Read South Giziga DEU 32 Bible Online

DEU 32 - South Giziga bible

DEU 32

¹Birngiŋ ngi muŋ, jika slimiɗe asi mingiɓi ɗo. Hirwuy, cine mingiɓi ya mawuɗ i ɓa na.

²Anja gwat ya madubunukum di, a ɓul kaɓa vuŋ magi ar guvahay, anja mingiɓi ɗu, a cifi kaɓa wulngar macifi avu giziŋ.

³I sa til mi ti slimiɗ ngi Bumbulvuŋ. Israyeley, sinaka sin le, Buymisemuŋ ndra naŋ madiɗaŋ.

⁴Bumbulvuŋ i mandazlay muwã maɗum vu, gwat ngi gi naŋ, naŋ kaslsla wãˀ. I Buymisemuŋ miteŋteŋ, ɓi mijeŋ ta anta va ta naŋ jeŋŋe, naŋ kaslsla.

⁵Amma kum i mizli malambaˀhay, mihiryahay avu naŋ, Ki gaka gwat ngi ji mevel le da Bumbulvuŋ, kum i ziri naŋhay mata, asi kum i sukwi ngi mizli malambaˀhay, ki ngizlam le avu jiviɗe.

⁶Gwat gilaw manja lesley, ki gam ti Bumbulvuŋ kanah gu kwa? Naŋ i Cine kum muvulukum siifa vuna ta kwa? Mugukum, yo a tiri ti kum mizli naŋhay na, i naŋ vuna ta kwa?

⁷Wulkaka hin mucohomoy, vi mbeˀmbeˀ nga dirba, dideˀ dideˀ mbeˀmbeˀe. Cufuɗaka cine kumoy ati midigilahay ayɗi, a sa slufukum ɓi ngi gwatay migama.

⁸Ti Buymisemuŋ mimadiɗa muwunka hirwuy da mizli na, a sla taŋ maakwaya le weˀe avu taˀ ngi sukwi ngi mizli.

⁹Amma a wi vu le ti sukwi Israyele da naŋ. A gwaha dideˀ ngi Zakopoyo le gwah da naŋ ɓa a jigina taŋ.

¹⁰Bumbulvuŋ a luuma mizli naŋhaya a wuzlaɓuh mikirɗak kirɗak, pal taŋ a wuzla gwat ngi ɓuhoy matuwam. A ki slimiɗ ar taŋ, a dubuna taŋ gwatay, a jigina taŋ, kaɓa i zingaˀ ngi hiri naŋ.

¹¹A ra bul a hirnga taŋ, kaɓa kurom mabul a hirnga ziri naŋhay, ɓa a vula taŋ gidaŋ ngi slikiɗi. A puska kirpasla pusak wãˀ, a hila ziri naŋhay ar kirpasl vuna.

¹²I Bumbulvuŋ pal naŋ makisa mizli naŋhaya, ko kuli pal a cikeˀe anta.

¹³A pi taŋ sar ar li vay muwãhay. A vula taŋ gwat ngi zumo, i gwat ngi migamay. A vulo taŋ mam ng'ar pulayay, ɓa a zumam, a puso taŋ tutumburoy ar cecesle.

¹⁴A ra sam ɗuwa avu madiya sla ati madiya tumuŋhoy. A ra zumam useˀ ngi ziri tumuŋhoy, ngi zlengerek muzlumburahay ati ngi mazawahay. A zumam ɗaf ngi hapa mukuɗ kuɗ ngi alkamari, yo a sam mbaazla ngi gudubun ngir guva taŋhay.

¹⁵Naŋ kine, Israyel a zum a mbi le, Yesuruŋ [2] mimbi na, a slikiɗ ɓi. A zlumbur kikiɗif kikiɗif, paɗ vra vra. A zla pula Buymisemuŋ migi naŋ vuna. A pa mesem le da mandazlay muwã milih naŋ.

¹⁶Israyeley, a gaka gwat ngi ji mevel da Bumbulvuŋ ti gwat ngi gi taŋ malambaˀ miwãˀ na. A slikiɗakaŋ suloŋ[3] ti huruk huruk taŋ a mbuŋ kulihey na.

