Read South Giziga DEU 14 Bible Online

DEU 14 - South Giziga bible

DEU 14

¹Kum i ziri ngi Bumbulvuŋ Buymisemuŋ kum. Na, da hiriyi a gi le avu kum na, anja ki ciraka vu ta, yo ki kilahaka hamac ngi midibiɗe ta.

²Naŋ kine, kum i mizli mihĩˀĩ ngi Bumbulvuŋ Buymisemuŋ kum. A wuzla mizli ngisi ruwuyoy gar na, a wini di i kum, kum inga naŋhay mupuɗaw puɗaw wãˀ.

³Gwat Bumbulvuŋ mitika le, i ngi zum ta na, ki zumaka ta.

⁴Gwat misãmi ngi zumoyo t'ani: sla, tumuŋ, ˀaw,

⁵muuni, mangazaw, muuni misi durum sloprok sloprok, ˀaw muwã, tumuŋ muwã, bagalaf, ˀaw ɓuh.

⁶Gwat misãmi misi zlenek wurngaŋ, maˀur gar na, ki zumaka zuy.

⁷Amma a wuzla gwat misãmi misi zlenek wurngaŋ, yo maˀur, misi ngi zumoy ta na, t'ani: zlogomo, mandaf, kucum. A zumaka gwata, a ˀurom ɓula, amma t'anta ti zlenek wurngaŋ ta. Avu kum i ngi zumoy ta.

⁸Waɗ fedeme ma, asi naŋ ti zlenek wurngaŋ ɓula, amma naŋ anta ˀur ta. Avu kum i ngi zumoy ta, ki zumaka useˀ taŋhaya ta, ko vagay taŋhay kwana, ki jaka haŋ avu taŋ ta.

⁹Gwat ngisi yamaya, kum mazumaka zuyo t'ani: gwat misi zlara njor njor waɗ dubaˀ ava gar na, ki zumaka taŋ zuy.

¹⁰Amma gwat misi zlara anta njor njor ava ta, yo dubaˀ anta ava ta na, ki zumaka ta. Avu kum i ngi zum ta.

¹¹Ɗiyuw ngi zumoy gar na, ki zumaka taŋ zuy.

¹²Amma ɗiyuw ngi zumoy ta na, t'ani: kurom, moloturzo, kurom ngi mi yam,

¹³makalala, kilkandaŋ waɗ sukwi ngi ɗiyuw mekelem muzuma useˀhey,

¹⁴yo sukwi ngi magagakay cek,

¹⁵maduli, sutete, ɗiyuw memeɗe ngi miyamay ati sukwi ngi zlamay gar,

¹⁶biizim, kusuk tumburum, pihu,

¹⁷sukwi ngi sutete, kurom, yamedewle,

¹⁸membesembese, sukwi ngi ngirkakak wal wal, waɗ joro joro ati kwekwenje.

¹⁹Mevreŋ misi zlarahay gar, i ngi zumoy ta, a zumaka taŋ ta.

²⁰Gwat misi zlara misi i ngi zum na, zumakaŋ.

²¹Gwat mumuc ti muc gar na, ki zumaka ta: vulaka da moholoy ngir walahay kum, taŋ a zuma zuy, malla ta na, ɓa mulakay a hiɗikakaŋ. Naŋ kine, kum i mizli mihĩˀĩ ngi Bumbulvuŋ Buymisemuŋ kum. Ki da ka zuŋ ˀawa ti ɗuwa ngi mumuŋ tehhe a muŋ ta.

²²Vur vi gar na, gwat ngi migam ngir guva kumoy gar na, vulaka mukuruˀ taŋhaya.

²³A dirba nah, kisa ram ng'ar hay ngi Bumbulvuŋ Buymisemuŋ kum, li naŋ muwuna le ɓa a biga vu naŋ a diga. Mukuruˀngi daw kumoy, ngi mbaazla kumoy, ngi mal waɗ modogom ngi sla, ngi tumuŋ, ngi ˀaw kumoyo, kisa zumaka taŋ a diga. Naŋ kine, kisa dubunaka zluwun ti Bumbulvuŋ Buymisemuŋ kumo ndrehhe,

²⁴Bumbulvuŋ Buymisemuŋ kumo a sa vulukum gwat ngi migama haɗa, yo li naŋ muwuna ngi biga vu naŋ na, naŋ kileŋ avu kumo, ki jijiraka mukuruˀ ngi migam kumoy nga diga gu ta, asi naŋ mikileŋ tuwa.

²⁵Da naŋ kine na, mukuruˀ ngi gwat kumoyo kisa hiɗikaka taŋ avra. Ki sa ram ti dala nah kaw a haŋ ng'ar li Bumbulvuŋ Buymisemuŋ muwuna na.

²⁶Adiga, kisa hiɗikam gwat kum muwuɗam le gar: slahay, tumuŋhoy, ˀaway, mbaazla ati barasahay. Ki sa zumaka, yo ki saka ti mumul ati mizli ngi hay kumoy gar a mbuŋ Bumbulvuŋ Buymisemuŋ kum

²⁷Mizli levihey misi ar walahay kumoyo, ki puyukom taŋ hirnga ta, asi guva taŋhay anta angi hirwuy kum muwuɗokaka na ta.

²⁸Ki gam le vi makir gar na, ki tiɓaka mukuruˀ ngi gwat ngi migamay kum muhuvaka taŋ ar vi nah. Ki sa paka taŋ sek sek ar walahay kumoy.

²⁹Akẽh na, mizli levihey manja guvahay tuwa, a sa soko, a sa hilam, waɗ mulakay, mutuhuhoy, wudigahay misi a wuzla kumo. A sa zumam hã a mbam. Dar Bumbulvuŋ a sa ɗuwulukum mi ar gwat kum maga ka gar.