Read South Giziga DEU 9 Bible Online

DEU 9 - South Giziga bible

DEU 9

¹Moyis a ɓi: Israyeley, cinam ɗi, ki wuɗo tuwuɗaka mizaw Zurdeŋ dana. Ki sa ɓulaka mizli mihaɗi fineˀ kum, yo migidaŋ fineˀ kumo. Ki sa tiɓaka walahay taŋ madiɗahay, mugunohoy gun gun ti mohol migila sesẽŋ a dadala muŋ na.

²Ki sa tikaka ˀay da mizli Anakay, i mizli migidaŋhay, yo suburohoy. Ki sinaka le, mizli a ɓam vur taŋ na: «Mbur macici deŋ a mbuŋ dideˀ ngi Anakay gu i waka?»

³Bumbulvuŋ Buymisemuŋ kum, aro ɓaˀ a mbuŋ kumo, kaɓa vu mazuma gwatay gar na, kisa sinaka dana so. I naŋ masa ngizla taŋ, i naŋ masa kiɗa taŋ a mbuŋ kumo. Ki sa ɓulaka taŋ, ki ngizlakataŋ kutum si, kaɓa Bumbulvuŋ muɓukum di ɗaˀ le zleˀe na.

⁴Da Bumbulvuŋ Buymisemuŋ kumo misa ɓula taŋ le a mbuŋ kumo na, anja ki huhumom vu, ki ɓam ti kwacay kumo: «Bumbulvuŋ mupula ndra jiviɗ ngi ci nga hirwuy hana na, asi i ndilaka le» kini ta. Amma asi sukwi ngi mizli tayna, a gam malambaˀ le, Bumbulvuŋ maɓula taŋ a mbuŋ kum na vurˀe.

⁵Da ki ndilam le, hã ki tiɓaka hirwuy taŋ le na, anta asi ki ndilaka le ta, malla asi kum ti mevel purla ta. Wãˀ naŋ na, Bumbulvuŋ Buymisemuŋ kum, a ɓula mizli tayna a mbuŋ kumo, asi a gam malambaˀ le. A ga kanah, ɓa ɓi naŋ miɓa ti hudum da dideˀ kumoy, Abraham, Izak ati Zakop tuwa, a gi wãˀ muduba.

⁶Anja ki sinaka sin le, da Bumbulvuŋ Buymisemuŋ kum, a vulukum hirwuy mezle nah le da kum na, anta asi ki ndilaka le ta. Naŋ kine, kum vuna, i mizli misi hirnga gidaŋhay.

⁷Moyis a ɓi: Kum mislikiɗaka mevel da Bumbulvuŋ Buymisemuŋ kum, a wuzlaɓuh mikirɗak kirɗak na, wulkaka kwaɗay! Ki puyukom di hirnga ta wãˀ! Diga tapas kum mupuloko Ezipte, hã ki ndiloko aka na, ki ra slikiɗam ɓi avu Bumbulvuŋ na si.

⁸A muwã Horepe, ki jaka mevel le haɗi da Bumbulvuŋ, hã a wuɗ zleˀe a ngizlukum pay wãˀ.

⁹Ti ya mijiɗ nga muwã, nga tuɓo belelerey, belelerey ngi jumoˀay, Bumbulvuŋ mujumo zleˀe ati kum na, i zik a muwã a diga, hiipas hiipas kukur mufaɗ, duvuɗ duvuɗ kukur mufaɗ, ko i zum gwat ta, i si gwat ta.

¹⁰Bumbulvuŋ a vuliy belelerey mucuw tuwa, i Buymisemuŋ vuna ti haŋ naŋ mutoho gwat angi taŋ. Mingiɓi Bumbulvuŋ muɓukum taŋ gar ti wuzla vu, a hirnga muwã, ti kum mukos kos tuwa na, i mutohohoy le cek anga.

¹¹Ar kiɗa mi ngi hiipas hiipas kukur mufaɗ, duvuɗ duvuɗ kukur mufaɗ tuwa na, Bumbulvuŋ a vuliy belelerey mucuw ngi jumoˀay tuwa.

¹²A dirba nah, Bumbulvuŋ a ɓiy: «Slikiɗ, pi sar ti muwã ti ka kutum, asi mizli ɗikey ka mubo taŋ ti ruwuy Ezipte tuwa, a gam mungra madiɗa le. A pulaka jiviɗ ya mibiga taŋ di tuwa le zar kutum si. A luwuslam ɓiri tapasl tapasl, a gam di zuŋ sla!»

¹³Dar Bumbulvuŋ a ɓiy ava ma: «Na i ra pura mizli tayna, i mizli misi hirnga gidaŋhay!

