Read South Giziga DEU 4 Bible Online

DEU 4 - South Giziga bible

DEU 4

¹Moyis a ɓi ma: «Israyeley, wurenna, ɓimuɗuva ati sirikey, ya mudubunukum taŋ ti haŋ ɗu na, cinaka taŋ kuy kuy, ɓa ki gam taŋ slra: naɓa kisa ndiram ti siifa, yo hirwuy Bumbulvuŋ, Buymisemuŋ ngi cine kumoy muvulukum di na, kisa cam, ki cifam araŋ.

²Ɓimuɗuva ngi Bumbulvuŋ Buymisemuŋ kum, ya muvulukum di na, ki cam ɓi mekelem ng'ara ta, yo ki zuɓam avra ta ma, amma gam di slra kuy kuy.

³Gwat Bumbulvuŋ miga da Baˀal-Peˀor na, ki puraka le ti hiri kumo ta kwa? Mizli misipaka Baˀal-Peˀor gar na, Bumbulvuŋ Buymisemuŋ kum, a ngizla taŋ le pay.

⁴Amma kum mindiram teŋteŋ avu Bumbulvuŋ Buymisemuŋ kumo na, ki roko cek ti siifa dana.

⁵Puraka, i ra dubunukum ɓimujuwa ati sirikeye, kaɓa Bumbulvuŋ Buymisemuŋ ɗu miɓiy di na, da kum misa ndilam le angi hirwuy kum masa tiɓaka da kum na, naɓa kisa gam taŋ slra.

⁶Da ki ra jaka taŋ a hirnga, yo ki ra gam taŋ slra na, masa vulukum sinmijileŋ ati lesl i nah.» Mizli misa cinaka ɓimuɗuva tayna le cek na, a sa ɓam: «Sukwi madiɗa hana, sinmijileŋ ava haɗi, lesl ava haɗi!»

⁷Naŋ kine, da ndra mira zilaka Bumbulvuŋ Buymisemuŋ ndra, ɓa a jina ndra gar na, naŋ da gweˀ a ciki ndra. Sukwi mekelem misi kuli taŋ a kiroho gweˀ avu taŋ kaɓa Buymisemuŋ ndra na, ada kwa?

⁸Ɓimujuwa ya mavulukum di dana ani na, naŋ jeŋŋe. Ɓimujuwa ati sirikey mijeŋŋe kaɓa misi angi ɗerewol ya mabugukum di hana, sukwi madiɗa mekelem misi ti naŋ ada kwa?

⁹Moyis a ɓi ma: amma jam lesl, anja ki puyukom hirnga ti gwat kum mupuraka ti hiri kum na ta. Anja ki ndiram di keŋŋe ngi set a hirnga. Dubunaka da ziri kumoy ati dideˀ kumoyo.

¹⁰Tapas kum ɓi micicam dedeŋ a mbuŋ Bumbulvuŋ Buymisemuŋ kumo a Horep na, wulkaka kwaɗay. Bumbulvuŋ a ɓiy na: «Cikilo mizli nga mbuŋ ɗu. I wuɗ i ɓa taŋ mingiɓi ɗuwuyo, ɓa a cinam, ɓa a dubunaka ciniy mi ar siifa taŋ a ruwuyo, yo ɓa a dubunaka da ziri taŋhaya, ɓa a gam kanah ya.»

¹¹Dar tapasa, ki kirohoko dedeŋ a sar muwã: muwã ara tiɓi vu, irne naŋ a jiɗ sesẽŋ a dadala muŋ, baɗ a wuzla cunju miˀerek ˀerek, yo a wuzla gazlavay mititim titime.

¹²Bumbulvuŋ a ɓo kum ti wuzla vu, ki cinaka naŋ maɓi na le ɓula, amma ki puraka hiri naŋ ta, ki cinam di i ˀay naŋ si.

¹³A ɓukum ɓi ngi jumoˀay naŋ ati kumo le, yo a ɓukum ɓa ki gam slra ti ɓimuɗuva naŋhay mukuruˀ na, a toho taŋ le toh toh avu belelerey cuw.

¹⁴Dar Bumbulvuŋ a ɓiy ya ɗaˀ ɗaˀ, ɓa i dubunukum ɓimujuwahay ati sirikeye, ɓa ki gam taŋ slra angi hirwuy kum masa tiɓaka da kum na.

¹⁵Moyis a ɓi ma: Jam lesl kuy kuy, avu ɓi misi ani na, ki puyukom di hirnga ta, tapas Bumbulvuŋ muɓukum ɓi a wuzla vu, a muwã Horep na, ki purakaŋ naŋ vuna ta.

¹⁶Anja ki hiryaka vu kumoy ti ɗiya kulihey ta, ko ngi biga deŋ ngi kuli, misi ka mbur zil malla misi ka ngwasay na, ki ɗiyam ta,

¹⁷ko deŋ ngi sukwi ngi gwat misãmi wanaka misi asi ruwuy, malla deŋ ngi sukwi ngi ɗiyuw wanaka maslikiɗ a muŋ gar na, ki ɗiyam ta.

