Read South Giziga DEU 28 Bible Online

DEU 28 - South Giziga bible

DEU 28

¹Moyis a ɓi: Da ki ra cinaka mingiɓi ngi Bumbulvuŋ Buymisemuŋ kumo gisiŋ gisiŋ, yo ki ra gam slra kuy kuy ti ɓimuɗuvahay cek, ya muɓukum taŋ dana ani na, naɓa Bumbulvuŋ Buymisemuŋ kumo a sa tiri ti kum madiɗahay angi sukwi ngi mizli ngisi ruwuy hana gar.

²Ɗuwula mihey cek masa ɗuwulaka taŋ ar kum, masa dumukum, asi kum micinaka mingiɓi ngi Bumbulvuŋ Buymisemuŋ kumo na, t'ani:

³A sa ɗuwulukum mi ar walahay madiɗahay ati prokoy,

⁴A sa vulukum ziri haɗi, gwat ngi migama haɗi, yo a sa ga ɓa sla kumoy, tumuŋ kumoy, ˀaw kumoy, a jam haɗi.

⁵A sa naha lelek kumoy ti yi ngi gwatay, a sa naha li fukuɗa hapa kumoyo ti hapa.

⁶Kum masa cam, yo kum masa bam gar na, a sa ɗuwulukum mi.

⁷Da mesene kumoy misa zlukum le na, Bumbulvuŋ a sa vulukum bugawla a hirnga taŋ. Da a soko zleˀe hiɗim hiɗim tir jiviɗ purla na, a sa zliɗam hirnga a mbuŋ kumo mber mber, a jam jiviɗ wal wal tarnaˀ.

⁸Bumbulvuŋ Buymisemuŋ kumo a sa ga ɓa ɗuwula mi naŋ a ndir ar kum, ar dirgwaɗ kumoy waɗ ar gwat kum magaka gar. Yo a sa ɗuwulukum mi a hirwuy Bumbulvuŋ Buymisemuŋ kumo muvulukum di na.

⁹Da ki ra gam slra ti ɓimuɗuva ngi Bumbulvuŋ Buymisemuŋ kum, yo ki ra gaka gwat naŋ mawuɗo na, a sa tiri ti kum sukwi nga naŋ mihĩˀĩ, kaɓa naŋ muɓukum di zleˀe ti hudum tuwa.

¹⁰Sukwi ngi mizli ngisi ruwuy keɗeɗe, a sa puraka, mizli mazulukum ti slimiɗ ngi Bumbulvuŋ na, a sa zluwunam ti kum.

¹¹Bumbulvuŋ a sa gukum mezle naŋ angi hirwuy naŋ miɓi ti hudum da dideˀ kumoy, a sa vulukum di na. Ki sa yam haɗi, ginew kumoy a sa jam haɗi, hirwuy a sa gi gwat haɗi.

¹²Bumbulvuŋ a sa wunukum miviɗiviɗi ngi yam ngi muŋ, naŋ mawi di vu kuy kuy, ɓa a go vuŋ nga hirwuy kumo ar hin naŋ kaslsla, yo ɓa a ɗuwula mi da gwat ngi gi kumoy gar. Sukwi ngi mizli haɗi a sa dindilam gwat avu kum, amma kumo, kum anta sa dindilam gwat neˀ ta.

¹³Bumbulvuŋ a sa tiri ti kum sukwi mudumbuŋ, anta ngi dirba ta. Ki sa cifam ndrehhe a hirnga mizli, anta asi virzi ngi mizli ta. Vurˀe, ɓimuɗuvahay, ngi Bumbulvuŋ Buymisemuŋ kum, ya muɓukum taŋ dana ani na, sey ki gam taŋ slra kuy kuy, yo ki jaka taŋ a hirnga.

¹⁴Ko ki ngizlam neˀ le avu jiviɗ ya mabugukum di dana ani na ta, ko ti hazum, ko ti gula, ko ki sipam kulihey ɓa ki huruk hurukam a mbuŋ taŋ ta.

¹⁵Amma da kum anta cinaka mingiɓi ngi Bumbulvuŋ Buymisemuŋ kumo ta, kum anta kam slimiɗ ngi gi slra ti ɓimuɗuvahay ati ɓimujuwahay ya muvulukum taŋ dana ani na ta na, nis ani masa so nga hirnga kumo, ɓa a jukum:

¹⁶A sa nisa mizli ngir walahay madiɗahaya, a sa nisa mizli ngir prokoyo.

¹⁷Kum anta kisa lumam yi ngi gwatay ar lelek kumoyo mata, li fukuɗa hapa kumoy, a sa ndiram njololoŋ njololoŋ kine.

