Read South Giziga DEU 20 Bible Online

DEU 20 - South Giziga bible

DEU 20

¹Da ki ra bam nga gi vurum ati mesene kumoy, da ki puram misi pilisey le, mota ngi vurumoy, sojehey le haɗi fineˀ ngi kumoyo na, ki zluwunam ti taŋ ta, asi Bumbulvuŋ Buymisemuŋ kumo mubo ti kum ti ruwuy Ezipte na, naŋ da ati kum.

²Da kum muwam vu le ngi kiɗa vu na, masay a sa ru nga mbuŋ, a sa ɓa mizli:

³«Soje Israyeley, cinam ɗi! ki ra girjaham dana nga kiɗa mesene kumoy. Tumom vu, ki hĩhĩyam ta, ki zluwunam ta, ki gam gigisl ta, ki jijikam a mbuŋ taŋ ta.

⁴Asi Bumbulvuŋ Buymisemuŋ kumo a ro ɓaˀ asi kum, ɓa ki kiɗaka mesene kumoyo bummoˀ, ɓa ki lumam bugawla».

⁵A dirba nah, madiɗa ngi sojehey, a sa ɓaka sojeheye: «Mbur mindir hay nawayaŋ, a hin ara ɗaˀ t'aruŋ na, ada a wuzla kum aka kwa? Anja a mi ngi hay, vur naŋ masa ra muc ar vurumo, naɓa i mbur mekelem masa ci ar hay naŋ na kuy ta.

⁶Mbur migi guva ngi gudubun, a ngil yi naŋ ɗaˀ t'aruŋ na, ada a wuzla kum aka kwa? Anja a mi ngi hay, vur naŋ mara muc ar vurumo, naɓa masa ngila yi naŋ, i mbur mekelem na, kuy ta.

⁷Mbur misi meketeŋ avra, a ɗuvam vu t'aruŋ, ada a wuzla kumo kwa? Anja a mi ngi hay, vur naŋ mara muc ar vurumo, naɓa masa ɗuva meketeŋ naŋ, i mbur mekelem na, kuy ta.»

⁸Madiɗa ngi sojehey, a sa ɓaka mizli ava ma: «Mbur hĩhĩy muzluwun, ada a wuzla kumo kwa? Anja a mi ngi hay, vur naŋ mahĩhĩya sukum naŋhaya ka naŋ na ya.»

⁹Da madiɗa ngi sojehey a kiɗaka mingiɓi taŋ le na, a sa cam buyoy ngi wi sojehey mitaˀ taˀ na.

¹⁰Da kum mira zlaka walahaya le ngi kiɗa vu na, cufuɗaka taŋ, ɓa a zilam mi ti miteˀteˀe.

¹¹Da a zilam mi le, a wunukum mizlingre ngi walahaya le na, taŋ cek a sa hinam hirnga a mbuŋ kumo, a gukum slra mitak ˀay.

¹²Amma da a ngumam ta, a wuɗam di kiɗa vu na, kisa ndahaka walahaya.

¹³Bumbulvuŋ Buymisemuŋ kumo a sa vulukum di asi haŋ kum, joˀ kisa kiɗaka mizli cek ti maslalam.

¹⁴Amma ngwasay, ziri waɗ ginewey ati gwat ngir walahaya gar, kisa ndiram taŋ da kum. Ki sa zumaka gwat kum mutuɓoko taŋ avu mesene kumoyo, asi i Bumbulvuŋ Buymisemuŋ kumo muvulukum taŋ.

¹⁵Walahay mikileŋ kileŋ avu kum, misi i hirwuy kum miwa ta na, kisa gam taŋ kanah so.

¹⁶Amma da i walahay Bumbulvuŋ Buymisemuŋ kumo muvulukum di na, kisa pulam mbur pal le ti siifa ta.

¹⁷Hitihey, Amorihey, Kanaˀanay, Perizihey, Hivihey waɗ Zebusiheye, ngizlaka taŋ pay wãˀ, kaɓa Bumbulvuŋ Buymisemuŋ kumo muɓukum ɗaˀ le na.

¹⁸Ɓa malambaˀ taŋ muwãˀ, taŋ magaka da kuli taŋhay na, a dubunukum di ta. Naɓa a sa hizigiɗukum ngi gi mungra avu Bumbulvuŋ Buymisemuŋ kumo.

¹⁹Da ki zlaka walahaya le ngi kiɗa vu, ki ndahaka le hã ki zikam ɓa kisa tiɓaka na, naɓa widis ngi zumoy misi a diga na, ki ngumaka taŋ avra ta. Asi kisa zumaka yi taŋhaya ɓula, amma ki ngumaka taŋ ta. Na zle widis mikaˀ a ɓuh na, i mbur ɓa ki ra gam vurum ati naŋ makwa?

²⁰Amma da i widis ngi zum ta na, ngumaka avra. Walahay magi vurum ati kum na, kisa ndahaka taŋ ti nah, sey da walahay a hin hirnga le.