Read South Giziga JHN 13 Bible Online

JHN 13 - South Giziga bible

JHN 13

¹Dumbuŋ angi muguzlum Pak masa gi na, Yesu a si na le, pas naŋ a ndila le, ɓa a pula duniya misenna, ɓa a cuh ng'avi Cine naŋ. Yesu a wuɗ mizli naŋhay misi ar duniya le, a wuɗ taŋ hã avu kiɗa mi naŋ.

²Yesu ati mizli ngi seˀeheye , ara zumam ɗafa. Dambalaka, Yudas Iskariyot mangal ngi Simoŋ, Satan a caŋ wuluk le a mevele si, ɓa a vula Yesu a jakaŋ.

³Yesu a si na le, Cine a pulaŋ gwataya le gar asi haŋ naŋ, a si na le ma, a bo ti vu Buymisemuŋ, yo a mi ng'avi Buymisemuŋ.

⁴Yesu a slikiɗ tir li zuma ɗafa, a cuko zana naŋ madiɗa avra, a zuɓ zana ngi is, a juwa wak a virzi.

⁵Waɗ a pi yam ar taasa, a zla a buna sar ngi mizli ngi seˀeheye, a tukuɗa taŋ di ti zana ngi is, naŋ mujuwa a virzi tuwaŋ.

⁶A ndilo avu Simoŋ Piyere, Piyer a ɓaŋ: «Ka, ɓa ki buniy sar ɗu sukwa Buy?»

⁷Yesu a mbiɗaŋ di: «Gwat ya maga hana, k'anta si na wurenna t'aruŋ, amma a dirba nah na, kisa sla wala naŋ ɓula.»

⁸Piyer a ɓaŋ: «Ĩˀĩ, k'anta buniy sar ɗu ta ndiɗaˀ si!» Yesu a mbiɗaŋ di: «Da i bunuw di ta na, naɓa lum ɗik anta avu ya ta.»

⁹Joˀ Simoŋ Piyer a ɓaŋ: «Da kine na Buy, ki buniy di i sar pal naŋ mata, amma haŋ ati hirnga ma!»

¹⁰Yesu a ɓaŋ: «Mbur mubun le si na, naŋ anta ti may ngi bun mata, sey saray, asi naŋ celelle wãˀ si. Kumo, kum celel celel si, amma kum gar ta ɓula.»

¹¹Asi mike na, Yesu a si na mbur masa vulaŋ ɓa a jakaŋ na le si, naŋ miɓi: «Kum celel celel gar ta ɓula» na, vurˀeŋ.

¹²A dirba Yesu mikiɗa mi ngi buna taŋ saraya na, a ka zana naŋ madiɗa tuwa a muŋ, a cifi ng'ar li zuma ɗafa, a ɓa taŋ: «Gwat ya mugukum di hana, ki slaka wala naŋ le kwa?

¹³Kira zilikiy ‹Kumani›, yo ‹Buy›. Naŋ kaslsla, i kanah gwaɗ naŋ.

¹⁴Ani wurenna, da ya Kumani, yo ya Buy tuwa, yi bunukum saraya le na, anja kumo kwana, sey ki bunam sar ngi cil kumoy aya.

¹⁵Asi gwat ya miga na, yi bugukum di i jiviɗ naŋ. Kumo kwana, gaka kanah ya.

¹⁶Gisiŋ gisiŋ, yi ɓukum na: gawla ngi mbur anta funa buy naŋ ta. Misline kwana, anta funa mbur mislinaŋ ta ya.

¹⁷Da ki sinaka hana le, yo da ki ra gaka so na, kisa mumulom!

¹⁸Ya maɓi na, vur kum gar ta ɓula, yi si na mizli ya muwuna taŋ na le. Amma anja gwat Ɓimutoho miɓa na, a gi muduba: ‹Mbur ndra mazumam ɗaf cuwa na, a mbiɗi hirnga le avu ya.›

¹⁹I ɓukum di wurenna muduba, dumbuŋ angi gwat masa gi, yo da naŋ misa gi le na, kisa tiɓaka, i ya misi Ya yahha tuwa.

²⁰Gisiŋ gisiŋ, yi ɓukum na: mbur matiɓa mbur ya masa slinaŋ na, a tiɓi di i ya vuna si. Yo mbur matiɓiy ya kwana, a tiɓi di i mbur mislino ya na ya.»

²¹A dirba Yesu miɓa ɓi hana na, a gaŋ lesl welele, a ɓa njah: «Gisiŋ gisiŋ, yi ɓukum na: masa vuliy ɓa a jikiy na, i mbur purla a wuzla kumo.»

²²Mizli ngi seˀehey a puram vu avu hiri avu hiri. Da a ɓi vur waka na, a si na ka ta

²³Mbur purla a wuzla mizli ngi seˀehey tuwa, mbur naŋ mawuɗaŋ haɗa na, naŋ joˀ gweˀ acikeˀeŋ.

²⁴Joˀ Simoŋ Piyer a vurkaŋ, a ɓaŋ: «Inga cufuɗa Yesu na, a ɓi vuna vur waka?»

²⁵Dar mbur mawuɗaŋ tuwa a gumbuˀ ng'avi Yesu, a ɓaŋ: «I waka Buy?»

²⁶Yesu a mbiɗaŋ di: «I mbur ya masa caŋ milef cukoɗ, waɗ geˀ lar ava na.» Dar Yesu a vula milef naŋ muca cukoɗ waɗ geˀ lar ava tuwa da Yudas Iskariyot, mangal ngi Simoŋ.

²⁷Satan a ci a hur Yudasa hirak ti Yesu muvulaŋ milef cukoɗ tuwa. Joˀ Yesu a ɓaŋ: «Gwat ka masa ga na, ga kutum so.»

²⁸Naŋ miɓaŋ kahana vur mike na, ko mbur pal a wuzla mizli misi akẽh misla wala naŋ, anta.

²⁹Mekelemey a waka na, Yesu a ɓaŋ, ɓa ara hiɗiko gwat ngi muguzlumoy, malla ɓa a vula gwat neˀ da misi murgahay kwana, asi maja taŋ dala i Yudas vuna.

³⁰A dirba Yudas mitiɓa milef tuwa tiɓeˀ si na, a bi kutum, naɓa hiikuɗ a ji le si.

³¹Ti Yudas mibi put si na, Yesu a ɓi: «Wurenna Mangal ngi mbur a lum dudok le, yo Buymisemuŋ kwana, a lum dudok le aseˀe ya.

³²I Buymisemuŋ vuna masa biga dudok ngi Mangala, yo a sa gaŋ di wurenna vuna si.

³³Ziri ɗuwoy, y'anta zik ati kumo haɗa mata. Ki sa ram ti sipikiy, amma ɓi ya miɓa da Yudehey na, wurenna yi ɓukum di da kum aya muduba: ‹Li ya maru ng'ara na, kum anta ram gu ta.›

³⁴«I ɗuvukum ɓi manawayaŋ ani: wuɗam vu ar wala kumo. Anja sey ki wuɗam vu ar wala kumo, kaɓa ya muwuɗukum na ya.

³⁵Da kum ada ki wuɗam vu ar wala kumo na, naɓa mizli gar a sa sinaka, kum i mizli ngi si yahay.»

³⁶Simoŋ Piyer a ɓa Yesu: «Ki ru nga maka Buy?» Yesu mbiɗaŋ di: «Li ya maru ng'ara na, k'anta sipiy gu wurenna ta, amma nga mbuŋ na, kisa sipiy ɓula.»

³⁷Piyer a mbiɗaŋ di: «Buy, yi supuw wurenna gu ta vur mike? I sa vula hirnga ɗu asi ka.»

³⁸Yesu a mbiɗaŋ di: «Ki sa vula hirnga ɗik asi ya kini kwa? Gisiŋ gisiŋ, yi ɓuw na: ɓa hã kucukur a sa ji ˀay na, naɓa ki ji mi le vur ya, ki siniy ta ki siniy ta, is makir si.»