Read South Giziga DEU 27 Bible Online

DEU 27 - South Giziga bible

DEU 27

¹Moyis ati mizli micawwa ngi Israyeleye, a ɓaka mizli ɗaˀ ɗaˀ ani: «Ɓimuɗuvahay ya maɓukum taŋ dana ani na, jaka taŋ gar a hirnga.

²Tapas kum masa tuwuɗaka mizaw Zurdeŋ, ɓa ngi ci nga hirwuy Bumbulvuŋ Buymisemuŋ kumo muvulukum di na, kisa wuɗam ɗugur madiɗahay, kisa ng'aka taŋ kaˀ kaˀ, waɗ burkoɗok kor kor avu taŋ.

³Kum mutuwuɗaka Zurdeŋ le si na, ki tohoko mingiɓi ngir ɓimujuwahaya cek ar ɗuguroy tuwa. Naɓa kisa cam nga hirwuy misi ɗuwa ati mam maɓulom anga, hirwuy Bumbulvuŋ Buymisemuŋ kumo miɓa ɗaˀ le zleˀe da dideˀ kumoy tuwa.

⁴Yawwa, da kum misa tuwuɗaka Zurdeŋ le si na, kisa ng'aka ɗugur tayna kaˀ kaˀ a muwã Garizim, kaɓa ya muɓukum di ani na, joˀ ki puyaka taŋ burkoɗok kor kor.

⁵A dirba nah, kisa ndiram li gi mikuli da Bumbulvuŋ Buymisemuŋ kumo, kisa ndiraka ar li nah vuna ma, ti ɗugur misi ɓiri a wusa vrek le ɗaˀ ta.

⁶Ki sa ndiraka sey ti ɗugur manja busl. Ki sa gaka mikuli mizlam zlam wãˀ da Bumbulvuŋ Buymisemuŋ kumo anga.

⁷Ki sa gakaŋ mikuli ngi jumoˀay anga ma, ki zumaka daˀ akẽh, dar ki mumulom a mbuŋ Bumbulvuŋ Buymisemuŋ kumo.

⁸Ki sa toho mingiɓi ngir ɓimujuwahaya cek nguɗ nguɗ ar ɗuguroy tuwa. Toho foh foh, ɓa a pur kaɗaŋ kaɗaŋ.»

⁹Dar Moyis ati masay leviheye, a ɓaka mizli Israyele gar ani ma: «Taˀaka mi, cinam ɗi! Bumbulvuŋ Buymisemuŋ kum, a tiri ti kum mizli nga naŋhay le dana.

¹⁰Cinakaŋ mi so, gam slra ti ɓimuɗuva naŋhay ati ɓimujuwa naŋhay, ya maɓukum t'ani dana na.»

¹¹Tapasa kalla, Moyis a ɓa t'ani ɗaˀ ɗaˀ:

¹²«Da kum misa tuwuɗaka Zurdeŋ le na, sukwi ngi Simeyoŋ, Levi, Zuda, Isakar, Zozef waɗ sukwi ngi Benjameŋ na, a sa cicam dedeŋ a muwã Garizim, ɓa a ɗuwulaka mi da mizli.

¹³Sukwi ngi Ruben, Gat, Aser, Zabuloŋ, Daŋ waɗ ngi Neftali kwana, a sa cicam nga taŋ a muwã Ebal, ɓa a nisaka mizli.»

¹⁴Mizli levihey a sa ɓaka mizli Israyeley gar, a sa ɓaka taŋ ˀay paɗ a muŋ:

¹⁵«Mbur misa ciɗ dum ngi kuli le ti ciɗi, malla mipa le ti pi ti ɓiri, ɓa a huruk huruk a mbuŋ naŋ ti yaŋ yaŋ na, Bumbulvuŋ a hirsa gwat misi ka tayna, gwat mbur miɗiya taŋ ti ɗiyi.» Dar mizli gar a sa mbiɗaka taŋ di, a ɓam: «Amin»

¹⁶«Mbur maɗuva hirnga da cine ati mumuŋ ta na, i minisa le.» Mizli gar a sa mbiɗaka: «Amin».

¹⁷«Mbur makirih maakway ngi midigwi naŋ na, i minisa le.» Mizli gar a sa mbiɗaka: «Amin.»

¹⁸«Mbur mibiga jiviɗ malambaˀ le da mbur dangar na, i minisa le.» Mizli gar a sa mbiɗaka: «Amin.»

¹⁹«Mbur mahirya kiita ngi mbur mulak, ngi mutuhu malla ngi wudiga na, i minisa le.» Mizli gar a sa mbiɗaka: «Amin.»

²⁰«Mbur mahin ti ngwas pal a wuzla ngi cine naŋhay na, i minisa le, asi a ja haŋ le avu gwat mihĩˀĩ ngi cine.» Mizli gar a sa mbiɗaka: «Amin».

²¹«Mbur mahin ti gwat misãmi na, i minisa le.» Mizli gar a mbiɗaka: «Amin.»

²²«Mbur mahin ti sukum naŋ mongoso, zuŋ ngi cine malla ngi mumuŋ na, i minisa le.» Mizli gar a sa mbiɗaka: «Amin.»

²³«Mbur mahin ti mumuŋ ngi ngwas naŋ na, i minisa le.» Mizli gar a sa mbiɗaka: «Amin.»

²⁴«Mbur makiɗa mbur cil naŋ ti mi yaŋ yaŋ na, i minisa le.» Mizli gar a sa mbiɗaka: «Amin.»

²⁵«Mbur matiɓi dala ngi kiɗa mbur migi gwat ta na, i minisa le.» Mizli gar a sa mbiɗaka: «Amin.»

²⁶«Mbur macina mingiɓi ngir ɓimujuwa hana, a ja taŋ a hirnga ta na, i minisa le.» Mizli gar sa a mbiɗaka: «Amin.»