy a hirnga, naɓa kum ati ziri kumoy nga mbuŋ, kisa ndiram ar wuya ngi caˀa. Kite ki gam di i gwat mezleŋ, yo i gwat macira hiri da Bumbulvuŋ Buymisemuŋ kum

²⁹Moyis a ɓi: Hirwuy kum masa cam ara ɓa a ndir da kum na, Bumbulvuŋ Buymisemuŋ kumo a sa susuyumo mizli ngi raˀahaya a mbuŋ kumo. Da kum misa tiɓaka le, ki pam le ara na,

³⁰jam lesl kuy kuy, anja kwar taŋ a jukum ɓa ki gam ka taŋ na ta. Ki kam slimiɗ ar kuli taŋhaya ta. Anja ki ɓam: ‹Sukwi tayna, a huruk hurukam a mbuŋ kuli taŋhaya mbri mbrike? Anja i gam ka taŋ na ya na›, ki ɓam ta.

³¹Da ki ra huruk hurukam a mbuŋ Bumbulvuŋ Buymisemuŋ kumo na, anja ki gam ka taŋ ta. Naŋ kine, gwat mukuyta wãˀ a mbuŋ Bumbulvuŋ, gwat naŋ mawuɗ ta wãˀ na, taŋ ara gaka da kuli taŋhaya: hã a zlumaka ziri taŋ mizile ati mongosohoyo da kuli taŋhay.