Read South Giziga DEU 13 Bible Online

DEU 13 - South Giziga bible

DEU 13

¹Kumo jak na, tumom vu ngi gi slra ti ɓimuɗuvahay ya maɓukum taŋ na, ko ki coko gwat mekelem neˀ ng'ara ta, ko ki zuɓam avra neˀ le ta ma.

²Moyis a ɓi: Da kaɓa ani: mijiviɗ malla mbur misi kleŋ, a so deŋ a wuzla kumo, a ɓukum ɓi ngi gwat ngi zuma hirnga malla gwat mabigi gwat mekelem.

³Da gwat mabigi gwat mekelem malla gwat ngi zuma hirnga naŋ muɓukum di tuwa, a gi le kasl kasl gisiŋ, yo da a ɓukum le: dulukukum a mbuŋ kulihey, gukum mezegwel da kulihey na,

⁴ki cinaka mingiɓi naŋ ta, asi i Bumbulvuŋ Buymisemuŋ kumo maci a kwacay kumo, ɓa a si na da kum ada ki wuɗakaŋ ti mevel kum wãˀ waɗ ti membezleŋ ngi vu kum wãˀ kwana.

⁵Sey ki sipam di i Bumbulvuŋ Buymisemuŋ kumo pal naŋ, zluwunam di, sipaka ɓimuɗuva naŋhaya kuy kuy, cinakaŋ mi, gakaŋ gwat naŋ mawuɗo, vulaka mevelkumo da naŋ pal naŋ.

⁶Amma mbur mijiviɗ malla misi kleŋ nana, kiɗaka vagay, asi naŋ mihizigiɗukum ɓa ki ngizlam avu jiviɗ ngi Bumbulvuŋ, Buymisemuŋ kumo mutuɓo kum ar beke, yo mubo ti kum ti ruwuy Ezipte na. A sa kiɗaka vagay vur naŋ muwuɗ ngizli ti kum mbak jiviɗ ngi Bumbulvuŋ Buymisemuŋ kumo mubugukum di na le na. Da ki gaka le kine na, naɓa ki zuɓaka malambaˀa le ti wuzla kumo.

⁷Asinta, pas mekeleme, mbur a sa so yaŋ yaŋ ng'avu sukum naŋ mizile ngi mumuŋ, malla mangal naŋ, malla zuŋ naŋ mongoso, malla ngwas naŋ meketeŋ, malla yeme naŋ, a sa zila ɓa ara gam mezegwel da kulihey, misi ko kum vuna ki sinaka ta, yo dideˀ kumoy kwana, a sinaka taŋ zleˀe ɗaˀ ta ma,

⁸i kuli ngi sukwi ngi mizli mekelemey migweˀ gweˀ ati mikileŋ kileŋhey mizlar hirwuy gar na,

⁹ki tiɓaka ta, ki cinakaŋ di ta, ki ɗuvam hiri ava ta, ki purakaŋ ircece ta, yo ki tiɗam kalaf ara ta.

¹⁰Anja sey ki kiɗaka vagay jaka. Mbur, naŋ mawuɗ hizigiɗ naŋ ng'ar mungra vuna, a hiziga ti ɗuguro dumbuŋ, a dirba nah, masa tikakaŋ hutuŋ i mizli gar.

¹¹Mbur muzluɓa ɓi nana, a sa kuyupokoŋ ti ɗugur, a muc. Asi mike na, Bumbulvuŋ Buymisemuŋ kumo mubo ti kum ti ruwuy Ezipte, tir beke tuwa, mbur nah na a sipi jiviɗ ngi ɗiɗuw kileŋ ava.

¹²Mizli Israyeley gar misa cinaka ɓi nah le na, a sa ga taŋ zluwun, yo a sa pulaka gi mungra misi kahana a wuzla kumo wãˀ.

¹³Da ani ar walahay pal asi walahayay Bumbulvuŋ Buymisemuŋ kumo muvulukum taŋ ɓa ki pam ar taŋ na, ki cinam le mizli ara ɓam:

¹⁴sulomehey a slam le asi kumo, ara paka mi da mizli ngir walahay taŋhaya, ɓa a gam mezegwel da kulihey, i kulihey kum misinaka taŋ ta na,

¹⁵cufuɗam vu, kaka virzi nah, laka pislek pislek, da ki lumaka le, a gaka gwat malambaˀ mukuyta wãˀ nah na le a wuzla kumo gisiŋ na,

¹⁶kisa kiɗaka mizli ngir walahay nah cek, ki ngizlaka ginew taŋhaya pay. A dirba nah, ki wahaka walahay nah krap krap wãˀ jom ti gwat ngi raˀahaya gar.

¹⁷Ki sa cikilaka zlili taŋhaya gar ar li ngi luuma, joˀ ki ɗuvaka taŋ vu, ki wuraka walahaya ma. A sa tiri kaɓa i mikuli mizlam zlam wãˀ da Bumbulvuŋ Buymisemuŋ kum. A sa tiri diŋ ngi set, ko mbur masa ndira hiri naŋ anta mata wãˀ.

¹⁸Gwat ngi ngizl avra gar na, ki wuɗam ta, ɓa Bumbulvuŋ Buymisemuŋ kumo a tisla mevele mislikiɗa fõh fõh na. A sa gukum mezle naŋ wãˀ, yo a sa sukukum haɗi kaɓa naŋ miɓa ɗaˀ le da dideˀ kumoy zleˀe tuwa.

¹⁹Amma sey da ki ra cinaka mi da Bumbulvuŋ Buymisemuŋ, ɓimuɗuvahay ya maɓukum taŋ dana na, ki ra jaka taŋ a hirnga, yo ki ra gam gwat mijeŋŋe a mihiri ngi Bumbulvuŋ Buymisemuŋ far.