Read South Giziga DEU 22 Bible Online

DEU 22 - South Giziga bible

DEU 22

¹Da ki puram sla le, tumuŋ malla ˀaw ngi sukum kum le, ara liˀi kiŋ kiŋ lambaˀ na, ki pulaka a cuh ta, a ram di da sukum kumo.

²Da hay ngi sukum kum nah vuna naŋ kileŋ, malla ki sinakaŋ ta na, kisa jaka ginewe kaw ngi hay kum, hã sukum kumo, a sa luuma avu kumo.

³Da ko ki lumam i zungu naŋ, zana malla gwat wanaka gar na, kisa gaka kanah vuna si. Jiviɗ anta ngi pul naŋ fuko ta.

⁴Da ki lumaka sukum kumo, zungu naŋ malla sla naŋ a diɗ le a jiviɗ na, kisa pulakaŋ mbak a gi di pal naŋ ta, jinakaŋ ar li slikiɗ naŋ.

⁵Ngwasa, naŋ anta ti jiviɗ ngi ki zana ngi zileye ta. Zile kwana, naŋ anta ti jiviɗ ngi ki zana ngi ngwasaya ta ya. Mbur miga le kanah na, naŋ kuyta wãˀ a mbuŋ Bumbulvuŋ Buymisemuŋ kumo.

⁶Da ki lumam hay i ɗiyuw le a jiviɗ, ar widis malla a ruwuy, mumuŋ taŋ a ro huruk ar tesle, malla ar ziri na, ki hilaka zirie jom ti mumuŋ taŋ ta.

⁷Hila ziri, pula mumuŋ taŋ a cuhu. Naɓa kisa ndiram ar wuya, yo kisa zik haɗa ar siifa ma.

⁸Da ki ra ndiram hay nawaya na, ka midika hirnga nah le dak dak na, ndira mivay naŋ gun gun ti mohol. Da mbur a diɗo le ti ra, a muc le na, zayɓi naŋ a cukum ta.

⁹Ki zligam gwat mekelem ar guva ngi gudubun kumoyo ta. Da ki zligam le na, gwat ngir guvahaya gar a ndiram da Buymisemuŋ, gwat kum mizligaka vuna, waɗ yi ngi gudubuno ma.

¹⁰Ki huvam ti sla ati zungu jom ar gam purla ta.

¹¹Ki kam zana mija ti ngwic ngi tumuŋ waɗ gugumay mislirkeɗ lahaɗa ta.

¹²Zana kum magijuwaka avu vu na, kisa tufam gwat loŋ loŋ avu mivay naŋhay mira kiɗam mi mufaɗ taŋ.

¹³Kaɓa a ni da mbur a zuɓ ngwas a ɗuva le, a zla a wuɗ mata.

¹⁴A hiryaŋ ti ɓi malambaˀ aka aka, yo a jaŋ ɓi ngi sulome, a ɓi: «I zuɓa ngwas hana, ya mihin di na, i luuma naŋ ngbuˀo ta.»

¹⁵Da a gi le kine na, cine ati mumuŋ ngi zuŋ, a sa zuɓaka gwat mabiga zuŋ taŋ naŋ ngbuˀo na, a ram di ng'avi mizli micawwahay misi a mizlingre ngi walahaya.

¹⁶Cine ngi zuŋ a sa ɓa mizli micawwahaya: «hana i zuŋ ɗu, i vula da mbur hana ngi ngwas a zla a wuɗ zuŋ ɗu mata.

¹⁷Ani ara kupaŋ ɓi ngi sulome, a ɓiy: I luuma zuŋ ɗike ngbuˀo ta. Na puraka gwat mabiga zuŋ ɗu naŋ ngbuˀo na, n'anihĩ!» Zana misi pumbus ava, taŋ mihinam di duvuɗ mudumbuŋ na, miyi ngi zuŋhoy a sa puskaka a mbuŋ mizli micawwa ngir walahaya.

¹⁸Mizli micawwa ngir walahaya, a sa jaka mbur tuwa, a sa kutakaŋ ti bonoy.

¹⁹A sa gakaŋ kiita, ɓa a wuruk suloy skat, a sa vulaka da cine ngi zuŋ tuwa, asi mbur hana, a ɓi ɓi malambaˀ le ar zuŋ Israyel mungbuˀo kine. A sa ndir i ngwas naŋ ar siifa naŋ gar, a ɓula gu mata.

²⁰Amma da ɓi ngi mbur nah, naŋ jeŋ gisiŋ, a luuma zuŋ, naŋ ngbuˀo ta gisiŋ na,

²¹a sa ram ti zuŋ nga mizlingre cine, mizli ngir walahaya, a sa kuyupoko ti ɗugur, hã a mucu. Naɓa ki zuɓaka malambaˀa le ti wuzla kum avra. Asi naŋ misina zil zle a hay cine na, a gi gwat ngi mesem le asi ruwuy Israyele.

²²Da a lumam mbur le kasl ar li hin ti ngwas misi zil na, a sa kiɗaka taŋ vagay vagay cuw taŋ, ngwas ati zile. Naɓa ki zuɓaka malambaˀa le avra asi ruwuy Israyele.

²³Da zuŋ diili mungbuˀo, mujuwa sara le. A zliram ati mbur mekelem ar walahay, a hin di le na,

²⁴kisa ram taŋ cuw taŋ nga mizlingre ngi walahay, kisa kuyupoko taŋ ti ɗugur hã a micam. Zuŋ a sa lum muc na, vur naŋ ar walahay ngbaŋ, amma a widi ta. Yo mbur mizile kwana, asi naŋ mihin ti ngwas, mbur mekelem mujuwa sar naŋ le. Naɓa ki ɓulaka malambaˀa le avra ti wuzla kumo.

²⁵Amma zuŋ diili mujuwa sara le, da mburo a luuma a ɓuh, a ja a hin di le na, a sa kiɗam vagay i mbur zil mihin di na pal naŋ.

²⁶Ki wusaka zuŋ diile ta, asi a gi mungra mindila ngi kiɗ naŋ vagaya ta. Naŋ kine, da mbur a slikiɗ le badam ti sukum naŋ, a kiɗa le vagay na, i jiviɗ misi purla ati ɓi hana vuna ya.

²⁷Zuŋ diili mujuwa sar le tuwa naŋ a ɓuh, a widi le ngbaŋ, ko mbur mukulo widi naŋ anta.

²⁸Da mbur a zlir le ti zuŋ diili mungbuˀo, a juwaka sar naŋ ta, a ja, a hin di le, yo a lumaka taŋ le kasl na,

²⁹naɓa mbur mihin ti zuŋ diili tuwa, a sa vul suloy kukur zlum da cine ngi zuŋ vuna, asi a gi di ngwas le. Zuŋ a sa ndir i ngwas naŋ ar hin ngi siifa naŋ gar, a ɓula gu mata.