Read South Giziga DEU 15 Bible Online

DEU 15 - South Giziga bible

DEU 15

¹Vur vi tarnaˀ gar na, duvus mizli mididiɗaka le avu kumo na, kisa pulaka teˀe, a wurkaka mata.

²Jiviɗ ngi pula duvus da mburo n'ani: vi ngi pula duvus ti slimiɗ ngi Bumbulvuŋ, da a tilam di mi le na, mbur muvul duvus le da mbur Israyel cil naŋ gar na, sey a pula teˀe, a cufuɗa mata. Anja a tikaka ˀay da mbur Israyel sukum taŋ tehhe muŋ ngi wurka duvuso ta.

³ki tikaka ˀay da mbur mulaka ngi wurka duvuso gu ɓula, amma duvus misi avu sukum kumoy na, pulaka teˀe, ki cufuɗaka mata.

⁴Gar ti nah kwana, anta lumam misi murga a wuzla kumo ta, asi Bumbulvuŋ Buymisemuŋ kum, a sa ɗuwulukum mi haɗi angi hirwuy naŋ masa vulukum di, ɓa a ndir da kum na.

⁵Amma sey da ki ra jikam slimiɗ kuy kuy ngi cine mingiɓi ngi Bumbulvuŋ Buymisemuŋ kumo vuna ɓula, ti gi slra, ti ɓimuɗuva ya mavulukum di dana ani na far.

⁶Ti Bumbulvuŋ Buymisemuŋ kumo misa ɗuwulukum mi le kaɓa naŋ muɓukum di ɗaˀ le tuwa na, naɓa ko mbur pal masa didiɗ dala ti didiɗ anta asi kumo ta, i kum masa vulam duvus da mulakay haɗi jak. Naŋ kine, kisa wam sukwi ngi mizli haɗi, amma ko sukwi mekelem masa wukum kum anta.

⁷Angi hirwuy Bumbulvuŋ Buymisemuŋ kumo masa vulukum di na, da ko misi murga ada a wuzla sukum kumoy angi walahay kumoy na, kisa gam gizak ɓa ki zlikaka sukum kum misi murga na ta.

⁸Amma anja haŋ kumo ndir baŋ jaka, kisa vulakaŋ duvus ngi gwat naŋ muro ti may naŋ gar.

⁹Jam lesl kuy kuy, anja ki soko ti wuluk malambaˀ ar kumo, ki ɓam: «Vi mitarnaˀ naŋ, mapulam di duvus teˀe, a wurkaka mata tuwa, a wuɗo gi gweˀe», vurˀe anja ki ndiram manja ircece avu sukum kum misi murga ta, yo ki zlikakaŋ ta. Da kine na, naɓa sukum kum a sa widi ti kum a mbuŋ Bumbulvuŋ asi ki zluɓaka le.

¹⁰Vulakaŋ duvuso, yo vulakaŋ di ti mevel purla. Dar Bumbulvuŋ a sa ɗuwulukum mi ar gwat ngi gi kum gar, asi vul kum ti gula ti hazum na.

¹¹Misi murgahay anta sa kiɗam mi a wuzla kumo ta, vurˀe, i ɗuvukum ɓi ani: anja ki ndiram ti haŋ baŋ vur sukum kum migeˀ ircecehey le ati misi murgahay misi asi ruwuy kumo.

¹²Moyis a ɓi: a wuzla sukum kum Hebereye, da kaɓa sukum ɗik mizile malla mongoso, a hiɗika vu naŋ le avu ka, yo da a gi beke ɗike le vi merkeɗ na, vi mitarnaˀ naŋ, kisa pulaŋ a ru, i diimu.

¹³Amma so na, ki pulaŋ aru haŋ kavbar kine ta.

¹⁴Ki sa mbaŋ gwat ngatarahay: tumuŋhoy ati ˀaway, daw waɗ mbaazla. Gwat tayna, i Bumbulvuŋ Buymisemuŋ kumo muvulukum taŋ ti mevel purla.

¹⁵Kum misi zleˀe i bekehey a Ezipte, Bumbulvuŋ Buymisemuŋ kumo mutuɓo hirnga kumo na, inga wulkaka kwaɗay. Ya maɗuvukum ɓi hana dana na vurˀe.

¹⁶Amma da beke nah a ɓi le: «I hĩya cuh ti hay ɗike ta», asi ara wuɗ ka ati hay ɗike gar, yo naŋ ar wuya a hay ɗike na,

¹⁷akẽh so na, wuɗ sumuŋ, slinaŋ slimiɗe bac da dum ngi miviŋ, naɓa a sa ndir i beke ɗik ngi sete. Da i beke mongoso kwana, kisa gaŋ di misi purla ka nah ya.

¹⁸Pula mbur beke a tiri diimu na, ki wulka ta, asi slra ngi vi merkeɗ na, a su ti dala ngi mbur magi slra ngi kiya le makaw cuw. Pulaŋ aru so, Bumbulvuŋ Buymisemuŋ ɗik a sa ɗuwulukum mi ar gwat ngi gi ɗik gar.

¹⁹Modogom mizile ngi sla kumoy, ngi tumuŋ malla ngi ˀaw kumoyo, kisa vulaka da Bumbulvuŋ Buymisemuŋ kum. Gusoŋ kum modogomo, ki gam di slra ta, yo ki slaka ngwic ngi tumuŋ kum modogomoyo ta.

²⁰Vur vi gar na, kisa zumaka useˀ naŋ ati mizli ngi hay kumoy, ar li Bumbulvuŋ Buymisemuŋ kumo masa wunaŋ.

²¹Da ginewe naŋ ti hereweɗ ava, da i jegwer malla dangar, malla ko hereweɗ wanaka gar na, ki vulaka da Bumbulvuŋ Buymisemuŋ kumo ta.

²²Ki sa zumaka useˀ naŋ nga hay kum. Mbur misi dili malla manja dili , a sa zumaka jom arleˀe, kaɓa mazumam useˀ ngi mangazaw malla ngi gawla muuni.

²³Gar ti nah kwana, ki zumaka pumbus ngi ginewe ta, kisa pulaka a pi a ruwuy kaɓa yam.