Read South Giziga DEU 18 Bible Online

DEU 18 - South Giziga bible

DEU 18

¹Moyis a ɓi: Mas y levihey ati levi mekelemeye, anta sa lumam hirwuyo da taŋ, kaɓa mizli Israyele mekelemeye ta. Gwat ngi zum taŋ, a sa lumam ar mikuli magaka da Bumbulvuŋ waɗ ar gwat mavulakaŋ taŋ mekelemey.

²Leviheye, hirwuy nga taŋ anta a wuzla Israyeleye ta, gwat taŋ malumama, i jiŋ taŋ Bumbulvuŋ muwuna taŋ hĩˀĩ ngi gi gawla naŋ, kaɓa naŋ miɓa taŋ di ɗaˀ le zleˀe.

³Ginewey Israyeley makiɗaka taŋ ngi gi mikuli ngi jumoˀay na, mi ngi masayay ada cah anga, ko sla, malla ˀaw. A sa vulakaŋ taŋ pepere, kwakwala waɗ jofo.

⁴Ki sa vulaka taŋ gwat ngi migam kum mudumbuŋhoyo: daw, mbaazla, mal waɗ ngwic ngi tumuŋ kum maslaka mudumbuŋ ma.

⁵Naŋ kine, a wuzla sukwi Israyel gar na, Bumbulvuŋ a wini di i dideˀ ngi levihey, ɓa a gaka slra taŋ da Bumbulvuŋ vur hin gar.

⁶Da mbur levi a wuɗ le ɓa a pula walahay Israyel, naŋ misi ara, ɓa aru ng'ar li Bumbulvuŋ muwuna na, anja aru kaɓa naŋ muwuɗ le,

⁷anja ara ga slra naŋ da Bumbulvuŋ Buymisemuŋ naŋ a diga zuy, kaɓa levi mekelemey gar midedeŋ ar slra a mbuŋ Bumbulvuŋ na ya.

⁸Gwat ngi zumo, a sa lum rak rak ati levi mekelemeye, mbak gwat naŋ maluma ti gwat ngi hay taŋ, naŋ mahiɗika avra na le.

⁹Da kum misa ndilam le a hirwuy Bumbulvuŋ Buymisemuŋ kumo masa vulukum di na, ki gaka gwat malambaˀ mizli ngi digahay magaka na ta.

¹⁰Iriŋ ngi mizli ani na, anja a lumam pal asi kumo ta: mbur magi mikuli zlam zlam ti mangal naŋ malla zuŋ naŋ mongoso, ko mbur misi ketele, mupura daˀas, muslufa wurzlaŋhay, maɓiɓi ngi mbuŋ malla i mijuri,

¹¹ko muzuwula vu, mihiziga gwat ngi pura jubuɗu, malla maɓam ɓi ati musuɗuk ngi mizli mumucahay na, anja a lumam asi ruwuy kumo ta.

¹²Asi mbur magi gwat nah na gar na, i malambaˀ wãˀ a mbuŋ Bumbulvuŋ. Vurˀe, Bumbulvuŋ Buymisemuŋ kum, a sa ɓula sukwi ngi mizli ngisi hirwuy nah a mbuŋ kumo, asi gwat malambaˀ muwãˀ nah.

¹³Amma kumo, ki jumom le wãˀ ati Bumbulvuŋ Buymisemuŋ kumo.

¹⁴Sukwi ngi mizli kum masa ɓulaka taŋ na, a cinam mi da misi ketelehey ati mupura daˀasay. Bumbulvuŋ Buymisemuŋ kum, a tikukum le ngi gi gwat misi kahana.

¹⁵Bumbulvuŋ Buymisemuŋ kumo a sa slinukum ti mijiviɗ misi kaɓa ya Moyis, mbur ngi wuzla kum, kisa cinakaŋ mi da naŋ so.

¹⁶Gwat kum mucufuɗam avu Bumbulvuŋ Buymisemuŋ kumo a muwã Horep tuwa i nah gisiŋ, tapas kum micikilam na, ki ɓam: «Ndr'anta wuɗam cine ˀay ngi Bumbulvuŋ Buymisemuŋ ndra maɓa ndra ti haŋ naŋ na mata, ndr'anta wuɗam pura vu mihilɓiɓ hana mata, ndr'anta wuɗam muco ta.»

¹⁷Dar Bumbulvuŋ a ɓiy: «taŋ miɓam kanah na kuy haɗa.

¹⁸Ya masa slino taŋ di na, i mijiviɗ misi kaɓa ka vuna, mbur ngisi taŋ. I sa ɓaŋ mingiɓi ɗu gar, yo naŋ kwana, a sa ɓa taŋ ɓi ngi gwat ya masa ɓaŋ taŋ ɗaˀ ɗaˀhay na gar.

¹⁹Da mbur a cine mingiɓi ngi mijiviɗ maɓa ti slimiɗ ɗu na ta na, i ya vuna ti haŋ ɗu masa kutaŋ ti bonoyo.

²⁰Amma da mijiviɗ ɗu, ɓi ya mupulaŋ jiviɗ naŋ ta, a ɓa le gbaˀ, malla ara ɓi ɓi ngi kulihey na, kiɗaka vagay.»

²¹Asinta, kisa ɓam: «Mingiɓi muso tivu Bumbulvuŋ ta vuna, i sa sinaka mbri mbrike kwani?»

²²Na, da mijiviɗ ɗu, a ɓi ɓi le ti slimiɗ nga ya Bumbulvuŋ, da gwat naŋ a gi ta na, naɓa mingiɓi naŋ a so tivu ya ta, mijiviɗ a ɓi di i ɓi ngi huhumo vu naŋ, ko ki zluwunam di ta!