Read South Giziga DEU 31 Bible Online

DEU 31 - South Giziga bible

DEU 31

¹Akẽh na, Moyis a ɓa Israyeleye cek:

²«Dana, ya tivi skat ti kukur cuw: i ndila ɓa i jukum gu mata. Bumbulvuŋ a ɓiy na: y'anta sa tuwuɗa mizaw Zurdeŋ hana ta kini!

³Bumbulvuŋ Buymisemuŋ kumo a sa kukum mbuŋ, i naŋ masa ngizla mizli misi a mbuŋ kumo, ɓa ki tiɓaka hirwuy taŋ. Kaɓa Bumbulvuŋ miɓa na, masa cifi buy kum i Zozuwe.

⁴Bumbulvuŋ a sa gi ti sukwi ngi mizli mekelem tayna, kaɓa naŋ migi ti Sihoŋ ati Ok buy madiɗa ngi Amorihey ati hirwuy taŋhay, a ngizla taŋ le kuɗup.

⁵Bumbulvuŋ a sa vulukum taŋ asi haŋ kumo, kisa gam ti taŋ kaɓa ya muɗuvukum ɓi nah na, cummo.

⁶Tumom vu tam, cicam zlak gidaŋ gidaŋ, ki zluwunam kirkir a mbuŋ taŋ ta. Asi Bumbulvuŋ Buymisemuŋ kumo a sa ru ati kum, anta sa pulukum mbak le ta ndiɗaˀ wãˀ.»

⁷Akẽh na, Moyis a zila Zozuwe a mbuŋ Israyele gar, a ɓaŋ: «Tum vu tam, cici zlak gidaŋ gidaŋ. Hirwuy Bumbulvuŋ miɓi ti hudum a sa vula da dideˀ kumoy tuwa na, masa ci ti taŋ ng'ara i ka. Masa wunka taŋ di i ka.

⁸I Bumbulvuŋ masa ki ɓaˀ a mbuŋ ɗike, naŋ anta sa puluw ta ndiɗaˀ wãˀ. Ki zluwun ta so, yo ki pula vu ɗik a hĩhĩy ta.»

⁹Moyis a toho ɓimujuwa ngi Bumbulvuŋ tuwa ti tuhu, a vula da masayay, dideˀ ngi levihey majijiraka akoti ngi jumoˀay ngi Bumbulvuŋ, waɗ da mizli micawwa ngi Israyeley gara ma.

¹⁰Dar Moyis a ɓa taŋ mingiɓi ani: «Angi kiɗa mi ngi vi tarnaˀ gar, i vi ngi pula duvusu, ar muguzlum ngi guɗuko,

¹¹ti Israyeley masa soko gar nga mbuŋ Bumbulvuŋ na, kisa slufaka ɓimuɗuva hana ti gidaŋ a mbuŋ taŋ gar, ɓa a cinam.

¹²Ki sa cikilaka mizli gar: ziley, ngwasay, ziri, ko mulakay misi ar walahay kumoy, ɓa ngi cine ɓi maslufaka hana, ɓa a dubunakaŋ, a zluwunam ti Bumbulvuŋ Buymisemuŋ kumo, ɓa a jaka mingiɓi ngir ɓimujuwahay gar a hirnga, yo ɓa a kam slimiɗ ar taŋ.

¹³Ɓa ziri taŋhay misinaka zleˀe ta na, a cinamaya. Naŋ kine, a sa dubunaka cine mi da Bumbulvuŋ Buymisemuŋ kumo angi hin ngi siifa kum gar, kum masa cifam angi hirwuy masa ndir da kum a dubazaw Zurdeŋ na.»

¹⁴Bumbulvuŋ a ɓa Moyise na: «Pas ngi muc ɗike naŋ gweˀe. Zila Zozuwe, ɓa ki ram ng'ar guɗuk ngi zlir ti ya, i sa vulaŋ mingiɓi ɗu a diga.» Dar Moyis ati Zozuwe a ram ng'ar guɗuk so.

¹⁵Bumbulvuŋ a biga taŋ vu a hur guɗuko, angi musure ngi gazlavay ɗew ɗew a miviŋ ngi guɗuko

¹⁶Bumbulvuŋ a ɓa Moyise na: «Ani ki wuɗo muc gweˀe. A dirba ɗike, mizli Israyeleye, angi hirwuy taŋ masa cam anga na, a sa huruk hurukam a mbuŋ kulihey, misi mizli mulakaya, mahuruk hurukam a mbuŋ taŋ angi hirwuy taŋ na. A sa pulikiy, a sa ngilaka jumoˀay ɗu, ya mujumo ati taŋ na.

