Read South Giziga DEU 21 Bible Online

DEU 21 - South Giziga bible

DEU 21

¹Vagay ngi mbur misinaka mikiɗ naŋ ta Angi hirwuy Bumbulvuŋ Buymisemuŋ kumo muvulukum di da kum na, da a lumam mbur mikiɗa le vagay ɓaˀ a ɓuh, a sinaka mbur mikiɗ naŋ vuna ta na,

²mizli micawwa ati migi kiita kumoy, a sa waka li zle avu vagay ngi mburo hã sesẽŋ ar walahay migweˀ gweˀhey, ɓa a sinaka migweˀ i wanaka na.

³A sa sinaka migweˀ i walahay wanaka: mizli micawwa ngir walahay migweˀ nah na, a sa wuɗam sla bulkoŋ, migam di slra ɗaˀ ta, muluwakaŋ galalaŋ ɗaˀ ta.

⁴A sa ram ti bulkoŋ tuwa gweˀ nga mi mizaw misi yam ada nga ndrehhe. Yo a huvaka ˀay didik nah ɗaˀ ta, a zligam gwat ɗaˀ ara ta. A sa murguɗoko ˀay ngi bulkoŋ tuwa, gweˀ a mi mizaw a diga.

⁵Akẽh na, masayay, dideˀ ngi levihey, a sa kirohoko, asi Bumbulvuŋ Buymisemuŋ kumo miwini ngi gaŋ mezegwel, yo ɓa a ɗuwulaka mi da mizli ti slimiɗ naŋ na, i taŋ. Naŋ kine, maɗiyaka ɓi ngi tiri, kiɗa vu ti waˀa gar na, i taŋ.

⁶Mizli micawwa ngir walahay migweˀ tuwa, a sa bunaka haŋhay a mizawa, a hirnga bulkoŋ mumurguɗokoŋ ˀay tuwa.

⁷A sa ɓam na: «I ndra mikiɗaka mbur hana ta, yo hiri ndra a pura gwat mucuh vuna ta ma.

⁸Aw Bumbulvuŋ, pula mungra ngi mizli ka mumbuɗo hirnga taŋ na, mbur mikiɗaka vagay manja a gi gwat na, ki pula zayɓi naŋ ar Israyeley ta.» Dar Buymisemuŋ a sa pula mungra taŋ.

⁹Da kanah na, naɓa ki gam gwat ngi cira hiri le da Bumbulvuŋ, ki cukoko zayɓi ngi vagay ngi mbur nah le ti hirnga kumo.

¹⁰Da kum misa ram le nga gi vurum ati mesene kumoy, da Bumbulvuŋ Buymisemuŋ kumo a vulukum taŋ le asi haŋ kum, yo ki tiram taŋ beke le,

¹¹da mbur a pur ngwas mezle le asi taŋ, a hĩyã le ɓa a zuɓa ngi ngwas na,

¹²a sa ru di ngi hay naŋ. Ngwas tuwa, a sa hija hirnga, a sa sla zlenekeye,

¹³a sa cuko zana mijakaŋ zleˀe ti naŋ ng'ar beke na, a ki mekelem, a ndir a hay mbur nah. A sa tuwa cine ati mumuŋ kiya pal ɗagay, a dirba nah so na, mbur tuwa, a sa zuɓaŋ, a ɗuvaŋ.

¹⁴Da nga mbuŋ, a ciraŋ hiri mata na, a sa pulaŋ, aru ka naŋ mawuɗo. N'anta ti jiviɗ ngi hiɗik di dala ta, yo a gi di beke gu ta ma, asi a gi di ngwas le zleˀe.

¹⁵Da kaɓa ani, mburo naŋ ti ngwas cuw, a wuɗ mekeleme fineˀ numuŋ. Ngwasay tuwa, a yam mizilehey le cuw taŋ, amma modogomo i ngi ngwas naŋ mawuɗ geˀ preˀ tuwa.

¹⁶Tapas naŋ mira wunka zlili naŋ da ziri naŋhay na, a vula zlili mavulaka da modogomo, da mangal ngi kukwa? naŋ tuwa, mbak modogom mijeŋŋe, mangal ngi ngwas naŋ mawuɗ ta tuwa na, jiviɗe anta.

¹⁷Mangal ngi ngwas naŋ mawuɗ ta tuwa na, anja cine a si na i modogom naŋ, a vulaŋ zlili naŋ gar makaw cuw jaka. Asi mangal micikiɗeffe ngi gawla naŋ, i naŋ. Gwat mavulaka da modogom nah na inga naŋ.

¹⁸Da kaɓa ni, mburo naŋ da ti mangal magi lambaˀ lambaˀ, maslikiɗ ɓi. Da miyi naŋhay ara kutakaŋ kwana, anta cine taŋ mi ta na,

¹⁹miyi naŋhay a sa jakaŋ, a sa ram di ng'ar kiita, a mbuŋ mizli micawwahay, a mizlingre ngi walahay taŋ.

²⁰A sa ɓaka micawwahaya na: «Mangal ndra hana, a gi lambaˀ lambaˀ, a slikiɗ ɓi, naŋ anta ki slimiɗ ar ɓi ndra maɓakaŋ di na ta. A zum haɗa, yo a si mbaazla haɗa».

²¹Akẽh na, mizli ngir walahaya, a sa kuyupoko ti ɗugur, a mucu. Naɓa ki kirahaka malambaˀa le ti wuzla kumo. Mizli Israyeley gar misa cinaka ɓi nah le na, a sa ga taŋ zluwun.

²²Da kaɓa ni, mbur a gi gwat le, a ndila le ngi kiɗ vagay. Ki kiɗaka le, a dirba nah, ki luwaka vagay nah law avu widis na

²³anja vagay naŋ a hin law ar widise ta, sey ki dikaka kalla, asi vagay ngi mbur milaw na, a so ti nis ngi Bumbulvuŋ ng'asi ruwuyo. Ki sa soko ti dili ng'asi ruwuy Bumbulvuŋ Buymisemuŋ kumo muvulukum di na ta.