Read South Giziga DEU 19 Bible Online

DEU 19 - South Giziga bible

DEU 19

¹Bumbulvuŋ Buymisemuŋ kum, a sa ngizla sukwi ngi mizli mekelemeye a mbuŋ kumo, ɓa a vulukum hirwuy taŋ da kum. A dirba nah kisa tiɓaka gwat taŋhaya, kisa pam asi ruwuy taŋ, ki cifam ar walahay taŋhay.

²Hirwuy Bumbulvuŋ masa vulukum di da kum na, kisa wunam walahay makir a wuzla taŋ baˀ pal.

³kisa puɗukam bowoloy ar walahay tayna makir taŋ, yo li Bumbulvuŋ Buymisemuŋ kumo muvulukum di da kum tuwa na, ki wuɗkaka taŋ a wuzla makir. Naŋ kine, da mbur a kiɗ hirnga le na, zliv ara lum li ɗum a diga gu.

⁴Mbur mikiɗ hirnga le, ɓa ara ɗum a diga, ɓa a ndir ti siifa na, sey da a kiɗa waˀwaˀ ta, yo a kiɗa ar ɓi ngi kwacay ta ma.

⁵Asinta, da ani mbur a ram ati cil naŋ nga nguma dum. Naŋ manguma dumo na, zlimbe a ji ng'ar cil naŋ tuwa, a kiɗa vagay. Mbur mikiɗ naŋ tuwa, ara ɗum ar walahay pal asi taŋ, ɓa a laha hutuŋ naŋ.

⁶Anja mbur mupula cuwala, a kil aseˀe ti mevel fõh fõh, a jaŋ is, a kiɗa vagay vur jiviɗe naŋ kileŋ si na, a gi ta. Na zle, mbur mikiɗa hirnga nah na, a ndila ngi kiɗ vagaya ta, asi a ja mbur naŋ mikiɗa vuna zleˀe a kwacaya ta.

⁷Vurˀe, i ra ɓukum ɗaˀ le, ɓa ki winam walahay makir ngi ɗum ar taŋ.

⁸Da Bumbulvuŋ Buymisemuŋ kumo, a ska hirwuy kumo le, kaɓa naŋ muhudum zleˀe a mbuŋ dideˀ kumoy, yo a vulukum hirwuy naŋ miɓi a sa vula taŋ di na le,

⁹Na so na, ɓimuɗuva ya muvulukum di dana na, sey da ki jaka le a hirnga, yo ki gam di slra le, ki ra wuɗam Bumbulvuŋ Buymisemuŋ kum, ki ra sipaka jiviɗ naŋ vur hin gar. Akẽh na, kisa wuɗam walahay makir jom ng'avi mimakirey tuwa ma.

¹⁰Naŋ kine, angi hirwuy Bumbulvuŋ Buymisemuŋ kumo masa vulukum di na, anta kiɗaka mbur migi gwat ta a diga ta. Da a gi le kine na, naɓa pumbus naŋ a mbiɗi le nga hirnga kum.

¹¹Amma da mbur aro ti cil naŋ zleˀe a kwacay, ara jiɗaŋ, a diɗ vu ara, a kiɗa hã a mucu, ara ɗum ar walahay pal asi tayna tuwa na,

¹²mizli micawwa ngir walahay naŋ, a sa slinam mizli nga joko di, a sa vulaka da mbur mupula cuwal, a kiɗa vagay.

¹³Ki purakaŋ ircece ta wãˀ. Mbur mikiɗa mbur migi gwat ta na, susuyumoko ti wuzla Israyeleye, naɓa kisa ndiram ar wuya.

¹⁴Moyis a ɓi: Angi hirwuy Bumbulvuŋ Buymisemuŋ kumo masa vulukum di na, a sa vulukum lihey. Kum misa pam le angi hirwuy nah na, maakway mizli mudumbuŋhoy mislukum di le ati midigwi ɗike na, ki kirahaka ta.

¹⁵Moyis a ɓi: Da mbur a kiɗ hirnga le, a gi mungra le malla ko gwat malambaˀ wanaka gar na, sedewo purla naŋ muk ɓa a jaŋ ti kiita ta, sey sedewo cuw malla makir far.

¹⁶Da mbur a gi sedewo le ti slir a gila ɓi madiɗa le da mbur na,

¹⁷taŋ cuw taŋ, a sa ram ng'ar hay ngi Bumbulvuŋ. A sa ɓaka ɓi taŋ a mbuŋ masayay waɗ a mbuŋ migi kiitahay misi tapasa.

¹⁸Migi kiitahay a sa kaka virzi naŋ kuy kuy. Da a lumaka na, sedewo a gi di i slir, a ji di i ɓi ngatara da sukum naŋ na,

¹⁹kisa vulakaŋ dangay misi purla, kaɓa naŋ mawuɗ zleˀe ɓa a vulaka da sukum naŋ na ya. Naɓa ki susuymom malambaˀ le ti wuzla kumo.

²⁰Mizli masa cinaka gwat mucuh na, a sa ga taŋ zluwun, naɓa a sa gam mungra misi kahana, a wuzla kumo mata.

²¹Ko kum anta sa purakaŋ ircece ta. Kiita naŋ a sa gi anihĩ: «siifa a wurkaka ti siifa, hiri ti hiri, sliŋ ti sliŋ, haŋ ti haŋ, yo sara ti sar aya.»