Read South Giziga DEU 24 Bible Online

DEU 24 - South Giziga bible

DEU 24

¹Da kaɓa ani, mbur a zuɓ ngwas a sa zla a wuɗ mata, asi a pur gwat ngi mbiɗaŋ hirnga le ava. Kanah na, a tohoŋ ɗerewol ngi ɓula ngwasa toh toh, a vulaŋ di, a ɓula ti hay naŋ avra.

²Naŋ ngwas tuwa mibi le ti hay naŋ na, a zuɓ zil mekelem.

³Da mbur naŋ muzuɓa tuwa, a wuɗ mata ma na, a tohoŋ ɗerewol ngi ɓula ngwasa toh toh, a vulaŋ di, a ɓula ti hay naŋ avra. Malla ta, mbur vuna, a muc le ti mucu,

⁴ko da i muɓula ti ɓul, malla ko da zil naŋ a muc ti muc kwana, zil naŋ muɓula mudumbuŋ na, a zuɓa ngi ngwasa mata, asi a gi le ava, i ngwas misi dili. Bumbulvuŋ a sa pura i gwat malambaˀ muwãˀ naŋ. Hirwuy Bumbulvuŋ Buymisemuŋ kumo muvulukum di da kum na, anja ki gam mungra ara ta.

⁵Da mbur a zuɓ ngwas le wureˀ na, anja aru ng'ar soje ta, anta vulakaŋ slra mekelem ta. Amma a sa pulakaŋ mbak a haya ngi vi pal, ɓa a ga gwat ngi cira hiri da ngwas naŋ muzuɓa na.

⁶Da mbur ara jikuw ngurvuŋ malla zingaˀ ngi ngurvuŋ na, ki tiɓa ta, kite a jikuw di na, i gwat naŋ mangir di ar siifa naŋ.

⁷Da mbur Israyel a ji sukum naŋ le, ɓa a gi di beke malla a hiɗika avra na, sey a kiɗaka vagay. Kite ki zuɓaka mungra misi a wuzla kumo le avra.

⁸Jam lesl avu sukwi ngi jiji ngi kukulahaya. Ɓi ya miɓa da masay levihey, ɓa a ɓukum di na, singilaka ɓi nah kuy kuy ɓa ki gam di slra.

⁹Gwat Bumbulvuŋ Buymisemuŋ kumo miga da Miriyam, ti kum misi a jiviɗ, kum maboko ti Ezipte na, wulkaka ayɗi.

¹⁰Da mbur a didiɗ gwat le avu kum, ko i gwat wanaka gar, da ki vulakaŋ di le na, ki cam ngi hay naŋ, ɓa ki ra zuɓam gwat ngi jik jak le ar deɗe ta.

¹¹Ki sa cici deŋ avra, mbur mididiɗa gwat vuna, a sa buw ti gwat ngi jike ng'avra.

¹²Da i mbur misi murga na, ki hinam ti gwat naŋ mujukuw di vuna a hay kumo ta.

¹³Pas mira diɗ na, ki makaŋ ti zana naŋ mijika vuna, ɓa a sa hin ti zana naŋ avu vu, a sa ɗuwulukum mi, yo Bumbulvuŋ Buymisemuŋ kumo a sa pura, ki gam gwat mezle le.

¹⁴Mbur misi murga migeˀ ircece le, ko i sukum kum, i mbur mulak, ko mbur ngisi ruwuy kum, malla da ko mbur ngir walahay kum, ara gi slra avu kum ɓa ki wurkakaŋ na, ki zumakaŋ ta.

¹⁵Vulakaŋ migir naŋ vur hin gar, manja pas a diɗi. Asi naŋ i mbur migeˀ ircece, yo ara kutuko migir naŋ ti yam ar gojogoɗo. Da kanah ta na, a sa tuwuy ti ka a mbuŋ Bumbulvuŋ, kite ki gi mungra le.

¹⁶Da ziri a gam mungra le na, anta kiɗam vagay ar deɗe taŋ, i miyi taŋhaya ta, yo da miyi ziri a gam mungra le ya kwana, anta kiɗam vagay ar deɗe taŋ, i ziri taŋhaya ta ya. A kiɗaka mburo vagay na, asi mungra naŋ miga ti haŋ naŋ.

¹⁷Kiita ngi mbur mulak malla mutuhu na, ki hiryaka ta. Ki tiɓaka zana ngi ngwas wudiga majikuw di ta.

¹⁸Wulukam keŋ ɗi, kum zleˀe i bekehey a Ezipte, yo Bumbulvuŋ Buymisemuŋ kumo a mbuɗo hirnga kumo le. Ya maɓukum ɗaˀ le, ɓa ki gam slra ti ɓi nah na vurˀe.

¹⁹Da ki ra njikoko gwataya, da ki puyukom hirnga le ti mizer purla ar guva na, ki mam nga hilo di ta, kisa pulaka da moholoyoy, mutuhuhoy waɗ wudigahay. Dar Bumbulvuŋ Buymisemuŋ kumo a sa ɗuwulukum mi ar gwat ngi gi kum gar.

²⁰Naŋ kine ma, da ki ra ngilaka yi ngi tutumburoyo na, ki gaka holok naŋ ta. Holok nah a sa ndir da moholoyoy, mutuhuhoy waɗ wudigahay.

²¹Da ki ra slaka yi ngi gudubun kumoyo na, ki gaka holok naŋ ta, holok naŋ da moholoyoy, mutuhuhoy waɗ wudigahay.

²²Anja ki wulkam keŋ, kum zleˀe i bekehey a Ezipte. Ya maɓukum ɗaˀ le, ɓa ki gam slra ti ɓi nah na vurˀe.