Read South Giziga DEU 34 Bible Online

DEU 34 - South Giziga bible

DEU 34

¹Moyis a jiɗ zle ar li micay ngi Moˀapa ngir ti muwã Nebo, ng'ar mesengel ngi Pisga, misek duba cakay ati Zeriko. Bumbulvuŋ a bigaŋ hirwuyo gar: zle ar vay Galaˀat hã sesẽŋ a Daŋ.

²Hirwuy Neftali cek cek, hirwuy Efrayim ati Manase, waɗ hirwuy Yude cek cek hã ar mubuliy Mediterane.

³A bigaŋ li vay Negev, sozo ngi Zurdeŋ, walahay Zeriko, walahay ngi dibinojehey hã sesẽŋ a Soˀar.

⁴Dar Bumbulvuŋ a ɓaŋ: «Hirwuy ya miɓa Abraham ɗaˀ le, Izak waɗ Zakop ti hudum, I sa vula da dideˀ kumoy tuwa na, hirwuy nah n'ani, i buguw di ɓa ki pura ti hiri ɗiki keɗ keɗ, amma k'anta sa ci ara ta.»

⁵Dar Moyis, gawla ngi Bumbulvuŋ a muc a diga, a ruwuy Moˀap, ka Bumbulvuŋ miɓa tuwa.

⁶Buymisemuŋ a dika ti haŋ naŋ ar sozo ngi Moˀap, sek duba cakay ati Bet-Peˀor, ko mbur loŋ misina li ngi zivi naŋ anta, hã dana.

⁷Moyis a muc ti vi skat ti kukur cuw, ti hiri naŋ ɗeŋ ɗeŋ, ti naŋ gidaŋ gidaŋ kine.

⁸Israyeley a gam hin kukur makir ar li tuwa Moyis ar li micay ngi Moˀapa. Dar hin ngi tuwa vagay a kiɗ mi.

⁹Zozuwe, mangal ngi Nuno, a nih le ti wuluk ngi sinmijileŋ, asi Moyis a paŋ haŋ le a hirnga. Zle tapasa, mizli Israyeley a cinakaŋ mi, a sipaka jiviɗe kaɓa Bumbulvuŋ miɓa ɓi naŋ ɗaˀ le zleˀe da Moyis tuwa.

¹⁰Ko mijiviɗ misi ka Moyis a sli ɗaˀ asi ruwuy Israyele mata. Asi naŋ, a ɓam ati Bumbulvuŋ hiri taˀ taˀ.

¹¹Naŋ, Bumbulvuŋ a slinaŋ nga gi gwat mabigi gwat mekelemey ati gwat migam ɗaˀ tahay asi ruwuy Ezipte, a mbuŋ buy madiɗa ngi Ezipte ati gawla naŋhay waɗ a mbuŋ mizli naŋhay gar.

¹²Moyis a ga gwata ti gidaŋ naŋ wãˀ, a gi gwat ngi muɗa didak a mbuŋ Israyele gar.