Read South Giziga DEU 16 Bible Online

DEU 16 - South Giziga bible

DEU 16

¹Moyis a ɓi: Angi kiya ngi sifi na, kisa gaka muguzlum Pak ngi hunuma Bumbulvuŋ Buymisemuŋ kumo. Naŋ kine, Bumbulvuŋ Buymisemuŋ kumo mubo ti kum ti ruwuy Ezipte na, i ngi duvuɗ angi kiya nah.

²Ki sa jam tumuŋ, ˀaw malla sla ngir gezleŋ kum ngi gi mikuli da Bumbulvuŋ Buymisemuŋ kumo. Ki sa gaka mezegwel nah ar li Bumbulvuŋ muwuna ɓa a biga vu naŋ a diga.

³Ar zuma ɗaf ngi muguzlum nah, ɗaf misi ˀis ara na, ki zumaka ta. Ki sa gam hin tarnaˀ ar li zuma ɗaf manja ˀis ara, ɓa bo kum kutum kutum ti ruwuy Ezipte na, a so keŋ a hirnga kumo. Kum masa zumaka ɗaf ngi bonoy nah na, ɓa ngi wulka hin ngi bo kum ti ruwuy Ezipte, ar hin ngi siifa kum gar.

⁴Angi hin mitarnaˀ nah na, a hay kum, asi ruwuy kum gar na, anta sa puram hiri ngi ˀis keɗ le ta. Yo useˀ ngi ginew kum masa kiɗaka ti pastaˀ ngi hin mudumbuŋ na, ki wam di vu hã ngi ti prik ta.

⁵Walahay wanaka gar, Bumbulvuŋ Buymisemuŋ kumo muvulukum di le, ɓa ki pam anga na, i li gi muguzlum Pakay tiɗeˀe ta.

⁶Ki sa gaka sey ar walahay naŋ muwuna ngi biga vu naŋ ara na. Ki sa gaka mikuli ti pastaˀ, pas tusse, ar pas naŋ kaslsla kum muboko di ti hirwuy Ezipte vuna.

⁷Ki sa da ka useˀ ngi ginewe, kisa zumaka ar li Bumbulvuŋ Buymisemuŋ kumo muwuna, yo put ti miprik nah, kisa mam ngi hay kumoyo.

⁸Angi hin merkeɗe, kisa zumam ɗaf manja ˀis ara, angi hin mitarnaˀ naŋ na, kisa gam cikil madiɗa ti slimiɗ ngi Bumbulvuŋ Buymisemuŋ kum. Ki gam slra ta.

⁹Moyis a ɓi: Ki sa slufam luuma tarnaˀ, a zli zle avu hin kum masa zlaka nguma daw.

¹⁰A dirba nah, kisa gaka muguzlum Paŋtekoto, ngi hunuma Bumbulvuŋ Buymisemuŋ kum. Ki sa soko ti gwat ngi vulo, ka kum mawuɗam, weˀe avu ɗuwula mi Bumbulvuŋ muɗuwulukum di le.

¹¹Ki sa ram ng'ar li Bumbulvuŋ Buymisemuŋ kumo muwuna le ngi bugukum vu a diga. Ki sa mumulom, kum ati ziri kum mizilehey, mongosohoy, gawla kumoy, beke kum mongosohoy, waɗ levihey misi si ruwuy kumo, mulakay, waɗ mutuhuhoy ati wudigahay misi a wuzla kumo.

¹²Kum zleˀe i bekehey a Ezipte na, wulkaka keŋ kwaɗay. Ki sa jaka ɓimuɗuva tayna a hirnga, joˀ kisa gam taŋ slra.

¹³A dirba kum muɗugoko dawaya le, ki ɗucoko yi ngi gudubuno le na, kisa gam hin tarnaˀ ar li gi muguzlum guɗuko.

¹⁴Ki sa gaka muguzlumo ti mumul, kum ati ziri kum mizile ati mongosohoyo, beke kum mizile ati mongosohoy, waɗ levihey ati mulakay, mutuhuhoy ati wudigahay misi a wuzla kumo.

¹⁵Muguzlum nah na i ngi hunuma Bumbulvuŋ Buymisemuŋ kum, a sa zik hin tarnaˀa. Ki sa gaka ar li Bumbulvuŋ muwuna le. Ki sa mumulom haɗi, asi Bumbulvuŋ a vulukum gwat ngi migamaya le haɗi, yo gwat kum muwuɗam le gar na, ki gaka gu.

¹⁶Vur vi gar na, mizli mizilehey gar, a sa ram is makir ng'ar li muwuna le, a mbuŋ Bumbulvuŋ Buymisemuŋ kum. Muguzlum ngi ɗaf manja is, muguzlum Paŋtekot malla muguzlum ngi guɗuk na, anta sa ram nga mbuŋ Bumbulvuŋ haŋ njoŋ ngatara ta.

¹⁷Amma mbur gar na, a sa vul gwata weˀe avu gidaŋ naŋ, Bumbulvuŋ Buymisemuŋ kumo migaŋ di.

¹⁸Ar walahayay cek Bumbulvuŋ Buymisemuŋ kumo masa vulukum taŋ na, kisa winam migi kiitahay waɗ buyɓihey ar sukwiheye tiɗeˀe, ɓa a sa gaka kiita da mizli kasl kasla.

¹⁹Ki hiryaka kiita ta, kiita a jini muy ta, ki tiɓam gwat avu mizli ngi hirya kiita ta, asi gwat ngatara a hulufo mizli misli wala ngi ɓi kweŋ kweŋheye, yo a so ti malambaˀ da mizli mijeŋŋeheye.

²⁰Ki sa tumom vu ngi gi kiita mijeŋŋe mikpak naŋ wãˀa. Naɓa kisa lumam siifa, yo hirwuy Bumbulvuŋ Buymisemuŋ kumo muvulukum di tuwa, a sa ndir da kum.

²¹Moyis a ɓi: Li gi mikuli kum masa ndiraka da Bumbulvuŋ Buymisemuŋ kumo na, ki ngam kuli ɓamtal malla kuli dum a cikeˀe ta.

²²Kuli ɗugur Bumbulvuŋ mahirsa na, ki ngam kaˀ le vur hirnga kumo ta.