Read South Giziga DEU 6 Bible Online

DEU 6 - South Giziga bible

DEU 6

¹Moyis a ɓi ma: Ɓimuɗuvahay ati ɓimujuwahay waɗ sirikey, Bumbulvuŋ Buymisemuŋ kumo muɗuviy ɓi nah, ɓa i dubunukum taŋ na, ani: A wuɗ ɓa ki ra gam taŋ slra a ruwuy masa ndir i ngi kum na.

²Naŋ kine, ar kum misi ti siifa aruŋ gar na, kum ati ziri kumoy waɗ dideˀ kumoyo, zluwunam ti Bumbulvuŋ Buymisemuŋ kumo, yo ɓimuɗuvahay ati ɓimujuwahay ya maɓukum taŋ gar na, jaka taŋ a hirnga, ɓa ki zikam haɗi a ruwuyo.

³Israyeley, cinaka ɓimuɗuvahaya, yo wam vu, ɓa ki gam taŋ slra. Naɓa kisa ndiram ar wuya, kisa sikam haɗi angi hirwuy misi ɗuwa ati mam maɓulom anga na, kaɓa Bumbulvuŋ, Buymisemuŋ ngi dideˀ kumoy muɓukum di ɗaˀ le tuwa.

⁴«Mizli Israyeley, cinam ɗi: Bumbulvuŋ, Buymisemuŋ ndra pal i naŋ.

⁵Wuɗ Bumbulvuŋ Buymisemuŋ ɗike ti mevel ɗik wãˀ, ti membezleŋ ngi vu ɗik wãˀ, waɗ ti gidaŋ ɗik wãˀ.

⁶Mingiɓi ngir ɓimuɗuvahay, ya muɓuw taŋ dana ani na, anja a ndiram a mevel ɗike.

⁷Ki sa mahiri nah da ziri ɗikey, kisa ɓa taŋ di ti ka micifi le a hay ɗiki, ko ka maru a jiviɗi, ka mutupu, malla ko ka mislikiɗ le deŋ.

⁸Ki sa juwa taŋ kaˀ avu hirbazla ɗik malla a midibiɗ ɗik, ɓa ki puyuk taŋ hirnga ta.

⁹Ki sa toho taŋ toh toh avu dum ngi miviŋ ngi hay ɗik waɗ avu mizlingre ngi walahay ɗike.»

¹⁰Moyis a ɓi: Dideˀ kumoy, Abraham, Izak waɗ Zakop Bumbulvuŋ Buymisemuŋ kum, a ɓa taŋ le ti hudum, a sa vulukum hirwuy. Da naŋ misa ru ti kum le a diga na, kisa lumam walahay madiɗa mezlehey, misi i kum mindiraka taŋ ta,

¹¹hayay mundus ndus ti sukwi ngi gwat mezlehey, misi i kum mipaka taŋ ta, vigiɗ ngi yam milahay le si, i kum milaka taŋ ta, guva ngi tutumbur ati ngi gudubun mihirvahay le si, i kum mihirvaka taŋ ta. Da kum muzumam, ki mbam le so na,

¹²anja ki jam lesl kuy kuy, Bumbulvuŋ mubo ti kum tir beke, a hirwuy Ezipte na, ki puyukom di hirnga ta.

¹³Ki cinakaŋ mi, ki huruk hurukam a mbuŋ naŋ pal naŋ. Ki hudumom sey ti slimiɗ naŋ.

¹⁴Dilikam a mbuŋ naŋ, mbak a mbuŋ kuli ngi mizli mugun hirnga kum na le.

¹⁵Asi Bumbulvuŋ Buymisemuŋ kumo misi a wuzla kum na, i Buymisemuŋ mawuɗ vu suloŋ suloŋ, a wuɗ mandir i naŋ pal naŋ. Jam lesl, anja ki gakaŋ gwat ngi ji mevel ta, vur naŋ masusuyumukum asi ruwuyo leɗeɗ wãˀ.

¹⁶Ki cam a kwacay Bumbulvuŋ Buymisemuŋ kumo, kaɓa kum micam a Masa na ta.

¹⁷Ɓimuɗuvahay, ɓi ngi dubunoy waɗ ɓimujuwa ngi Bumbulvuŋ Buymisemuŋ kumo muvulukum taŋ na, jaka taŋ a hirnga kuy kuy.

¹⁸Gaka gwata cirre ti jiviɗ naŋ, yo kuy kuy a mbuŋ Bumbulvuŋ, ɓa ki ndiram ar wuya, ɓa hirwuy mezleŋ, Bumbulvuŋ miɓa ɗaˀ le ti hudum da dideˀ kumoy na, a ndir da kum.

¹⁹Adiga, kisa ɓulaka mesene kumoyo kileŋ avu kum, kaɓa Bumbulvuŋ miɓa ɗaˀ le tuwa.

²⁰Nga mbuŋ, ziri kumoy a sa cufuɗukum: «Bumbulvuŋ Buymisemuŋ ndra, a vulukum ɓi ngi dubunoy, ɓimujuwahay ati sirikey na vur mike?»

²¹Ki sa mbiɗaka taŋ di: «Ndra zleˀe i beke ngi buy Eziptehey, amma Bumbulvuŋ a bo ti ndra le ti Ezipte ti gidaŋ naŋ haɗa.

²²Bumbulvuŋ a gi gwat mabigam gwat mekelemey ati gwat ngi zuma hirnga mukuyta wãˀ migam ɗaˀ tahay a mihiri ndra. Joˀ a zuwulo mendere ng'ar Ezipte, ng'ar buy Ezipte waɗ ng'ar hay naŋ gar.

²³Na ndra so na, a bo ti ndra ti Ezipte, a so ti ndra nga hirwuy naŋ miɓa ɗaˀ le ti hudum da dideˀ ndrahay, a sa vula ndra di na.

²⁴Bumbulvuŋ a ɗuva ndra ɓi nah, ɓa i gam slra ti ɓimujuwahaya cek, yo ɓa i zluwunam ti naŋ Bumbulvuŋ Buymisemuŋ ndra. Naɓa i sa ndiram ar wuya ndrehhe, yo a sa jigina ndra i ndiram ti siifa kaɓa ndra misi ani dana na.

²⁵Da i ra gam slra ti ɓimuɗuva hana a mbuŋ Bumbulvuŋ Buymisemuŋ ndra na, naɓa i ra gam gwat mijeŋŋe kaɓa naŋ miɓa ndra di ɗaˀ le.»