Read South Giziga DEU 17 Bible Online

DEU 17 - South Giziga bible

DEU 17

¹Sla, tumuŋ malla ˀaw mukuy kuy ta, hereweɗ malla misi zluɓ madiɗa ava na, ki gam di mikuli da Bumbulvuŋ Buymisemuŋ kumo ta, asi Bumbulvuŋ a pura na, i malambaˀ muwãˀ naŋ.

²Gwat asinta, pas mekeleme, ar walahay Bumbulvuŋ Buymisemuŋ kumo muvulukum taŋ na, ar pal asi taŋ, mbur zil malla ngwasa, ara gi gwat macira hiri da Bumbulvuŋ ta, ara ngila ɓi ngi jumoˀay naŋ,

³yo ara ru nga huruk huruk a mbuŋ kulihey, ara huruk a mbuŋ kulihey, a mbuŋ pasa, kiya ati gwat ngi muŋhoy gar, i gwatay ya muɓukum, ki huruk hurukam a mbuŋ taŋ ta na,

⁴da mbur ɓukum ɓi misi kahana le, malla ki cinam avu mizli maɓaka na, kisa kaka virzi naŋ kuy kuy. Da a sin le, gwat malambaˀ muwãˀ nah, a gi le asi ruwuy Israyele gisiŋ na,

⁵ko da i mbur zil, ko da i ngwas miga gwat nah na, kisa bam di nga mizlingre ngi walahay, joˀ kisa kuyupoko ti ɗugur.

⁶Mbur migi gwat le ngi kiɗ vagay na, sey da sedewohoy ada cuw malla makir far, sedewo purla na, naŋ muk ta.

⁷Masa zlaka hizig naŋ ti ɗuguro dumbuŋ i sedewohoy, joˀ mizli gar a sa hizigaka ya so. Naɓa ki ɓulaka malambaˀa le ti wuzla kumo.

⁸Moyis a ɓi: Da a kiɗam mbur le vagay, kiɗ misat sat, kiɗ ti waˀa malla tiri mekelem pal kwana, da migi kiita ngir walahaya a gaka kiita nah gu ta na, kisa ram di ng'ar li Bumbulvuŋ Buymisemuŋ kumo muwuna na.

⁹Ki sa ra lumaka masay levihey ati migi kiita misi tapasa: a sa bugukum jiviɗ ngi sli kiita, a bi ani kahana kahana.

¹⁰Ki sa gaka kiita weˀe avu taŋ mubugukum di ar li ngi Bumbulvuŋ muwuna tuwa, kisa gaka tiɗeˀe kaɓa taŋ mudubunukum di vuna.

¹¹Kiita taŋ mubugukum di, taŋ mudubunukum di na, ki ngizlam ava ta, ko ti gula ko ti hazum, ki ngizlam neˀ le ta.

¹²Amma mbur mahuhumo vu naŋ, a ga gwata manja cine mi da masay maga slra naŋ a mbuŋ Bumbulvuŋ Buymisemuŋ kumo, yo a cine mi da migi kiita ta na, kiɗaka mbur nah vagay. Naɓa ki zuɓaka mungra ngi wuzla Israyele le avra.

¹³Mizli gar misa cinaka ɓi nah le na, a sa zluwunam, naɓa ko mbur masa huhumo vu naŋ anta mata.

¹⁴Hirwuy Bumbulvuŋ Buymisemuŋ kumo muvulukum di, da kisa cam le ng'ara, kisa tuɓaka le da kum, ki pam le anga na. Asinta, tapas numuŋ kisa ɓam: «I wuɗam buy madiɗa, kaɓa sukwi ngi mizli mugun hirnga ndra na ya» na,

¹⁵kisa cama sey i mbur Bumbulvuŋ Buymisemuŋ kumo muwuna ti haŋ naŋ. Sey mbur Israyel sukum kum. Mbur mulak, mbur ngir sukwi kum ta na, ki caka ta.

¹⁶Anja na, i mbur misi pilisey haɗa ta ɓula. Anja a slin mizli nga hiɗiko taŋ a hirwuy Ezipte, ɓa pilis naŋhay a gam haɗa ta, asi Bumbulvuŋ a ɓukum na: «ki mam nga hirwuy nah na mata.»

¹⁷Anja i mbur misi ngwasay haɗa ta ma, vur taŋ masa hiryakaŋ mevele, yo anja i mbur misi dala ati ɓiri tapasl tapasl haɗa ta ma.

¹⁸Da naŋ misa cifi le ar buyo na, ɓimuɗuva, masay levihey masa ɓakaŋ di na, a sa tohokoŋ di ng'ar ɗerewol.

¹⁹A sa ndir ɓaˀ a cikeˀe, a sa slufa ar hin ngi siifa naŋ gar, ɓa a dubuna zluwun ti Bumbulvuŋ Buymisemuŋ naŋ, ɓa a ja ɓimujuwahay ati ɓi micicahaya gar, a gi taŋ slra.

²⁰Da kine na, naɓa naŋ anta sa huhumo vu naŋ a mbuŋ sukum naŋhay ta, ko naŋ anta sa kirih tivi ɓimuɗuva neˀ le ta. Joˀ naŋ vuna ati ziri naŋhaya, a sa zikam haɗi ar zumabuy naŋ a wuzla Israyeleye.