Read South Giziga DEU 5 Bible Online

DEU 5 - South Giziga bible

DEU 5

¹Moyis a zila Israyeley gar, a ɓa taŋ na: «Israyeley, cinaka ɓimujuwa ati sirikey ya mawuɗ i ɓukum di dana. Ki sa dubunaka taŋ, yo ki kam slimiɗ kuy kuy ar taŋ, ɓa ki gam taŋ slra.

²Bumbulvuŋ Buymisemuŋ ndra a jumˀay le ati ndra a muwã Horepe.

³Bumbulvuŋ a jumˀay na, anta ati dideˀ ndrahay ta, amma ati ndra, ndra misi ti siifahay dana ani na.

⁴Bumbulvuŋ a ɓi ɓi le ati kumo hiri taˀ taˀ ti wuzla vu a muwã.

⁵Naɓa yi ro deŋ ar wala kum ati Bumbulvuŋ, i ra mbuɗukum ɓi ngi Bumbulvuŋ. Asi ki ra zluwunam a ciki vu, yo ki jiɗam nga muwã ta ma. Bumbulvuŋ a ɓi na:

⁶«I ya Bumbulvuŋ Buymisemuŋ ɗik mubo ti ka tir beke baɗ ti ruwuy Ezipte.

⁷Buymisemuŋ mekelem mbak ya le na, anta.

⁸Ki ɗiyi kulihey ta, wuyta na, gwat mibam vu ati gwat misemuŋhoy, wuyta na, gwat mibam vu ati gwat ngi ruwuyoy, wuyta na, gwat ngisi yamay, ko ki ɗiyi ta.

⁹Ki huruk a mbuŋ kuli tayna ta, yo ki huruk huruk a mbuŋ taŋ ta. Asi Bumbulvuŋ Buymisemuŋ ɗik i ya, yi Bumbulvuŋ mawuɗ vu suloŋ suloŋ. Da mbur a giy mungra le na, i kutaŋ ti bonoy ati ziri naŋhaya, da a hirisikiy le na, i kuta taŋ hã avu dideˀ ngi poprok hã avu dideˀ ngi misintiwaka.

¹⁰Amma mizli mawuɗikiy, majaka ɓimuɗuva ɗu a hirnga na, i ga taŋ mezle hã dideˀ dideˀ durmuk mbeˀ mbeˀe.

¹¹Ki zila slimiɗ nga ya Bumbulvuŋ Buymisemuŋ ɗike lambaˀ lambaˀ ta. Asi mbur mazila slimiɗ ɗu lambaˀ lambaˀ na, y'anta pulaŋ manja i kutaŋ ti bonoyo ta.

¹²Ji lesl ɓa hin ngi Sabat a ndir inga ya, kaɓa ya Bumbulvuŋ Buymisemuŋ ɗik muɗuvuw ɓi naŋ na.

¹³Hin merkeɗ i ngi gi slra, ga slra ɗikeye gar angaŋ.

¹⁴Amma hin mitarnaˀ naŋ na, i Sabat, hin nga ya Bumbulvuŋ Buymisemuŋ ɗik. Ki gi slra ta, ko ka, ko mangal ɗik, ko zuŋ ɗik, ko gawla ɗik, ko ngwas migi slra ɗiki, ko sla ɗik, ko zungu ɗik, ko ginew ɗik wanaka gar, ko moholoy ngir walahay ɗikey. Kanah na, ɓa gawla ɗik ati ngwas migi slra ɗikeye, a musukam vu kaɓa ka vuna ya.

¹⁵Ka zleˀe, ki beke a hirwuy Ezipte, ya Bumbulvuŋ Buymisemuŋ ɗik i bo ti ka ti nga, mbele gidaŋ ɗu na. Ya Bumbulvuŋ Buymisemuŋ ɗik muɓuw ɗaˀ, ɓa ki ja ɓi ngi Sabat na vurˀe.