¹⁷Tapasa, i sa slikiɗ mevel fõh fõh ng'ar taŋ, i sa pula taŋ, i sa mbiɗi duba avu taŋ. Sukwi ngi mizli mekelemey a ndilam vu kuvbum ar taŋ. Mendere madiɗahay ati bonoy madiɗahay a sa gam avu taŋ. Dar a sa ɓam tapasa: Mendere tayna migam avu ndra na, asi Buymisemuŋ ndra naŋ anta a wuzla ndra mata na sukwa?

¹⁸Amma tapasa, yi sa mbiɗi duba avu taŋ na si, vur taŋ migam malambaˀ, a mbiɗam hiri ng'avu kulihey na.

¹⁹Yo wurenna Moyis ati Zozuwe, tohoko dimis hana, Moyis, dubuna da Israyeley, ɓa a dubunaka ti hirngaŋ, ɓa dimis hana, a ga sedewo ɗu avu Israyeleye.

²⁰Naŋ kine, yi sa ci ti mizli tayna nga hirwuy misi ɗuwa ati mam ara ɓulom a ra, hirwuy ya miɓa ti hudum da dideˀ taŋhay tuwa. Adiga, a sa zumam ka taŋ mawuɗam, a zlumburam. A dirba nah, a sa mbiɗam hiri ng'avu kulihey, a gaka gwat kulihey mawuɗama. A sa hirsikiy ya, a sa ngilaka jumoˀay ɗu ati taŋ.

²¹Da mendere madiɗahay ati bonoy madiɗahay a sa luuma taŋ le so na, dimis hana, a sa ga sedewo nah, a zluɓaka le, asi ko dideˀ taŋhay kwana, anta sa pulaka zli naŋ mbak le ta. Naŋ kine, anja i ci ti taŋ nga hirwuy ya miɓi i sa vula taŋ di vuna si na, na gwat taŋ majuwaka a mevel taŋ ngi gi na, i si na le si.»

²²Dar Moyis a toho dimise tapasa, a dubuna da Israyeleye.

²³A dirba nah, Bumbulvuŋ a ɓa ɓi nah da Zozuwe mangal ngi Nun, a ɓaŋ: «Mbur mbar, cici zlak gidaŋ gidaŋ, asi hirwuy ya miɓa ti hudum, i sa vula da Israyeley tuwa na, masa ci ti taŋ ng'ara i ka, ya kwana, y'ada ati ka.»

²⁴A dirba Moyis mikiɗa mi ngi toho mingiɓi ngir ɓimujuwa tuwa cek ng'ar ɗerewolo na,

²⁵a ɓa mingiɓi ani ɗaˀ da levihey majijiraka akoti ngi jumoˀay ngi Bumbulvuŋ, a ɓa taŋ:

²⁶«Tuɓaka ɗerewol ngi ɓimujuwa hana, kaka ɓaˀ a ciki akoti ngi jumoˀay ngi Bumbulvuŋ Buymisemuŋ kumo, a sa gi i sedewo ngi Israyeley.

²⁷Asi yi si na le, taŋ i mislikiɗa ɓihey, i misi hirnga gidaŋhay. Dana, ar ya misi ti siifa a wuzla kum aruŋ, da ki ra slikiɗam ɓi avu Bumbulvuŋ na, a dirba muc ɗu, a sa gi ti vendeke takwa?

²⁸Wurenna, cikiloko mizli micawwa ati buyɓi ngi wuzla kumoyo cek nga mbuŋ ɗu aka, i sa slufa taŋ mingiɓi ngi dimis hana ti gidaŋ, birngiŋ ati hirwuyo, a sa gaka sedewo naŋ.

²⁹Asi a dirba muc ɗu, yi si na le, Israyeley a sa hiryam wãˀ, joˀ kisa cohom kileŋ avu jiviɗ ya mubugukum di na. Nga mbuŋ so na, kisa jam hirnga ti mendere, asi ki gam malambaˀ le a mihiri ngi Bumbulvuŋ, dar kisa slikiɗaka mevel da Bumbulvuŋ ti gwat ngi gi kumo.»

³⁰A dirba nah, Moyis a slufa mingiɓi ngi dimis tuwa talalaˀ wãˀ ti gidaŋ da jum ngi Israyeley gar.