Read South Giziga DEU 23 Bible Online

DEU 23 - South Giziga bible

DEU 23

¹Anja mbur a hin ti ngwas ngi cine ta, naɓa a wus di i gwat ngi cine.

²Mbur munguɗo, malla mislirakaŋ mbuŋ le na, anta sa ci nga wuzla kus ngi mizli ngi Bumbulvuŋhoyo ta.

³Mbur miyaka ti madama, a ci nga wuzla kus ngi mizli ngi Bumbulvuŋhoyo ta. Ko tizer naŋ dideˀ dideˀ kuruˀ kwana, a ci ta na si.

⁴Mizli Amoŋhoy ati Moˀapay, a sa cam nga wuzla mizli miteŋteŋ ngi Bumbulvuŋhoyo ta ndiɗaˀ wãˀ. Ko tizer taŋ dideˀ dideˀ kuruˀ kwana, a cam ta na si.

⁵Naŋ kine, asi ti kum maboko ti ruwuy Ezipte na, mizli tayna a sukum ti ɗaf ati yam nga jiviɗe ta. A ziloko baɗ ti Petor, hirwuy Mezopotami vay muŋ, Balaˀam mbur mupura daˀas, mangal ngi Behor, a vulaka taŋ dala ɓa a nisukum jaka.

⁶Amma Bumbulvuŋ Buymisemuŋ kum, a ngum cine ɓi ngi Balaˀama ta. Bumbulvuŋ Buymisemuŋ kumo a mbuɗukum nise ti ɗuwula mi na, asi naŋ mawuɗ kum.

⁷Ar hin ngi siifa kum gar na, vur sukwi ngi mizli mucuw tayna, gwat ngi lum taŋ malla taŋ misi ar wuya na, ko ki kam slimiɗ ar taŋ ta.

⁸Ki puraka Edomoyo ka mizli malambaˀ muwãˀhay ta, asi i sukum kumoy. Ki puraka Ezipteheye ka mizli malambaˀ muwãˀhay ta, asi ki gam moholoy le ɗaˀ asi ruwuy taŋ.

⁹Sukwi ngi mizli mucuw tayna, dideˀ taŋ ngi poprokoy makir na, a sa cam nga wuzla kus ngi mizli ngi Bumbulvuŋhoyo zuy ɓula.

¹⁰Ti kum masaram nga gi vurum ati mesene kumoy, yo da ki ra ng'aka guɗuk kumoyo na, jam lesl avu gwat malambaˀa.

¹¹Da mbur pal a wuzla soje kumoy, a ci le ar dili , a musuwun ngi duvuɗo, vu a pi le na, a bi tir walahaya ng'avra, a cifi ti vra ɗagay.

¹²Da pastaˀ a gi le na, a bun ceɗ ceɗ, yo pas mira diɗ na, a walahaya muduba so.

¹³Ki sa wuɗam li baˀ avu walahaya, ki ra mucaka kwanaya a diga.

¹⁴Soje gar na, a wuɗ gwat ngi li li ɓaˀ le a wuzla gwat naŋhaya, da naŋ misa buˀ le baˀ na, a sa la li ngi taha zaya ti naŋ, a dika ti naŋ.

¹⁵Walahay kumo, i walahay mipal, asi Bumbulvuŋ Buymisemuŋ kumo ara liˀi ara, ɓa ara jiginukum, yo ɓa a vulukum bugawla a hirnga mesene kumoy. Naŋ kine, da a pur li munjukusloɓ le na, anta sa cifi avu kumo mata.

¹⁶Da mbur beke a kilo le ti hay buy naŋ, a sa ɗum le a ruwuy kum na, ki mam di da buy naŋ ta.

¹⁷Anja a pa haya a wuzla kum, ar li naŋ muwuɗ le, ar walahay kum naŋ hĩhĩy le. Ki guzuvurakaŋ ta.

¹⁸Madama mizli magaka ar sipa jiviɗ taŋ na, asi kum Israyeleye, anja ko mbur pal asi kum magi anta, ko ngwas, ko zil.

¹⁹Ɓa ngi ji mi ar hay ngi Bumbulvuŋ Buymisemuŋ kumo na, ko ki ram ti dala miluma ti gi madama malla dala mihiɗikam di kiri ta, asi taŋ cuw taŋ i gwat malambaˀ muwãˀhay a mbuŋ Bumbulvuŋ.

²⁰Da ki vulam duvus le da sukum kumo, dala, gwat ngi zum malla ko gwat wanaka gar na, ki cufuɗam yam anga neˀ ta.

²¹Ki vulam duvus ngi yam da mulaka zuy ɓula, amma ki vulam da sukum kumo ta, ɓa Bumbulvuŋ Buymisemuŋ kumo a sa ɗuwulukum mi angi gwat ngi gi kum gar, angi hirwuy kum masa cam anga ɓa a ndir da kum na.

²²Da ki ɓam le i vulam gwat ngi ji mi ngi Bumbulvuŋ Buymisemuŋ kumo na, ki murom di ta. Da kine na, Bumbulvuŋ a sa cufuɗukum hirdam hirdam, naɓa ki gam mungra le.

²³Da ki pulaka ji mi ngi Bumbulvuŋ le teˀ na, i mungra ta ɓula.

²⁴Amma da ki ɓam le: ki vulam gwat ngi ji mi ngi Bumbulvuŋ na, gaka cummo. Gaka gwata weˀe avu mingiɓi kum miɓaka ɗaˀ le da Bumbulvuŋ Buymisemuŋ kumo.

²⁵Da ki ci le ar guva ngi gudubun ngi mbur na, ki zum yi naŋ, kaɓa ka mawuɗo, hã ki mbi, amma jiviɗ anta, ɓa ki ngila ar gabal ngi haya ta.

²⁶Naŋ kine ma, da ki ci le ar guva ngi daw ngi mbur na, ki ngil ɓuluˀ ɓuluˀ a haŋ na zuy, amma ki zuɓ slagway ta.