¹⁶Ɗuva hirnga da bunuk ati munuko, kaɓa ya Bumbulvuŋ Buymisemuŋ ɗik muɗuvuw ɓi naŋ na, ɓa ki zik haɗi ti siifa, yo ɓa ki ndir ar wuya asi hirwuy Bumbulvuŋ Buymisemuŋ ɗik muvuluw di na.

¹⁷Ki kiɗ hirnga ta.

¹⁸Ki gi madama ta.

¹⁹Ki hul ta.

²⁰Ki gi sedewo ti slir a hirnga mbur cil ɗike ta.

²¹Anja gwat ngi mbur cil ɗik a guw hiri ta, ko ngwas naŋ, ko hay naŋ, ko guva naŋ, ko gawla naŋ, ko ngwas migi slra ngi hay naŋ, ko sla naŋ, ko zungu naŋ.»

²²Ɓimuɗuva tayna, Bumbulvuŋ a ɓukum di le ti ˀay bok, ti wuzla vu a muwã, cunju tirslik waɗ gazlavay titim titim. A ɓukum di da kum mizli Israyeley, kum micikilam a sar muwã, ko a ɓo ɓi mekelem nga hirnga nah ta. A dirba nah, a toho taŋ nguɗ nguɗ avu belelerey cuw, a vuliy taŋ da ya.

²³Moyis a ɓi ma: Ti kum micinaka ˀay maɓo tir luvuŋ, a muwã matiɓi vu na, buy ngi sukwi kumoy gar waɗ mizli micawwa kumoy, a kirohoko ng'avi ya,

²⁴joˀ ki ɓam na: «Bumbulvuŋ Buymisemuŋ ndra, a biga dudok naŋ ati madiɗa naŋ le a mbuŋ ndra, i cinaka ˀay naŋ le ti wuzla vu. Dana ani na, Buymisemuŋ maɓa ɓi da mburo, manja mbur a muc na, i puraka le muduba.

²⁵Na i pulaka vu ndra mbak da vu mihilɓiɓ mihaɗa na, a zuma ndra vur mike? Da i ra cinaka ˀay ngi Bumbulvuŋ Buymisemuŋ ndra ɓula si na, naɓa i sa micam.

²⁶Mbur a cin ˀay ngi Buymisemuŋ misi ti siifa maɓaŋ ti wuzla vu, kaɓa ndra micinaka na, ɓa naŋ da ti siifa na, ko i cinam ɗaˀ ta ndiɗaˀ wãˀ.

²⁷Moyis, ka kirih ng'avu Bumbulvuŋ Buymisemuŋ ndra, cine mingiɓi naŋ maɓa, ɓa kisa ɓa ndra di ya, i sa cinakaŋ, i sa gam di slra.»

²⁸Bumbulvuŋ a cine mingiɓi kum miɓikiy di na le gar, a ɓiy na: «Mingiɓi mizli Israyeley muɓukuw di gar na, i cine le. A ɓaka le kuy.

²⁹Da a juwam vu le ngi caˀa, ɓa a zluwunam ti ya, ɓa a jaka ɓimuɗuva ɗuwoy a hirnga na, naɓa taŋ ati ziri taŋhay a sa ndiram ar wuya hã ngi sete!

³⁰Aru, ara ɓa taŋ wurenna, ɓa a mam ng'ar guɗuk taŋhay!

³¹Amma ka, ndir a ciki ɗu aka, i sa ɓuw ɓimuɗuva ɗuwoy gar, ɓimujuwahay ati sirikeye, ɓa ki dubuna taŋ di, ɓa ara gam di slra a hirwuy ya masa vula taŋ di, ɓa a ndir da taŋ na.»

³²Moyis a ɓa Israyeley ava ma: Tumom vu ngi gi gwatay Bumbulvuŋ Buymisemuŋ kumo muɗuvukum ɓi nah na, ki ngizlam ava ta, ti hazum ta, ti gula ta.

³³Sipam ndrehhe i jiviɗ Bumbulvuŋ Buymisemuŋ kumo mubugukum di na si, naɓa kisa ndiram ti siifa, kisa ndiram ar wuya, yo kisa ndiram hutuŋ subur a ruwuy masa ndir i ngi kum na.