Read South Giziga DEU 29 Bible Online

DEU 29 - South Giziga bible

DEU 29

¹Moyise, a cikila Israyeley gar, a ɓa taŋ: Ti kum misi zleˀe a Ezipte na, gwat Bumbulvuŋ miga da buy madiɗa ngi Ezipte ati gawla naŋhay gar waɗ asi ruwuy naŋ gar na, ki puraka le ti hiri kum ngbaŋ.

²Bonoy madiɗahay, cekenehey ati gwat migam ɗaˀ tahay naŋ miga taŋ na, ki puraka taŋ le ti hiri kumo ngbaŋ.

³Amma hã wurenna, Bumbulvuŋ a vulukum lesl ngi sli wala ngi gwat mucohom zleˀe na ta, hiri kumoy ati slimiɗ kumoy a cinam ta, a puram ta.

⁴A ngir ti kum wuzlaɓuh, hã vi kukur mufaɗ, ko zana kumoy a hiryam ta, yo tarak kumoy a hiryam a sar kumoyo ta.

⁵ki zumam di i ɗaf ta, kisam di i mbaazla malla gwat miɗalakay ta. I Bumbulvuŋ miki slimiɗ ar kum, ɓa ki sinaka naŋ i Bumbulvuŋ Buymisemuŋ kum.

⁶A dirba nah na, kum mindiloko akaka na, Sihoŋ buy madiɗa ngi Heseboŋ waɗ Ok buy madiɗa ngi Basaŋ, a zlam ndra ngi kiɗa vu, amma ndr'i kiɗaka taŋ le.

⁷I tiɓaka hirwuy taŋ, i vulaka da sukwi ngi Ruben, ngi Gat waɗ sukwi ngi Manase cah ɓa a wunkakaŋ.

⁸Vurˀe, kisa jaka mingiɓi ngi jumoˀay hana a hirnga, yo ki gam taŋ slra, naɓa gwat kum masa gaka gar na, a gi kasl kasl.

⁹Moyis a ɓi: Kum ani cek dana a mbuŋ Bumbulvuŋ Buymisemuŋ kumo aka ati buy kumoy, mizli micawwa kumoy, buyɓi kumoy, kum Israyeley cek ceke,

¹⁰yo ziri kumoy, ngwas kumoy waɗ moholoyoy misi asi hirwuy kumoy, majuwukum dum malla manuwukum yama.

¹¹Bumbulvuŋ Buymisemuŋ kum, a jum ˀay le wurenna ati kum, ara zulukum ɓa ki tiɓaka ti hudum hadam le aseˀe.

¹²Naŋ kine, ɓa ki tiram mizli naŋhay, yo naŋ kwana, a tiri Bumbulvuŋ kum, kaɓa naŋ muɓukum di zleˀe da kum vuna, yo kaɓa naŋ miɓa ti hudum da dideˀ kumoy, ti Abraham, Izak waɗ Zakop na.

¹³Jumoˀay hana ya maɓukum di, ya mazilukum ɓa ki tiɓaka ti hudum na, i jum di ˀay ati kum tew ta.

¹⁴N'anta vur mbur mideŋ dana ati ndra ka, a mbuŋ Bumbulvuŋ Buymisemuŋ kumo tew ta, amma naŋ vur dideˀ ndrahay miyaka taŋ wurenna t'aruŋ na ma.

¹⁵Kumo, ki sinaka cifi ndra zleˀe angi hirwuy Ezipte na le, yo cuh ndra ti wuzla sukwi ngi mizli ndra mutuwuɗoko hirwuy taŋhay na, ki sinaka le.