¹⁷A gam mikuli da setenehey misi i Buymisemuŋ taŋ ta, yo da kulihey taŋ misinaka taŋ ta, mislam wureˀ aruŋ, ko dideˀ taŋhay kwana, a sinaka taŋ vuna ta.

¹⁸Haˀ aw Israyel, ki ki slimiɗ ar micikavu a hirnga ɗike ta, ar migi ɗike ta, ki puyuk hirnga le ti Buymisemuŋ muvuluw siifa.

¹⁹Bumbulvuŋ a pura keɗ keɗ na, ziri naŋ mizilehey ati mongosohoy ara singiram ara, a zla a hirsa taŋ.

²⁰A ɓi: I wuɗo mbiɗi duba avu taŋ, ɓa i pura, da a sa gam mbri nga mbuŋ ka na. I mizli malambaˀhay, i mizli ngi pula taŋ hiri ta.

²¹A slikiɗikiy suloŋ ti mulvuŋ taŋhay na, a slikiɗikiy mevel ti kuli taŋhay misi i gwat lambaˀhay na. Na ya, i wuɗo slikiɗa taŋ suloŋ ti jina sukwi misi i sukwi mupuɗaw ta, yo i wuɗo slikiɗa taŋ mevel ti sukwi manja lesle.

²²Haˀaw, mevel ɗu ara tiɓi ka vu, ara zlizlir hã sesẽŋ ar li ngi mizli mumucahay, ara zuma hirwuy ati gwat ngi raˀahaya gar, ara huhuto dimbasl ngi muwãhaya.

²³I sa jirngisla taŋ bonoy jirngasl jirngasl, i sa mula luvut ɗuwoyo cek ng'ar taŋ.

²⁴Da may a sa sla taŋ zlambar le, vu culok avu vu taŋ, yo jiji ngi ngizla vuhoy, a gaka taŋ bonoy le so na, i sa pulo gwat ɓuh miji vuhoy ati kaw mihimaˀhay ng'ar taŋ.

²⁵Ti vra na, a sa ngizlaka mizli ti maslalam, a haya, mizli a sa micam ti muɗa didak. Muc a sa kiɗa mizli gar, gawlahay ati diilihey, ziri ngi dubahay ati midigilahay ceke.

²⁶Yi ɓi zleˀe: I sa ngizla taŋ kup, i sa susuyumo slimiɗ taŋ, ko mizli asi ruwuyo, a wulkaka taŋ keŋ mata.

²⁷Amma zluwun a giy le ti mesene taŋhay masa singiram ar ya, a sa waka kaɓa i taŋ, a sa ɓam: ‹Miga gwat hana i hirbazla ndra migidaŋ haɗa na, anta i Bumbulvuŋ ta.›

²⁸Israyeley i sukwi ngi mizli misi gwat majuwaka le ngi gi na anta gi ta, i manja lesley.

²⁹Da sinmijileŋ ada zleˀe neˀ avu taŋ na, ɓi hana vuna ara kiɗ mi a maka na, anja a slaka wala nah gu zleˀe.

³⁰Israyeley durmuk na, mesene taŋ purla a gidiɗa taŋ gu mbrike? Israyeley durmuk kuruˀo, mesene taŋhay cuwo agidiɗaka taŋ gu mbrike? Na sey da ya Bumbulvuŋ, mandazlay muwã taŋ na, i vula taŋ le asi haŋ ngi mesene taŋhayvuna far.

³¹Amma mandazlay muwã nga taŋhaya, a ndila mandazlay muwã ngi ndra Israyeleye ta, ko mesene taŋhay vuna a sinaka le.

³²Na taŋ vuna a funaka mizli ngi Sodom ati Gomoro ta. A bam vu ati guva ngi gudubun mayi ɗalak, yo muwuŋ ava.

³³baazla taŋ, naŋ kaɓa muwuŋ ngi kaw, i muwuŋ mihimaˀ ngi kwecesle.

³⁴Gwat ya Bumbulvuŋ miga yaŋŋa, ya miwi di vu weˀ a wuzla gwat ɗuwoy, ngi sa ga taŋ di ani:

³⁵Tapas taŋ masa ndilam na, i sa pula cuwala, i sa ga taŋ gwat weˀe avu malambaˀ taŋ na. Asi hin ngi bonoy taŋ naŋ gweˀe, yo gwat makutuko taŋ, anta zum vu mata.

³⁶Bumbulvuŋ a sa ga kiita da mizli naŋhaya. Amma naŋ masa pura taŋ a hĩhĩyam le, beke asinta, diimu asinta na, a sa pura taŋ geˀ ircece.

³⁷A sa ɓa taŋ: kuli kumoy kum maɗumom avu taŋ tuwa, taŋ a maka?

³⁸Mizli mazumaka mal ngi gwat migam di mikuli taŋhay waɗ masaka mbaazla ngi kuca li taŋhay tuwa taŋ a maka? Anja a slikiɗoko ɓa a luhukum, yo ɓa a cikam vu a hirnga kumo so ayɗi!

³⁹Yawwa, wurenna puraka so, Bumbulvuŋ i ya pal ɗu, pal ɗu kine, ko kuli anta a ciki ɗu ta. Maga ɓa mbur a muc i ya, mavulaŋ siifa i ya. Da i ga waˀa le da mburo na, makufaŋ di i ya. Mbur matiɓi mbur gu tisi haŋ ɗu ada kwa?

⁴⁰Haˀaw, i zuɓa haŋ paɗ a muŋ, i ɓi: «Ya ti siifa ngi sete!

⁴¹Da yi mbusa maslalam ɗu mawucuɗ plik plik na le, i duduɓa haŋ ɗu le ngi ga bonoy da mesene ɗuwoy na, i sa pula cuwal ɗu avu taŋ. Yo mizli mahirsikiy na, a sa lumaka bonoy nah.

⁴²Maslalam ɗu a sa zuma meficek ngi vu taŋ. Luvut ɗuwoy a sa wam ti pumbus taŋ, ko migi vurum masa lih pal anta, misi waˀahay malla mijaka taŋ ti ji, a sa gam bonoy cek.»

⁴³Anja birngiŋ a mumul ati mizli ngi Bumbulvuŋhoyo, asi a wuɗ a pula cuwal ngi pumbus ngi gawla naŋhaya, a sa pula avu mesene naŋhay. A sa zuɓa hiryi ngi ruwuy naŋ ati ngi mizli naŋhaya kahana.

⁴⁴Ti Moyis a soko ati Zozuwe mangal ngi Nuno, a ɓaka mingiɓi hana da zigiduwo ti dimis zleˀzleˀ.

⁴⁵A dirba Moyis miɓa mingiɓi hana cek da Israyeley a kiɗ mi le na,

⁴⁶a ɓa taŋ: «Mingiɓi ya maɓukum taŋ dana ani na, ki jaka taŋ ti sefel ta. Ɓaka ɗaˀ ɗaˀ da dideˀ kumoyo, ɓa a gam slra ti mingiɓi ngir ɓimujuwa hana.

⁴⁷Asi i mingiɓi ngi sefel avu kumo ta, mingiɓi hana i siifa kum. A ruwuy kum masa tiɓaka a dubazaw Zurdeŋ na, masa jukum hutuŋ subur ara, i nah.»

⁴⁸Tapasa kalla, Bumbulvuŋ a ɓa Moyise na:

⁴⁹«A ra jiɗ nga muwã Abarim mitilɓiŋ tilɓiŋ, muwã Nebo misi a ruwuy Moˀap misek duba cakay ati Zeriko na. Ki sa puro hirwuy Kanaˀan baɗ a diga, i hirwuy ya masa vula da Israyeley na, ɓa a ndir da taŋ tuwa.

⁵⁰A dirba nah, kisa muc a muwã, ka mijiɗ ng'ara vuna, kisa ra luuma dideˀ ɗikey, kaɓa sukum ɗik Aroŋ mumuc a muwã Hor, dar ara luuma dideˀ naŋhay na ya.

⁵¹Asi mike na, kum ati Aroŋ, ki gam malambaˀ madiɗa le avu ya a mbuŋ Israyele. Vur ɓi ngi yam ngi Meriba a Kades, a wuzlaɓuh mikirɗak kirɗak ngi Siŋ. Tapasa, Bumbulvuŋ i ya na, ki bigaka a wuzla Israyeleye ta.

⁵²Vurˀe, hirwuy ya mawuɗ i vula da Israyeley na, kisa pura deŋ kileŋ, amma ka vuna, k'anta sa ci ara ta.»