¹⁴Puliy i ga gwat ya mawuɗo, i wuɗ i ngizla taŋ pay, i wuɗ i susuyumo slimiɗ taŋ tisi gazlavay kurzluˀ gar. Amma ka, i sa tiri ti ka sukwi migidaŋ fineˀ taŋ, yo mihaɗa fineˀ taŋ.»

¹⁵Yi po sar ti muwã matiɓi vu tuwa. I ro ti belelerey mucuw ngi jumoˀay tuwa, kaw haŋ cuw cuw.

¹⁶Naŋ kine, kum miɗiyam zuŋ sla ti ɓiri tapasl tapasl muluwusla na, ki gam mungra le avu Bumbulvuŋ Buymisemuŋ kumo, i pura le muduba so. Jiviɗ Bumbulvuŋ mubugukum di tuwa, ki pulaka mbak kutum si.

¹⁷Akẽh na, belelerey ya mikaw taŋ a haŋ tuwa, i zliɗa taŋ, i waha taŋ meɗ meɗ a mihiri kumo.

¹⁸Moyis a ɓi: A dirba nah, yi huruk huruk a mbuŋ Bumbulvuŋ. I vi hiipas hiipas kukur mufaɗ, yo duvuɗ duvuɗ kukur mufaɗ, i zum gwat ta, i si gwat ta tuwa ma. I ga kanah, vur mungra kum migaka na, ki gam di i gwat macira hiri da Bumbulvuŋ ta, yo i gwat ngi jaŋ mevel haɗi.

¹⁹Mevel ati himaˀ, Bumbulvuŋ muzuɓa ng'ar kum na, a muɗiy membezleŋ le haɗi. A wuɗ zleˀe a ngizlukum pay. Amma Bumbulvuŋ a tiɓa diradibiɗ ɗu le ma.

²⁰Bumbulvuŋ, a ji mevel le zleˀe ɗaˀ angi Aroŋ ma, hã a wuɗ zleˀe a zizaŋ wãˀ, dar yi dir dibiɗ vur Aroŋ.

²¹Yi zuɓa zuŋ sla kum miɗiyaka tuwa, i slra mabigi mungra kum, i ka le ng'ar vu, i waha meɗ meɗ, i musukuɗo kuɗ kuɗ, i tiri di murɓuk, i ra pa murɓuk nah nga mizaw mapo sar ti muwã.

²²Ki jaka mevel le da Bumbulvuŋ a Tabera, a Masa waɗ a kibrot-Taˀava ma.

²³Yo a Kades-Barneya, ti Bumbulvuŋ mislinukum, a ɓukum: «A ram, ara tiɓaka hirwuy ya muvulukum di» na, ki ngumam cine mingiɓi ngi Bumbulvuŋ Buymisemuŋ kumo ta, ki pulakaŋ mevel kumo ta, yo ki puraka mingiɓi naŋ kaɓa ɓi lambaˀ.

²⁴Diga ya misinukum sin na, kum i mislikiɗa ɓihey avu Bumbulvuŋ na si.

²⁵Ti Bumbulvuŋ miɓi ɓa a ngizlukum pay na, yi huruk huruk a mbuŋ naŋ, hã hiipas hiipas kukur mufaɗ, duvuɗ duvuɗ kukur mufaɗ ma.

²⁶I tumbulo Bumbulvuŋ, i ɓaŋ: «Bumbulvuŋ Buymisemuŋ, ki ngizla mizli ɗikeye ta, i ngi ɗikey. Ki mbuɗo hirnga taŋ le ti Ezipte mbele ka migidaŋ, yo hirbazla ɗik migidaŋ na ma.

²⁷Wuluk ar gawla ɗikey: Abraham, Izak waɗ Zakop na kwaɗay. Slikiɗa ɓi taŋ, moˀore taŋ waɗ mungra taŋ na, ki ki slimiɗ ara ta.

²⁸Ki bo ti ndra le ti ruwuy Ezipte. Mizli a sa ɓam a diga: «Bumbulvuŋ a ndila ngi ci ti Israyeleye nga hirwuy naŋ miɓa taŋ di ɗaˀ le tuwa ta, ara gi ti taŋ mesene, a bi ti taŋ na, ɓa ara ngizla taŋ a wuzlaɓuh mikirɗak kirɗak na, a tiɓaŋ ɓa a ɓam kanah ta.

²⁹Taŋ i mizli ɗikey ngbaŋ, i mi ngi ɗikey. I ka mubo taŋ ti gidaŋ ɗik mihaɗi waɗ hirbazla ɗik migidaŋ haɗi!»