¹⁸A sa nisukum, ki yam mata, gwat a gi ar guva mata, sla kumoy, tumuŋ kumoy ati ˀaw kumoy anta sa yam mata.

¹⁹Ar siifa kum gar, kum mabam yo kum mamoko gar na, kum i minisahay le.

²⁰Gwat kum masa gaka gar na, Bumbulvuŋ a sa nisaŋ, a sa gukum zluwun, kisa likam, yo a sa ngizlukum kuɗup a haŋ hãŋ, asi kum mupulakaŋ na, ki gam malambaˀ le.

²¹A sa yukum jiji mozorbono, a sa ngizlukum kuɗup angi hirwuy kum masa tiɓaka ɓa a ndir da kum na.

²²Bumbulvuŋ a sa ga ɓa ki hĩhĩyam zah zah, kisa hislam, vu cõˀcõˀ avu vu, vu a kukuɗusl. A sa gukum kwalay. Daw a sa muˀul hiykom, malla a zãˀãm. Gwat tayna a sa gam avu kum, hã ki ngizlam kuɗup.

²³Muŋ a sa tiri gidaŋ ka ɓiri gaza sirit a hirnga kumo, yo hirwuyo kwana, a sa tiri asi sar kumo gidaŋ ka ɓiri.

²⁴Ar deɗe ngi vuŋ, Bumbulvuŋ a sa go lagwada ati murɓuk nga hirwuyo, hã ki ngizlam kuɗup wãˀ.

²⁵Bumbulvuŋ a sa ga ɓa mesene kumoy a cifam bugawla ar kumo. Da ki bam nga zli taŋ ngi kiɗa vu zleˀe, hiɗim hiɗim tir jiviɗ purla na, a sa zliɗukum hirnga mber mber, hã ki jam jiviɗ wal wal tarnaˀ. Sukwi ngir duniya keɗeɗe masa pura gwat migi avu kum na, a sa muɗa taŋ membezleŋ.

²⁶Vagay kumoy a sa tiram gwat ngi zum ngi ɗiyuwoy gar ati gwat muzuma vu ngir ɓuh kumoy, ko mbur masa ɓula taŋ anta.

²⁷Bumbulvuŋ a sa ga ɓa ki hislam liw liw, kaɓa naŋ miga da Eziptehey. A sa gukum bonoy ti jiji tandaw, ti birkacaw waɗ waˀa misi gwehgweh makuf ta.

²⁸Bumbulvuŋ a sa ga ɓa ki bam hirnga, ki hulufom, yo ki gam lambaˀ lambaˀ.

²⁹Ti wuzla papasa si na, kisa tutumaka ti tutum ka dangar ar luvuŋ. Gwat masa gi kasl kasl avu kumo, anta wãˀ. A sa zumaka gwat kumoyo ti zum ti zum, a sa sliraka gwat kumoy ndrehhe ti hul, yo ko mbur masa kilo widi kum anta.

³⁰Da mbur asi kumo, a juw sar ngi zuŋ le na, i mbur mekelem masa hin di. Da mbur numuŋ a ndir hay le na, naŋ anta sa hin ara ta. Da mbur mekelem a gi guva ngi gudubun le na, naŋ anta sa ndila hin ngi ngila yi naŋ mudumbuŋ ta.

³¹A sa kiɗaka sla kumoyo daˀ mur kum vuna, amma kum anta sa zumam useˀ naŋ ta. A sa huloko zungu kumoyo daˀ mur kum, amma kum anta sa tiɓaka taŋ gu ta. Mesene kumoy a sa ɓulaka tumuŋ kumoyo, amma ko mbur masa kilo widi kum anta.

³²Mulakay a sa jaka ziri kum mizile ati mongosohoyo ng'ar beke, kisa ndiram hiipas ar li hiliɗ taŋ, da a moko kwana, amma ko kum anta sa gam gwat neˀ gu ta.

³³Gwat ngi migam kumoy ati migir kumoy gar na, i mizli manja siney masa zumaka. A sa ndiram ar li zum kumo, ar li guzuvur kumo.

³⁴Gwat hiri kum mapura ngal ngal na, a sa cukum bi hirngaŋ.

³⁵Bumbulvuŋ a sa ga ɓa poprok kumoy ati tuwal kumoyo, a hislam hisl mukuy ta liw liw, ko kum anta sa kufaka gu ta wãˀ, a sa tisla vu cek, zle a hirnga hã sesẽŋ a hur sar.

³⁶Bumbulvuŋ a sa hilukum jom ati buy kum madiɗa, kum micaka, a sa vulukum da sukwi misi ko kum vuna ati dideˀ kumoyo ki sinaka taŋ ta. Adiga, kisa huruk hurukam a mbuŋ kuli dum malla kuli ɗuguroy.