¹⁸Ko sukwi ngi gwat mislireɓ slireɓey makurmuɗom a ruwuy, malla sukwi ngi kilif ngir yam wanaka gar na, ki ɗiyam ta.

¹⁹Pas, kiya, wurzlaŋhay ati gwat ngi muŋ mekelemeye, da ko ka muzuɓa hiri le nga muŋ ɓa ki singila taŋ na, anja a hizigiɗukuw, ɓa ki huruk huruk a mbuŋ taŋ ta, ki ga taŋ mezegwel ta ma. Asi gwat tayna, Bumbulvuŋ Buymisemuŋ kum, a vula taŋ le da sukwi mekelemey misi asi gazlavay kurzluˀ gar.

²⁰Amma kumo, Bumbulvuŋ a hilo kum, a bo ti kum ti ruwuy Ezipte, hirwuy misi bonoy haɗi ara, ɓa ki tiram mizli nga naŋhay, kaɓa kum misi ani dana na.

²¹Bumbulvuŋ a ji mevel ar ya vur kumo, a hudum, ɓa i tuwuɗa mizaw Zurdeŋ ta, yo ɓa i ci nga hirwuy mezle, Bumbulvuŋ Buymisemuŋ kumo muvulukum di da kum na ta.

²²Naŋ kine, i sa muc asi ruwuy misenna, manja i tuwuɗa mizaw Zurdeŋ. Amma kumo, kisa tuwuɗaka Zurdeŋ, ɓa ki ra cifam asi ruwuy mezle nah.

²³Jam lesl kuy kuy, ɓa ki puyukom hirnga ti jumoˀay Bumbulvuŋ Buymisemuŋ kumo mujumo ati kum na ta, yo anja ki ra ɗiyam kuli ta, sukwi ngi gwat wanaka gar, Bumbulvuŋ Buymisemuŋ kumo mutukukum le ngi ɗiyi naŋ na, ki ɗiyam ta.

²⁴Asi Bumbulvuŋ Buymisemuŋ kumo, naŋ kaɓa vu mazuma li, i Buymisemuŋ mawuɗ vu suloŋ suloŋ.

²⁵Da kum misa cifam le, ki zikam le angi hirwuy muvulukum di tuwa, yo ki yam ziri le, ki ra zilam dideˀ muduba na, ki cam ar mungra ngi ɗiya kulihey ta, ko sukwi ngi gwat wanaka ngi huruk huruk ava gar na, ki ɗiyam ta. Ki gam malambaˀ a mihiri ngi Bumbulvuŋ Buymisemuŋ kumo, ɓa hã a jaŋ mevel ta.

²⁶Da ki gam mungra misi ka tayna le na, yi ɓukum ɗaˀ ɗaˀ le so tuwa, sedewo ɗuwoy dana, i muŋ ati hirwuy: Hirwuy kum masa tiɓaka da kum a dubazaw Zurdeŋ na, kisa susuymom anga kutum si, kum anta sa zikam anga haɗa ta, a sa ngizlukum pay.

²⁷Bumbulvuŋ a sa zliɗukum hirnga mber mber nga wuzla mizli. Hirwuy Bumbulvuŋ misa ru ti kum le na, sukwi kum a sa ndir a diga neˀkini.

²⁸A diga, kisa huruk hurukam a mbuŋ kulihey, mizli miciɗaka taŋ ngi dum malla ngi ɗuguroy. Kuli tayna, a puram ta, a cinam ta, a zumam gwat ta, yo a zãˀãm hutuŋ ta.

²⁹Angi hirwuy tayna, kisa zlaka sipa Bumbulvuŋ Buymisemuŋ kumo. Da ki ra sipaka ti mevel purla, ti membezleŋ ngi vu kum wãˀ na, kisa lumakaŋ.

³⁰Nga mbuŋ, da gwat ya muɓukum t'ani na gar, a gam le, ki roko ar bonoy so na, kisa moko ng'avu Bumbulvuŋ Buymisemuŋ kumo, joˀ kisa cinakaŋ mi a muŋ.

³¹Asi Bumbulvuŋ Buymisemuŋ kumo, Buymisemuŋ mapur ircece haɗi, anta sa pulukum fuk ta, anta sa ngizlukum pay ta, naŋ anta sa puyuk hirnga ti jumoˀay, naŋ mujumo ati dideˀ kumoy na ta.

³²Moyis a ɓi: Wulkaka gwatay migam zlezle zleˀe, ti taŋ muyukum t'aruŋ, zle ti Buymisemuŋ miga mizli a ruwuyo, yo wulkaka gwatay migam ar duniya zlar: gwat madiɗa misi kanah migi ada kwa? Kiɗa slir ngi gwat kanah, i cinam le ɗaˀ kwa?

