Read South Giziga DEU 30 Bible Online

DEU 30 - South Giziga bible

DEU 30

¹Moyis a ɓi: Ɓi ngi ɗuwula mi ati nis ya muɓukum taŋ gar na, a sa gam ar kumo, ti di Bumbulvuŋ mizliɗukum hirnga le suweˀ nga wuzla mizli mekelemey so na, naɓa kisa wulkaka gwat tayna.

²Dar kisa moko sesẽŋ avu Bumbulvuŋ Buymisemuŋ kum. Kum ati ziri kumoyo, kisa cinakaŋ mi ti mevel purla, ti membezleŋ ngi vu kum wãˀ, joˀ kisa sipaka ɓimuɗuvahay ya maɓukum taŋ dana ani na gar.

³Bumbulvuŋ Buymisemuŋ kumo a sa mbiɗa cifi kumo, a sa bugukum gi mezle naŋ, a sa mo ti kum ti ngi ruwuyoy gar naŋ mizliɗukum hirnga ng'ar taŋ zleˀe tuwa.

⁴Da ko a ɓulukum le zleˀe sesẽŋ asi ruwuy mira kiɗo mi kwana, Bumbulvuŋ ara supo kum a diga, ɓa a cikilukum hirnga arleˀe.

⁵Bumbulvuŋ a sa mo ti kum nga ruwuy ngi dideˀ kumoy zleˀe, a sa ndir da kum, a sa vulukum cira hiri, yo kisa sikam haɗi fineˀ dideˀ kumoyo.

⁶Bumbulvuŋ Buymisemuŋ kum, a sa bunukum mevel kumoy ati ngi ziri kumoy masa ya ka taŋ nga mbuŋ, ɓa ki wuɗakaŋ ti mevel purla, ti membezleŋ ngi vu kum wãˀ, ɓa ki ndiram ti siifa.

⁷Bonoyoy ya muslufukum t'ani gar na, Bumbulvuŋ Buymisemuŋ kumo a sa ga taŋ nga hirnga mesene kumoy mapurukum hiris le, masupukum na.

⁸Dar kumo, kisa cinaka mi da Bumbulvuŋ muduba, ɓimuɗuvahay ya mavulukum taŋ dana ani na, kisa gam taŋ slra cek.

⁹Bumbulvuŋ Buymisemuŋ kumo a sa ga ɓa gwat kum magaka gar na, a gi gisiŋ. Ki sa yam haɗi, ginew kumoy a sa jam haɗi, gwat ngi migam kumoy a sa gam ka zay. Asi hiri a cira Bumbulvuŋ le ngi ga mezle da dideˀ kumoyo, naŋ kine, hiri a sa ciraŋ ngi gukum mezle da kumo kanah ya.

¹⁰Asi mike na, kisa cinakaŋ mi, yo kisa gam slra ti ɓimuɗuva naŋhay ati ɓimujuwa naŋhay misi ar ɗerewol ngi ɓimujuwa hana, yo kisa moko ng'avaŋ ti mevel purla, ti membezleŋ ngi vu kum wãˀ.

¹¹Moyis a ɓi: Haˀaw, ɓimuɗuvahay ya mavulukum taŋ dana ani na, taŋ tuwaˀ ngi cine ta, yo t'anta kileŋ avu kumo ta ma.

¹²Taŋ a muŋ ɓa ki ɓam: «Masa jiɗ nga muŋ i wa, ɓa ara supo ndra di, a sa ɓa ndra di, ɓa i gam taŋ slra na ka ta»

¹³Taŋ a duba mubuliyey ta ma, ɓa ki ɓam: «Masa tuwuɗa mubuliye i wa, ɓa ara supo ndra di, ɓa a ɓa ndra di, ɓa i gam taŋ slra na ka ta»

¹⁴Haˀaw, mingiɓi ngi Bumbulvuŋ hana, naŋ da gweˀ avu kum, naŋ da a balam kumo, naŋ da a mevel kumo, ɓa ki gam di slra.

¹⁵Moyis a ɓi: Israyeley, puraka ɗi: dana a mbuŋ kumo, y'ani pa siifa ati wuya sek ti ka, yo muc ati bonoyo kwana sek ti ka ya.

¹⁶Jam lesl kuy kuy ar ɓimuɗuvahay ya maɓukum taŋ dana ani na: Wuɗam Bumbulvuŋ Buymisemuŋ kumo, sipaka jiviɗ naŋ, ɓimuɗuva naŋhay, ɓimujuwa naŋhay waɗ jiviɗ ngi sirik naŋhaya, jaka taŋ a hirnga. Naɓa kisa lumam siifa, kisa sikam haɗa, joˀ Bumbulvuŋ Buymisemuŋ kumo a sa ɗuwulukum mi angi hirwuy kum masa cam, ɓa ki tiɓaka da kum na.

¹⁷Amma da ki mbiɗam duba le ava, ki ra ziriɗaka mi naŋ, ki pulaka vu kumo le mbak mbak, ɓa mizli a ɗuɗukum nga huruk huruk a mbuŋ kulihey, yo ɓa ki gaka taŋ mezegweley na,

¹⁸y'ani i ɓukum di njah dana: Ki sa ngizlam pay wãˀ. Hirwuy kum masa cam ɓa ki tiɓaka da kum a dubazaw Zurdeŋ na, kum anta sa zikam haɗa anga ta.

¹⁹Haˀaw, i ɓukum di le njah dana, hirwuy ati muŋ i sedewo ɗuwoy: y'ani pa siifa ati ɗuwula mi, muc ati nise, sek ti ka sek ti ka a mbuŋ kumo. Wunam siifa ɓa ki ndiram ti siifa, kum ati dideˀ kumoy nga mbuŋ.

²⁰Wuɗam Bumbulvuŋ Buymisemuŋ kumo, cinakaŋ mi, ndiram teŋteŋ, hinaka mevel aseˀe: naɓa kisa gam vi haɗi asi ruwuy Bumbulvuŋ miɓi a sa vula da dideˀ kumoy, ti Abraham, Izak waɗ Zakop na.