³⁷Mizli gar, Bumbulvuŋ masa ru ti kum ngi hay taŋ na, a sa ndiram ngirkik ngirkik ti zluwun ar li pura gwat magi avu kum na, a sa singiram ar kum, a sa kiɗam ti kum mambaˀa.

³⁸Ki sa ram ti hilfa daw nga zlig haɗi, amma kisa lumam daw ti sifi, neˀkini, asi jaray a sa tirnaˀa tirneˀ tirneˀ gar.

³⁹Ki sa gam guva ngi gudubun, ki huvaka kuy kuy, amma kum anta sa sam mbaazla yi naŋ ta, kum anta sa slam ngi hay vuna ta si, asi mumuyuŋ a sa le gar.

⁴⁰Hirwuy kum gar i tutumbur, amma kum anta sa lumam mal ngi gi avu vu ta, asi a sa pa yi naŋ kwatak manja nihi.

⁴¹Ki sa yam ziri mizile ati mongosohoyo, amma kum anta sa lumam loŋ a ciki kumo ta, asi a sa jaka taŋ ng'ar beke.

⁴²Widis kumoy ati gwat ngir guva kumoy gar, i yukoy masa zumaka taŋ.

⁴³Mbur moholoy misi a wuzla kumo, a sa sik nga mbuŋ fineˀ kumo, amma kumo kisa mam nga hirwuy nga hirwuy.

⁴⁴I kum masa dindilam duvus avu taŋ, i taŋ masa dindilam avu kum ta. Taŋ a sa tiram mizli ngi mbuŋhoy, joˀ kumo, kisa tiram mizli ngi dirbahay.

⁴⁵Nis tayna gar, a sa gi avu kumo, a sa supukum, a sa jukum, hã ki ngizlam kuɗup wãˀ. Asi ki ngumam cine mi ngi Bumbulvuŋ Buymisemuŋ kumo ta, yo ɓimuɗuva ati ɓimujuwa naŋhay naŋ muvulukum taŋ na, ki ngumam ji taŋ a hirnga ta.

⁴⁶A sa gi avu kum ati dideˀ kumoyo, i gwat ngi biga gwat mekelem waɗ gwat migam ɗaˀ tahay ngi sete.

⁴⁷Asi gwat misi zleˀe avu kum ka zay na, ki gaka gwat da Bumbulvuŋ Buymisemuŋ kumo ti mumul, yo ti mevel purla ta.

⁴⁸Ki sa tiram beke ngi mesene kumoy, Bumbulvuŋ masa slino taŋ ngi kiɗa vu ati kum na. May a sa jukum, yam a sa gukum, kisa ndiram gulndiŋ gulndiŋ kine, ko gwat kum neˀ anta. Bumbulvuŋ a sa kukum galalaŋ ngi ɓiri asi ˀay kumoyo, hã ki ngizlam pay wãˀ.

⁴⁹Bumbulvuŋ a sa so ti sukwi mikileŋ, ti mivay ngi ruwuy wãˀ, i sukwi kum misinaka mi naŋ ta, a sa sur ng'ar kum kaɓa krom masur ngi vi gwat.

⁵⁰I mizli misi hirnga gidaŋhay, anta sinam midigila ta, anta puram ircece da ziri ta.

⁵¹A sa tiɓaka ginew kumoy ati gwat ngi migam kumoyo, joˀ kumo, kisa micam ti may. Daw kumoy, mbaazla, mal, ko ziri slahay, ziri tumuŋhoy, ziri ˀaway kwana, anta sa pulukum neˀ ta, kisa ngizlam pay wãˀ.

⁵²A sa nduhukum ar walahayay gar, Bumbulvuŋ Buymisemuŋ kumo muvulukum taŋ na. A sa kuɗukum hã a mbizlaka mohol migilahay, migidaŋ gidaŋhay, kum mapuraka zleˀe kaɓa ki ɗumom le wãˀ a duba taŋ na.

⁵³Bonoy mesene kumoy masa cukum ara na, hã kisa zumam di ziri kumoy. Ziri mizile ati mongosohoy Bumbulvuŋ Buymisemuŋ kumo muvulukum taŋ na, kisa humbuɗaka taŋ.

⁵⁴Mbur ngir sukwi ngi mizli madiɗahay malla misi ar wuya kwana, a sa zizira sukum naŋ, ngwas nga naŋ, naŋ maja gumbuˀo, waɗ ziri naŋhay mindirama.

⁵⁵Asi mike na, a zluwun vur taŋ masa fuyokoŋ mi ngi useˀ ngi ziri naŋhay naŋ masa humbiɗa taŋ. Asa gi ti di mesene kumoy munduhukum, micam ti kum ar bonoy ar walahay kumoy gar, ko gwat ngi zum mekelem anta mata, mindiram ngi zumo sey i ziri.

