Read South Giziga DEU 7 Bible Online

DEU 7 - South Giziga bible

DEU 7

¹Moyis a ɓi: Bumbulvuŋ Buymisemuŋ kum, a sa ru ti kum nga hirwuy masa ndir da kum na, yo a sa ɓula sukwi ngi mizli haɗi a mbuŋ kumo, sukwi madiɗa madiɗa tarnaˀ, misi ti gidaŋ fineˀ kum. I Hitihey, Girgasihey, Amorihey, Kanaˀanay, Perizihey, Hivihey, waɗ Zebusihey.

²Bumbulvuŋ Buymisemuŋ kumo a sa vulukum taŋ asi haŋ kum, kisa tikaka taŋ ˀay, ki ngizlaka taŋ pay. Ki ɗiyam ɓi ar wala kum ati taŋ ta, yo ko ki puraka taŋ ircece ta.

³Ki zuɓam vu ar wala kum ati taŋ ta. Ki vulaka ziri diili kumoyo da ziri gawla taŋhay, ɓa a zuɓaka taŋ ta, yo kumo kwana, ki wunam ziri diili taŋhay da ziri gawla kumoyo ta ya.

⁴Naɓa mizli mulak tayna, a sa sirikaka dideˀ kumoyo, ɓa a mbiɗam duba avu Bumbulvuŋ, ɓa a huruk hurukam a mbuŋ kulihey. Yo Bumbulvuŋ kwana, a sa ji mevel ar kum, a sa ngizlukum pay kutum.

⁵Amma gwat kum masa gaka da sukwi ngi mizli tayna, ani jaka: Ki sa mbizlaka li gi mikuli taŋhaya, kisa wahaka ɗugur taŋhay mikaˀ kaˀa, kuli taŋ ɓamtalaya, kisa wahaka taŋ, kuli taŋ miciɗa ti ciɗeye, kisa wuraka taŋ,

⁶asi kum i mizli muvulahay le da Bumbulvuŋ Buymisemuŋ kum. A wuzla mizli ngisi ruwuyoy gar na, Buymismuŋ a wini di i kum, ɓa ki tiram kum i mi nga naŋhay.

⁷Moyis a ɓi: Bumbulvuŋ muslurup slirap ti kum, a wunukum na, anta asi kum haɗa, ki funaka mizli mekelemeye le ta. Na kum neˀkini fineˀ mizli mekelemeye gar jaka.

⁸Amma Bumbulvuŋ a wuɗukum ti wuɗu, a gi di i gwat naŋ miɓa ti hudum a mbuŋ dideˀ kumoy tuwa. Vurˀe, a bo ti kum tir beke baɗ ti hirwuy Ezipte, ti gidaŋ nga naŋ mihaɗa na. A mbuɗo hirnga kumo tivi gidaŋ ngi buy madiɗa ngi Ezipte.

⁹Sinaka sin le, Bumbulvuŋ Buymisemuŋ kumo, Buymisemuŋ mijeŋŋe pal i naŋ. Mizli mira wuɗakaŋ, mira jaka ɓimuɗuva naŋhay a hirnga na, a ga taŋ gwat ngi jumoˀay naŋ na cummo, hã avu dideˀ dideˀ durmuku.

¹⁰Mizli mahirsakaŋ na, a mur ta wãˀ, a kuta taŋ ti kiɗ vagay vagay.

¹¹Ɓimuɗuvahay ati ɓimujuwahay waɗ sirikey, ya mavulukum taŋ dana, ɓa ki gam taŋ slra na, anja ki jaka taŋ a hirnga.

¹²Da ki jam lesl le kuy kuy asi ɓi ngi sirikeye, ki ra gam taŋ slra kuy kuy na, naɓa Bumbulvuŋ Buymisemuŋ kumo, jumoˀay naŋ naŋ miɓa ti hudum da dideˀ kumoy tuwa na, a sa ga cummo ar kum.

¹³A sa wuɗukum, a sa ɗuwulukum mi, a sa sukukum haɗa. Da kum mindilam le a hirwuy naŋ miɓa ti hudum da dideˀ kumoy, a sa vulukum di tuwa na, a sa ɗuwula mi da ziri kumoy, da gwat ngi migam kumoy, alkamari kumoy, mbaazla kumoy ati mal kumoyo. A sa ɗuwula mi da madiya sla ati madiya tumuŋ kumoyo, ɓa a sikam haɗa.

