Read South Giziga DEU 25 Bible Online

DEU 25 - South Giziga bible

DEU 25

¹Da kaɓa ani, mizli Israyeley cuw a tiram le. A ram le nga mbuŋ migi kiitahay, ɓa a gaka taŋ kiita. A lumaka na, mbur mekelem a zluɓa ta, numuŋ a zluɓa le.

²Da mbur muzluɓa tuwa, a ndila le ngi kuti ti laway na, migi kiita a sa ɓi ɓa a hinaka tup a ruwuy mur naŋ, a kiɗaka weˀe avu mungra naŋ migaŋ.

³Na zle, naŋ anta funa laway kukur mufaɗa ta, asi da a tuwuɗa le na, a sa ngaŋ waˀa madiɗaŋ. Naɓa a mihiri kumo, i mesem avu sukum kumo.

⁴Sla maɗug daw na, ki caŋ taɓak a mi ta.

⁵Mizli sukumuŋhoy cuw, taŋ arleˀe. Da purla asi taŋ a muc le, a pul mangal ta na, ngwas ngi mbur vagay tuwa, anta a sliˀi mbur mekelem a diga ta. Zubay naŋ a ngila kaɓa mangilam ngwas ngi sukumuŋ.

⁶Mangal naŋ masa ya mudumbuŋ na, a sa zilaka ti slimiɗ ngi sukum naŋ mumuc na, ɓa slimiɗ ngi sukum naŋ, a kiɗ asi ruwuy Israyele ta.

⁷Da mbur a ngum ngila zubay naŋ ta na, ngwas a sa bi ng'avi mizli micawwahay a mizlingre ngi walahay, a sa ɓa taŋ: «Zubay ɗu a ngum ɓa slimiɗ ngi vagay ngi sukum naŋ a ndir asi ruwuy Israyele ta, a ngum ngiliy kaɓa mangilam ngwas ngi sukumuŋ ta».

⁸Mizli micawwa ngir walahaya, a sa zilakaŋ, a sa cufuɗakaŋ deŋ a mbuŋ taŋ. Da a mbiɗa le: «y'anta wuɗ ngila zubay ɗu na ta» na,

⁹akẽh, zubay naŋ tuwa, a sa girjih ng'avaŋ, a mbuŋ mizli micawwahaya. A sa cukoŋ tarak avra, a sa tufaŋ tazlay nga mihiri, joˀ, a sa ɓi: «Mbur mangum ngila ngwas ngi sukum naŋ, ɓa a yi ar deɗe ngi sukum naŋ ta na, a gakaŋ di kahana so».

¹⁰Zle tapasa, angi hirwuy Israyele, a sa zilaka hay ngi mbur nah, «hay ngi mbur manja tarak.»

¹¹Da kaɓa ani, mizli ziley cuw ara kiɗam vu. Ngwas ngi mbur mekeleme, a ndilawa, ɓa a tuɓa zil naŋ avu cil naŋ. Da a ska haŋ, a ja mbuŋ ngi mbur numuŋ tuwa le na,

¹²ki bukoko haŋ ngi ngwas nah manja puraŋ ircece.

¹³Ki wuɗam kilo wal wal cuw, madiɗaŋ ati meciɗek ar gabal kumoyo ta.

¹⁴Ki wuɗam agwada wal wal cuw, madiɗaŋ ati meciɗek a hay kumoyo ta ma.

¹⁵Ki wuɗam kilo mawa gwata kaslsla, yo agwada mikaslsla. Kanah na, naɓa kisa zikam haɗi a ruwuy Bumbulvuŋ Buymisemuŋ kumo mavulukum di tuwa.

¹⁶Asi mbur gar maga kahana, mbur magi gwat mijeŋ ta gar na, Bumbulvuŋ Buymisemuŋ kumo a puraŋ i malambaˀ muwãˀ naŋ.

¹⁷Ti kum maboko zleˀe ti Ezipte, kum misi a jiviɗ aruŋ na, gwat mizli Amalekey mugukum di na, wulkaka keŋayɗi.

¹⁸Ko a zluwunam ti Bumbulvuŋ ta, hã a kutukukum njiɓaŋŋa a jiviɗe. Ti di nah na, naɓa ki giram le kupuyah kupuyah wãˀ, joˀ taŋ a kiɗaka mizli ngi dirbahaya.

¹⁹Angi hirwuy Bumbulvuŋ Buymisemuŋ kumo mavulukum di da kum na, da a sa vulukum musuka vu le avu mesene kumoy mugun hirnga kum na le na, kisa ngizlaka Amalekey pay asi gazlavay kurzluˀ gar, ɓa ko mbur mawuluk, Amalekey ada zleˀe asi ruwuyo na, anta. Ki puyukom hirnga ta so.