³³Sukwi ngi mizli micinam ˀay ngi kuli mabo ti wuzla vu, kaɓa kum micinaka ngi Buymisemuŋ na, a ndiram le ti siifa na, ki puram le ɗaˀ kwa?

³⁴Malla kuli muguf ɗaˀ ngi tuɓo mizli naŋhaya, tisi haŋ ngi mesene taŋhay ti ga taŋ bonoy, ti gi cekenehey ati gwat migam ɗaˀ tahay, ti gi vurum, ti haŋ naŋ migidaŋ, ti hirbazla paɗ a muŋ, ti gi zluwun haɗi da mizli, kaɓa Bumbulvuŋ Buymisemuŋ kumo mgukum di, mur kum a Ezipte na, ki puram le ɗaˀ kwa?

³⁵Kumo ki bam ti jiŋ le, ki puraka gwat tayna le, ɓa ki sinaka Bumbulvuŋ i Buymisemuŋ, mekelem mbak naŋ le na, anta mata.

³⁶A ɓo kum paɗ ti muŋ, ɓa ki cinaka ˀay naŋ, madubunukum cine mi asi ruwuyo, a bugukum vu matiɓi njilim njilim, yo ki cinam mingiɓi naŋ le ti wuzla vu.

³⁷Bumbulvuŋ a wuɗ dideˀ kumoyo le, vurˀe, a wunukum, kum ziri taŋhay a dirba taŋ na, aseˀe. Yo naŋ vuna ti haŋ naŋ, a bo ti kum tisi ruwuy Ezipte ti gidaŋ naŋ mihaɗa na.

³⁸Wurenna, sukwi madiɗa mifineˀ kumo, yo migidaŋ haɗa fineˀ kumo na, a sa ɓula taŋ mber mber a mbuŋ kumo, a sa ci ti kum ng'asi hirwuy taŋhaya, ɓa a vulukum di da kum, kaɓa naŋ magi dana avu kumo.

³⁹Sinaka sin le dana, yo wulkaka ndrehhe: Bumbulvuŋ naŋ purla, i Buymisemuŋ, naŋ ar birngiŋ a muŋ waɗ a ruwuyo ma, yo mekelem mbak naŋ le na, anta mata.

⁴⁰Ɓimujuwa ati ɓimuɗuva naŋhay, ya maslufukum taŋ dana ani na, gam taŋ slra, ɓa kum vuna ati dideˀ kumoy nga mbuŋ, kisa mumulom haɗi, yo kisa ndiram hutuŋ subur, a hirwuy Bumbulvuŋ muvulukum di ngi set na.

⁴¹Akẽh so na, Moyis a wini walahayay makir, tisi pas ngi miprik ngi mizaw Zurdeŋ,

⁴²i walahay ngi sa ɗum ar taŋ. Da mbur a kiɗ hirnga le, a ga waˀ waˀ ta, yo a ja mbur nah a kwacay zleˀe ta ma na, ara ɗum ar walahay pal asi taŋ, naɓa a laha hutuŋ naŋ le.

⁴³Walahayay vuna t'ani: ngi mizli Rubeneye, i Beser misi ar li ɗigar micay a wuzlaɓuh mikirɗak kirɗak. Ngi mizli ngi Gataya, i Ramot a Galaˀat. Ngi mizli Manaseheye, i Golaŋ misi a Basaŋ.

⁴⁴Moyis muslufa ɓimujuwa da Israyeley na i hana so.

⁴⁵A dirba Israyeley muboko ti ruwuy Ezipte na, ɓi micica, ɓimujuwa waɗ ɓi ngi sirikeye, Moyis a slufa taŋ di ˀay paɗ a muŋ.

⁴⁶Naɓa taŋ tisi pas ngi miprik ngi Zurdeŋ, ar sozo misek duba cakay ati Bet-Peˀor, angi hirwuy ngi Sihoŋ buy madiɗa ngi Amorihey. Sihoŋ naŋ zleˀe a Heseboŋ. Moyis ati Israyeley muboko ti ruwuy Ezipte tuwa na, a kiɗakaŋ, a tikakaŋ ˀay,

⁴⁷a tiɓaka hirwuy naŋ waɗ hirwuy ngi Ok buy madiɗa ngi Basaŋ ma. A dubazaw Zurdeŋ tisi pas ngi miprike, buy ngi Amorihey i taŋ cuw taŋ.

⁴⁸Israyeley a tiɓaka li vay nah na, zle a Aroˀer misi a ciki sozo a Arnoŋ, hã sesẽŋ a muwã Hermoŋ, a zilaka Siyoŋ ma.

⁴⁹I li mizli zle ar sozo misi tisi pas ngi miprik ngi Zurdeŋ, hã sesẽŋ ar mubuliy mumuca, misi a sar muwã Pisga.