¹⁴A sa ɗuwulukum mi fineˀ mizli mekelemeye. Ko mizli mizilehey, ko ngwasay, ko ginew kumoyo, masa gi dirlay asi ruwuy kum anta.

¹⁵Jijihey ati muc mikiɗa Eziptehey sunok sunok na, kum vuna, ki sinaka le kuy kuy, a sa ɓula taŋ kileŋ avu kumo. N'anta sa slino di ng'ar kumo ta, a sa wi di vu da mesene kumoy.

¹⁶Mizli Bumbulvuŋ Buymisemuŋ kumo muvulukum taŋ le asi haŋ kum gar na, ngizlaka taŋ pay manja ircece. Ki huruk hurukam a mbuŋ kuli taŋhaya ta, vur kuli taŋhay majukum ar kwar.

¹⁷Moyis a ɓi ma: Asinta, kumo kisa wulkam ani: «Sukwi ngi mizli tayna, taŋ gidaŋ fineˀ ndra! I sa ɓulaka taŋ mbri mbrike kwani?»

¹⁸Ki zluwunam ti taŋ ta. Wulkaka gwat Bumbulvuŋ Buymisemuŋ kumo miga da buy Ezipte waɗ da mizli naŋhay gar na kwaɗay.

¹⁹Naŋ miga taŋ bonoy madiɗahay na, ki puraka taŋ le ti hiri kumo takwa? Gwat ngi bigi gwatay ati gwat ngi zuma hirngahay na, ki puraka taŋ le ta kwa? Wulkaka gidaŋ naŋ mihaɗa, naŋ mubo ti kum ti ruwuy Ezipte ti naŋ na. Yawwa! Sukwi ngi mizli kum mazluwunam ti taŋ gar na, Bumbulvuŋ Buymisemuŋ kumo a sa ga taŋ di kanah ya.

²⁰Da ko mizli a laham le purla purla, a ɗumom le avu kumo kwana, Bumbulvuŋ Buymisemuŋ kumo a sa slino taŋ bibirey ng'ar taŋ, ɓa a ngizlaka taŋ pay wãˀ.

²¹Ki jijikam ti mizli tayna ta, asi Bumbulvuŋ Buymisemuŋ kumo, naŋ da a wuzla kumo. I Buymisemuŋ madiɗa magi zluwun da mburu.

²²Bumbulvuŋ Buymisemuŋ kumo a sa ɓula taŋ neˀ neˀ a mbuŋ kumo. Ki ngizlaka taŋ cek kutum gu ta. Vur gwat ngi ɓuhoy masa gam haɗi, a mbuɗoko ng'ar kum, a jukum.

²³Dambalaka Bumbulvuŋ Buymisemuŋ kumo a sa vulukum taŋ asi haŋ kum ngbaŋ. A sa jijikam kər kər ti zluwun, hã ki ngizlaka taŋ pay wãˀ.

²⁴A sa vulukum buy madiɗa taŋhay asi haŋ kum, kisa susuyumoko slimiɗ taŋ wãˀ asi ruwuyo. Ko mbur masa ndir ti siifa a mbuŋ kum anta. Ki sa susuyumoko taŋ pay.

²⁵Akẽh na, kuli taŋhay miciɗa ti ciɗey na, kisa wuraka taŋ. Anja ki pulaka vu kum da may gwat, ɓa zana taŋ ngi ɓiri tapasl tapaslay malla ngi ɓiri barahay na, ki pulaka taŋ da kum ta. Naɓa i mungra mukuyta wãˀ avu Bumbulvuŋ Buymisemuŋ kumo.

²⁶Sukwi ngi gwat miciɗa ti ciɗ tayna, ko ki cam ti taŋ a hay kumo ta wãˀ. Da ki cam ti taŋ le na, naɓa i sa susuyumukum jom ati gwat vuna. Naŋ kine, susuyumoko gwat tayna wãˀ. Anja ki hirsaka taŋ, ki puraka taŋ kuy avu hiri ta.