¹⁶Ki puraka gwat malambaˀ muwãˀ ati kuli taŋhay misi a hay taŋhay na le: i kuli dumoy malla ɗuguroy, waɗ kuli mipa ti ɓiri barahay malla ti ɓiri tapasl tapaslay,

¹⁷anja ko mbur zil, ko ngwasa, ko sukwi malla muy, a mbiɗi duba avu Bumbulvuŋ Buymisemuŋ ndra, ɓa ara huruk huruk a mbuŋ kuli ngi sukwi ngi mizli tayna ta. Anja mbur asi kumo, a tiri kaɓa widis mabo ti muwuŋ miɗalak ta.

¹⁸Da ani kaɓa mbur asi kumo, a cine mingiɓi hana misi ti hudum aseˀe na le, a pura vu naŋ kaɓa a ɗuwulakaŋ mi le, a ɓi ti kwacay naŋ na: «Ko da i ra sipi gwat ngisi mevel ɗu kwana, gwat gar a sa ru kuy avu ya muduba. Naŋ kine, yam mija hirwuyo le na, hirwuyo anta wuɗ yama mata.»

¹⁹Bumbulvuŋ naŋ anta sa pulaŋ mungra naŋ mata, himaˀ ngi Bumbulvuŋ, a sa slikiɗ ka vu, a sa pa ng'ar naŋ. Nis mutohohoy ar ɗerewol hana, a sa mbiɗam cek nga hirnga naŋ, yo Bumbulvuŋ a sa fuca slimiɗ naŋ asi gazlavay gar avra.

²⁰Bumbulvuŋ a sa gwahaŋ gwah pal naŋ ng'ar bonoy, ti wuzla Israyeley gar, a gi le weˀe avu nisey misi ar ɓi ngi jumoˀay, mutoho taŋ ar ɗerewol ngi ɓimujuwa hana.

²¹Mizli masa ya ka taŋ ti mbuŋ, ziri kumoy masa ya ka taŋ a dirba kumo, yo mulakay masa soko ti ruwuy mikileŋ, taŋ masa puraka gwat ngi menderehey migam asi ruwuy hana, ati jijihey Bumbulvuŋ miga taŋ da mizli na, a sa ɓam:

²²Hirwuy hana gar, vu ngi barudu ati mandaŋ a wura le, gwat a zligi mata, gwat a pus mata, ko gwat mutukuzo magil ara anta. A gi le rak rak ati hirwuy Sodom, Gomor ati Adma waɗ Soboyim, i walahayay Bumbulvuŋ muwaha taŋ, ti naŋ muzuɓ himaˀ fõh fõh na.

²³Dar sukwi ngi mizli mekelemey a sa ɓam: «Bumbulvuŋ a gi ti hirwuy hana, kanah vur mike? A zuɓ himaˀ haɗa kine vur mike?»

²⁴Joˀ mizli a sa mbiɗaka taŋ di: «A gi kanah, asi jumoˀay Bumbulvuŋ, Buymisemuŋ ngi dideˀ taŋhay, mujumo ati taŋ, ti naŋ mabo ti taŋ ti hirwuy Ezipte na, a ngilaka ɓi naŋ le.

²⁵Asi a gam mezegwel da kulihey, a huruk hurukam a mbuŋ taŋ. A sinaka kuliheye zleˀe ta, yo Bumbulvuŋ a pula taŋ jiviɗ ngi huruk huruk a mbuŋ taŋ zleˀe ta ngbaŋ.

²⁶Yo ma na, Bumbulvuŋ mislikiɗ himaˀ ar taŋ na, vurˀe, a po nisey mutoho ar ɗerewol hana cek ng'ar taŋ.

²⁷Bumbulvuŋ a ji mevel, a zuɓ himaˀ fõh fõh, a tiɓa hirwuy taŋ, a ɓula taŋ ng'asi ruwuy mekelem, a roko dana a diga aruŋ.»

²⁸Gwat muɗum ɗumoy na, sey Bumbulvuŋ Buymisemuŋ ndra misina tewle. Amma gwat mibiga le njoy ar li babara na, i ngi ndra ati ziri ndrahay ngi sete, ɓa mingiɓi ngir ɓimujuwa hana gar na, i gam di slra.