⁵⁶Ngwas ngir sukwi ngi mizli madiɗahay malla misi ar wuya kwana, a sa ga kanah ya. Naŋ mukuy haɗa zleˀe, ko hur sar naŋ tekeɗe, anta ɗuva a ruwuyo ta tuwa na, a sa zizir zil nga naŋ tehhe, naŋ maja gumbuˀo, waɗ mangal naŋ ati zuŋ naŋ.

⁵⁷ko zuŋ naŋ gaza naŋ miya wureˀ aruŋ, ko misi naŋ mubo di ti kwacay naŋ kwana, a sa zizira taŋ. Naŋ kine, ar bonoy masa gi, ko gwat ngi zum anta neˀ ta na, ngwas a sa wuluk ɓa a sa zuma taŋ ti yaŋ yaŋ. Asi mesene kumoy masa nduhukum, masa cam ti kum ar bonoy ar walahay kumoy gar na.

⁵⁸Ɓimujuwahay gar mutohohoy ar ɗerewol hana, da kum anta ki kam slimiɗ ar taŋ, ɓa ki gam taŋ slra cek ta, yo kum anta zluwunam ti slimiɗ ngi Bumbulvuŋ Buymisemuŋ kumo misi ti dudok, magi zluwun na ta na,

⁵⁹naɓa Bumbulvuŋ ti haŋ naŋ a sa slinukum ti sukwi ngi waˀahay wal wal ati jiji mihimaˀhay wal wal mazikam haɗi, nga hirnga kum ati dideˀ kumoyo.

⁶⁰A sa slinukum ti jiji mozorbono mugukum zluwun a Ezipte na gar ng'ar kum, bonoy naŋ a sa mbiɗi cek nga hirnga kum.

⁶¹Ko jiji ati waˀa mutohoko taŋ ar ɗerewol ngi ɓimujuwa hana ta kwana, Bumbulvuŋ a sa slino taŋ ng'ar kum, hã ki ngizlam kuɗup wãˀ.

⁶²Kum misi zleˀe wenewene kaɓa wurzlaŋhay a muŋ tuwa na, kisa ndiram njireˀ kini, asi kum masa cinaka mi da Bumbulvuŋ Buymisemuŋ kumo ta na.

⁶³Naŋ kine, macira hiri da Bumbulvuŋ zleˀe, i naŋ miki slimiɗ ar kum ɓa ki ndiramar wuya, yo ɓa ki yam haɗi na. Yo nga mbuŋ ya kwana masa ciraŋ hiri, i naŋ masa ki slimiɗ ar kum ta, ɓa ki susuymom, ki ngizlam kuɗup na. Hirwuy kum masa pam ara tuwa, a sa tiɓa avu kumo.

⁶⁴Bumbulvuŋ a sa zliɗukum hirnga mber mber nga wuzla sukwi ngi mizli gar, zle asi diˀis hã asi diˀis vay mekelem. Ki sa huruk hurukam a mbuŋ kuli dumoy malla kuli ɗuguroy, misi ko kum vu na, malla dideˀ kumoy a si na ka ta

⁶⁵A wuzla sukwi ngi mizli tayna, ko kum anta kisa pulam vu ta, ko li ɗuva sar kwana, kum anta kisa lumam ta. Adiga, Bumbulvuŋ a sa ga ɓa ki likam haɗi, hiri ndirɓiɓiɓi, vu pam pam.

⁶⁶Siifa kum a sa ndir heɓel heɓel, ti duvuɗ ti papasa, kum ar li jijik ti zluwun, njaha hiri njah anta mata.

⁶⁷Ti kum masa puraka gwatay masa gam na, zluwun a sa kuɗukum. Ti miprike kisa ɓam: «Anja hiikuɗ na a ji so!» Pastaˀ ma na, ki ɓam: «Anja li na a wun so!»

⁶⁸Dar Bumbulvuŋ a sa mi ti kum ti palalam ngi yamay nga Ezipte, nga hirwuy ya muɓukum zleˀe, kisa puraka mata ndiɗaˀ tuwa. Adiga, kisa wuɗam hiɗika vu kum tehhe avra, ɓa ki gam gawla ngi mesene kumoy. Amma ko kum anta sa lumam mbur mihiɗik kumo ta.

⁶⁹Jumoˀay angi hirwuy Moˀap, Bumbulvuŋ miɓa Moyis ɗaˀ ɓa a jum ati Israyeley ti slimiɗ nga naŋ na, a jum bac ng'avi naŋ mujumo zleˀe ati taŋ a muwã Horep na ma, mingiɓi nah n'anihĩ: