Read South Giziga JHN 10 Bible Online

JHN 10 - South Giziga bible

JHN 10

¹«Gisiŋ gisiŋ, yi ɓukum na: mbur maci ng'ar gezleŋ ngi tumuŋhoy tir mi naŋ ta, amma matuwuɗ tir li mekelem pal na, i muhul, yo i mufuyovu.

²Amma mbur maci tir mi naŋ na, naŋ i mijigina tumuŋhoy.

³Mijigina gezleŋ, a wunaŋ mi naŋ, tumuŋhoy kwana, a cinaka ˀay naŋ. A zila tumuŋ naŋhaya purla purla gar ti slimiɗ taŋ ti slimiɗ taŋ, a bi taŋ ng'avra.

⁴Da a bi taŋ le gar ng'avra na, a ki ɓaˀ a mbuŋ, joˀ tumuŋhoy a sipakaŋ, asi a sinaka ˀay naŋ le.

⁵Amma tumuŋhoy a sipaka mbur mulaka ta ndiɗaˀ, a kilam di jak, vur a sinaka ˀay naŋ ta.»

⁶Yesu a slufa taŋ ɓi miweˀ ti wi misenna, amma a slaka wala ngi ɓi naŋ maɓa vuna ta.

⁷Dar Yesu a ɓi ma: «Gisiŋ gisiŋ, yi ɓukum na: Yi mi ngi gezleŋ ngi tumuŋhoy.

⁸Mizli musoko dumbuŋ ar ya gar na, i muhuloy, yo i mufuyovuhoy, amma tumuŋhoy a cinaka taŋ mi ta.

⁹Yi mi ngi gezleŋ. Da mbur mici le tir ya na, a sa lihi. A sa bi, a sa mawa, a sa lum gwat ngi zumo ma kini.

¹⁰Muhulo, a so sey ngi hul, ngi sli ˀay ngi gwat, yo ngi hirya gwat tewle. Ya i so ɓa mizli a lumam siifa, ɓa a lumam haɗa hã fineˀ gidaŋ.

¹¹Ya i mijigin mezleŋ. Mijigin mezle a vula hirnga naŋ vur tumuŋ naŋhay.

¹²Mbur majigin ngi luuma migir na, i mijigin migisiŋ gisiŋ ta, asi tumuŋhoy inga naŋhay ta. Da a pura le kiriɓuh ara so ng'ava na, a pula tumuŋhoyo, a kil. Joˀ kiriɓuh a ja taŋ, a zliɗa hirnga taŋ.

¹³A kil vur a jigin ngi luuma migir tewle, ɓi ngi tumuŋhoy a caŋ neˀ le ta.

¹⁴Ya i mijigin mezle, i si na tumuŋ ɗuwoyo le, yo tumuŋ ɗuwoy kwana, a sinikiy le.

¹⁵Baha a siniy le, yo ya kwana, i sinaŋ le ya, naŋ kine, yi vula hirnga ɗu vur tumuŋ ɗuwoy aya.

¹⁶Y'ada ti tumuŋ mekelemey ma, t'anta ar gezleŋ misenna ta. Taŋ kwana, sey yi so ti taŋ, a sa cinam ˀay ɗu, yo gezleŋ a sa tiri purla waɗ mijigin purla.

¹⁷Baha a wuɗiy, asi ya mavula siifa ɗu, ɓa i sa luuma a muŋ.

¹⁸Mbur maziziy hirnga gu anta, amma i ya mavula ti haŋ ɗu. Y'ada ti gidaŋ ngi vul naŋ, yo y'ada ti gidaŋ ɓa i luuma a muŋ. Ɓi Baha miɓiy di ɗaˀ le, ɓa yi ga na, i nah so.»

¹⁹Yudehey a wunkam ˀay ar wala taŋ asi mingiɓi hana ma.

²⁰Mizli haɗa ar wala taŋ a ɓam: «Setene ada a hirnga! I mibirngaŋ! Ki cinaka mingiɓi naŋ vur mike?»

