Read South Giziga DEU 33 Bible Online

DEU 33 - South Giziga bible

DEU 33

¹Moyis mbur ngi Buymisemuŋ, ɓa a sa muc tikeˀe na, a ɗuwula mi da Israyeley ani:

²A ɓi: «Buymisemuŋ a so ti muwã Sinaya, a slikiɗo ka pas mabawa baɗ tir vay ruwuy Seˀire, vur taŋ, a cuɗuko mizli naŋhaya baɗ a muwã Paraŋ. A so ng'avi mizli naŋhay, modrohoy durmuk mbeˀmbeˀ aseˀe. ɓimujuwa matiɓi njilim njilim kaw a haŋ.

³Haˀaw, Bumbulvuŋ a wuɗ sukwi Israyele, mizli nga naŋhay cek taŋ asi haŋ naŋ. A cikilam le cek asi sar naŋ, ara dubuna taŋ gwat.

⁴Moyis a vula ndra ɓimujuwa le, i zlili mupuɗaw ngi dideˀ ngi Zakopoy.

⁵Ti buy ngi mizli ati sukwi Israyeley micikilam na, a sinaka le, Bumbulvuŋ i Buy madiɗa ngi Yesuruŋ [4]»

⁶Moyis a ɓi ma: «Anja sukwi ngi Ruben a ndir ti siifa, ko da taŋ haɗa ta tekeɗe, anja a kiɗ ta ndiɗaˀ.»

⁷Moyis a ɓi vur sukwi ngi Zuda na: «Bumbulvuŋ, cin Zuda maziluw, jumoˀay ngi mizli Yudehey ati sukum taŋhayamuŋ. A ra cikam vu hirdam hirdam ti haŋ taŋ, da mesene taŋhay a zlaka taŋ le na, jini ˀis asi taŋ.

⁸Moyis a ɓi vur sukwi ngi Levi na: «Bumbulvuŋ, Tumim ati Urim ɗike, i ngi gawla ɗikey miteŋteŋ, dideˀ ngi levihey, ka mici a kwacay taŋ a Masa[5], waɗ ka mijigin mi avu taŋ a Meriba na.

⁹Taŋ a ɓam vur cine ati mumuŋ taŋhaya: i puraka taŋ ta. A ngumam si na sukum taŋhaya ta a kam slimiɗ ar ziri taŋhaya ta. Amma a jaka mingiɓi ɗike le a hirnga, ara kam slimiɗ ar jumoˀay ɗike.

¹⁰I taŋ madubunaka ɓimuɗuva ngir ɓimujuwa ɗikey da Israyeleye, i taŋ magukuw sedege ti urdi ati mikuli mizlam zlam wãˀ ar li gi mikuli ɗike.

¹¹Bumbulvuŋ, ɗuwula taŋ mi ɓa a ndiram wirwir, tiɓa gwat ngi gi taŋ, mesene taŋhaya maslikiɗam lak lak ng'ar taŋ na, ngila taŋ vu, ɓa mihiris taŋhay, a slikiɗam ng'ar taŋ mata ndiɗaˀ.

¹²Moyis a ɓi vur dideˀ ngi Benjameŋheye na: «Sukwi ngi Benjameŋ i yeme ngi Bumbulvuŋhoy, ara pulam vu avu Bumbulvuŋ taŋ, ara jigina taŋ vur hin gar, yo a pa hay naŋ le a wuzla taŋ a muwã.»

¹³Moyis a ɓi vur dideˀ ngi Zozefeye na: «Bumbulvuŋ a ɗuwula mi le da hirwuy taŋhaya, ara ji wulngar, yo yam ara bo tir mijileŋ ngi ruwuyo.

¹⁴Pas ara gila gwataya, vur kiya gar na, gwatay ara naham mekelem mekelem.

¹⁵Hirwuy vay muwã magalahay ara gam gwat mezlehey, li miɗigaray, i li mezle ngi gi gwata.

¹⁶Anja gwat mezle mundus ruwuyo, yo gi mezle ngi Buymisemuŋ misi ar siziɓ na, anja a pi nga hirnga sukwi ngi Zozefe, naŋ mbur muwuna i buy ngi sukum naŋhay.

¹⁷Zozefe, naŋ gidaŋ kaɓa gusoŋ modogom, ɗuvakaŋ hirnga, durum naŋhaya taŋ gidaŋ kaɓa ngi mbana, a kiɗ di mizli. A ɓula taŋ sesẽŋ asi ruwuy mira kiɗo mi. Durum pal mekeleme, i sukwi masluf ta ngi Efrayim, yo numuŋ kwana, i sukwi mudurmuk mbeˀmbeˀ ngi Manase.»

¹⁸Moyis a ɓi vur dideˀ ngi Zabuloŋ ati Isakara na: «Zabuloŋ, mumul asi slra ɗik ngi terere na. Ka kwana Isakar, mumul asi ka mapul vu ar guɗuk ɗik na!

¹⁹Ki ziloko mizli nga hirnga muwã mipal, ɓa ngi gi mikuli kaɓa ɓi micica ɓi nah, asi ki boko ti zlili kumo tir mubuliy, yo gwat kum muwam di vu, tir muyuŋ.»

²⁰Moyis a ɓi vur dideˀ ngi Gataya na: «I ga sise da Bumbulvuŋ muvula li mifirndiw da Gat na! Gat a hin le tup kaɓa mobor, useˀ naŋ mija na, a zlaha zle avu sar ngi mbuŋhoy hã sesẽŋ avu hirngaŋ.

²¹Gat a lum hirwuy vay mezleŋ, muwam di vu da buyoy. A jum ng'avu buy ngi mizli. Gwat Bumbulvuŋ mujuwa ngi gi na, a ga le. Yo ɓi Buymisemuŋ miɓa ɗaˀ ɗaˀ na, a ɓa le da Israyele.»

²²Moyis a ɓi vur dideˀ ngi Daŋhaya na: «Daŋ, naŋ kaɓa gawla mobor mamul kwiɗ ti Basaŋ.»

²³Vur dideˀ ngi Neftaliheye, a ɓi na: «Gi mezle naŋ sirit hirnga ngi Neftali, Bumbulvuŋ a mbaŋ le ti ɗuwula mi naŋ. Anja a cifi nga naŋ kini ngir tisi pas ngi pastaˀ waɗ tir vay ruwuy!»

²⁴Moyis a ɓi vur dideˀ ngi Asereye na: «Aser, anja ki ndir ki mangal ɗuwula mi le a wuzla ziri ngi Zakopoyo gar! Anja sukum ɗikey a gukuw mezle! Anja tutumbur ɗike, a tuwuy zuŋ hã ki bun di sar.

²⁵Anja ki ɗum avu mesene ɗikeye a duba miviŋ ngi ɓiri ho gar malla ngi ɓiri gaza. Anja ki ndir gidaŋ gidaŋ ar hin ngi siifa ɗik gar.»

²⁶A dirba nah, Moyis a ɓi ma: «Yesuruŋ [6], kuli mibam vu ati Bumbulvuŋ ɗike anta! Naŋ ti gidaŋ, a ngiro muŋ ati gazlavaya cããt, ara sawa nga jini ɗike.

²⁷Buymisemuŋ i li ɗum ɗik diga zlezle, naŋ gidaŋ zle misi nga dana ta ar slra naŋ a ruwuy aka. Maɓula mesene ɗikey a mbuŋ ɗik i naŋ, yo a ɓuw ɗaˀ na, ki ngizla taŋ pay.

²⁸Israyeley a paka haya le, a roko setette, dideˀ ngi Zakopoy a ɗumom le angi hirwuy misi daw ati gudubun magi haɗa, mbele wulngar mapo ti muŋ.

²⁹Kum Israyeley mumulom! Kum sukwi ngi Bumbulvuŋ muluhukum le, Bumbulvuŋi mbarayngi tika hiri kum, yo i maslalam kum ngi luuma bugawla. Ti mesene kumoy masa cufuɗam ti mi ngi gukum gilaw na, kisa kirpaka huhumo vu taŋ na asi sar.»