Read South Giziga DEU 26 Bible Online

DEU 26 - South Giziga bible

DEU 26

¹Ti kum misa cam le nga hirwuy Bumbulvuŋ Buymisemuŋ kumo muvulukum di, ki tiɓaka da kum, yo ki pam le anga na,

²mbur gar a sa wuɗ avu gwat micikiɗeffe ngi mi gam, naŋ muhuva angi hirwuy Bumbulvuŋ muvulaŋ di tuwa. A sa pa sek ar lelek, a sa ru di ng'ar li Bumbulvuŋ Buymisemuŋ kumo muwuna, ɓa ngi biga vu naŋ a diga.

³Mbur gar a sa ru ng'avi masay misi tapasa, a sa ɓaŋ: «I ɓa dana a mbuŋ Bumbulvuŋ Buymisemuŋ ɗik, hirwuy naŋ miɓa ti hudum da dideˀ ndrahay, a sa vula ndra di na, i ndilo le anga muduba.»

⁴Masay, a sa tiɓa leleke ti haŋ mbur tuwa, a sa ɗuva taˀ a mbuŋ li gi mikuli ngi Bumbulvuŋ Buymisemuŋ kumo.

⁵Dar mbur muso ti lelek tuwa, a sa ɓi a mbuŋ Bumbulvuŋ: «Dideˀ ɗu zleˀe i mbur A ram misi ar sar. Aru nga Ezipte, a cifi moholoy a diga waɗ mizli neˀkini aseˀeŋ. A dirba nah, a tiram sukwi madiɗa, migidaŋ haɗi, yo kweslekwesle.

⁶Amma Eziptehey a guzuvuram ndra, a vusom ndra vus vus, a gam ti ndra beke muwãˀ naŋ.

⁷Dar ndr'i tilaka mi da Bumbulvuŋ, Buymisemuŋ ngi dideˀ ndraˀahaya, a cine widi ndra. A pura na, ara gam ndra bonoy, ara kiɗam ndra, ara guzuvuram ndra.

⁸Bumbulvuŋ a bo ti ndra ti ruwuy Ezipte ti haŋ naŋ migidaŋ, ti hirbazla naŋ paɗ a muŋ, a ga zluwun da mizli haɗi, waɗ a gi cekenehey ati gwat migam ɗaˀ tahay.

⁹A kiso ndra hã sesẽŋ aka, a vula ndra hirwuy misi ɗuwa ati mam maɓulom anga hana.

¹⁰Yo wurenna, i ra so ti gwat ngi migam mudumbuŋ ngi hirwuy Bumbulvuŋ muvuliy di na. Mbur tuwa, a sa ɗuva gwat naŋ muso di taˀ a mbuŋ guɗuk ngi Bumbulvuŋ Buymisemuŋ, a sa huruk huruk a hirwuy, a mbuŋ Bumbulvuŋ Buymisemuŋ kumo.»

¹¹A dirba nah, kisa ndiram ar wuya ati levihey waɗ mulakay misi a hay kumo, kisa mumulom ati hay kumoy gar asi gwat mezlehey gar Bumbulvuŋ Buymisemuŋ kumo mugukum taŋ na.

¹²Vi mimakir naŋ, i vi ngi vula mukuruˀ ngi gwat. Da ka misa ngica mukuruˀ ngi gwat ngi migam ɗikeye le gar na, kisa vula da levihey, da mulakay, mutuhuhoy waɗ da wudigahay. Ɓa a lumam gwat ngi zum ar walahaya hã a mbam.

¹³Dar kisa ɓam a mbuŋ Bumbulvuŋ Buymisemuŋ kumo na: «Gwat, ya mingica ngac a hay ɗu vur ka na, i vula le da levihey, da mulakay, da mutuhuhoy waɗ da wudigahay, kaɓa ka miɓa ndradi ɗaˀ le vuna. Ko i ngila ɓimuɗuva ɗike ta, i puyuk di hirnga ta.

¹⁴Ya muro ti hiriyi, gwat mingac weˀ di vu vur ka na, i zuma ɗaˀ ta. I zuɓ ɗaˀ anga, vur ɓi ngi dili ta, i vul ɗaˀ ngi gi mezegwel ngi vagayay ta. I cine mingiɓi ɗik ka Bumbulvuŋ Buymisemuŋ le, i ga gwata kaɓa ka miɓiy di ɗaˀ le vuna cummo.

¹⁵Puro hiri ti muŋ, tir li cifi ɗik mihĩˀĩ, tir birngiŋ, ɗuwula mi da Israyel mizli ɗikeye, waɗ da hirwuy ka muvula ndra di, ka miɓa ti hudum da dideˀ ndrahay na. I hirwuy misi ɗuwa ati mam maɓulom ara.»

¹⁶Dana, Bumbulvuŋ Buymisemuŋ kum, ara ɓukum ɗaˀ ɗaˀ, ɓa ki gam slra ti ɓimujuwahay ati ɓi ngi sirik naŋhaya: Ki sa jaka taŋ a hirnga kuy kuy, yo ki gam taŋ slra ti mevel purla, yo ti membezleŋ ngi vu kum wãˀ.

¹⁷Ki tiɓaka le dana, Bumbulvuŋ a ɓi: A tiri Buymisemuŋ kumo le, ɓa kumo kwana, ki sipaka jiviɗ naŋ, ɓi mujuwa naŋhay, ɓimuɗuva naŋhay waɗ ɓi ngi sirik naŋhaya, ki jaka taŋ gar a hirnga, yo ki cinaka mingiɓi naŋ.

¹⁸Naŋ kwana, a ga le ɓa kumo ki ɓam: ki tiram mizli naŋ mihĩˀĩhey le, kaɓa naŋ muɓukum di ɗaˀ le zleˀe tuwa, joˀ ki sipaka ɓimuɗuva naŋhaya gar.

¹⁹Naŋ kine, Bumbulvuŋ Buymisemuŋ kumo a wuɗ ɓa ki tiram mudumbuŋhoy a wuzla sukwi ngi mizli naŋ miga taŋ gar, ki tiram mizli misi ti dudokoy, slimiɗ kumo a zil, mizli mindilaka le. Ɓa ki tiram sukwi nga naŋ mihĩˀĩ, kaɓa naŋ miɓa ɗaˀ le zleˀe tuwa.