²¹Amma mekelemey a ɓam: «Mbur misi setene a hirnga a ɓi ɓi kahana ta. Setene a wuna hiri ngi dangara gu kwa?»

²²A Zeruzaleme, naɓa i kiya ngihimiɗi, ara gam muguzlum ngi vula hay ngi Bumbulvuŋ a muŋ [6].

²³Yesu ara liˀi asi palak ngi Salomoŋ ar hay ngi Bumbulvuŋ vuna.

²⁴Yudehey a gunom gun a hirnga naŋ, a ɓakaŋ: «Ki pula ndra ar li ngila mi hã ti vunaka? Da ki Mesi na, inga ɓa ndra di njah so.»

²⁵Yesu a mbiɗa taŋ di: «Yi ɓukum di le zlezle si, amma kum anta tiɓaka ta. Gwat ya maga ti slimiɗ ngi Baha na, ara ga sedewo ngi hirnga ɗu.

²⁶Amma kum anta tiɓikiy di ta, asi kum anta a wuzla tumuŋ ɗuwoyo ta.

²⁷Tumuŋ ɗuwoy a cinam ˀay ɗu. Yi si na taŋ le, yo a sipikiy.

²⁸Ya i vula taŋ siifa ngi sete, t'anta sa micam ta ndiɗaˀ. Yo mbur matiɓa taŋ gu tisi haŋ ɗu, anta.

²⁹Baha muvuliy taŋ na, naŋ madiɗa fineˀ gwatay gar, yo ko mbur misi ti gidaŋ ngi tiɓa gwat tisi haŋ ngi Baha gu, anta.

³⁰Ya ati Baha, ndra purla.»

³¹Yudehey a hilam ɗugur ma, ɓa a kuyupakaŋ.

³²Dar Yesu a ɓa taŋ: «Yi bugukum slra mezlehey le haɗa, ya miga taŋ ti gidaŋ ngi Baha. Na, ki wuɗo kuyupikiy na, asi slra wana a wuzla taŋ ka?»

³³Yudehey a mbiɗakaŋ di: «I wuɗam kuyup ɗike na, asi slra mezle ta, amma vur ka maza Buymisemuŋ na! Asi ka mbur ma na, ki ga vu ɗike ka Buymisemuŋ mbrike?»

³⁴Yesu a mbiɗa taŋ di: «A tohoko ar Ɓimujuwa kumo na: ‹Yi ɓi: kum i Buymisemuŋhoy ta wal kwa?›

³⁵Mizli Buymisemuŋ miɓa taŋ mingiɓi naŋ na, a zila taŋ buymisemuŋhoy. Na, mbur makiɗa Ɓimutoho avra gu, anta.

³⁶Mbur Buymisemuŋ muwunaŋ, yo mislino di ng'ar duniya na, ki ɓakaŋ: ‹ki ra za Buymisemuŋ›, asi ya miɓi yi Mangal ngi Buymisemuŋ na.

³⁷Da ya magi na, i slra ngi Baha ta na, kum ndiram manja ki tiɓaka ɓi ɗu!

³⁸Amma da ya magi na, i nah na, ko da ki tiɓikiy ta tekeɗe kwana, tiɓaka gwat ngi gi ɗu na, kanah na, kisa puraka, yo kisa sinaka, Baha naŋ jom ati ya, kaɓa ya mujom ati naŋ na.»

³⁹Dar a sipakaŋ ɓa a jakaŋ si ma, amma a lih tisi haŋ taŋ.

⁴⁰Yesu a mi nga dubazaw Zurdeŋ, ar li Zaŋ mizla ci mizli ar yam na, a cifi a diga.

⁴¹Mizli haɗa a ram ng'avaŋ, a ɓam: «Ko Zaŋ a gi cekene loŋ ta, amma ɓi naŋ miɓa vur mbur hana gar na, naŋ kaslsla gisiŋ.»

⁴²Dar mizli haɗa a tiɓakaŋ.