Read South Giziga JHN 14 Bible Online

JHN 14 - South Giziga bible

JHN 14

¹Yesu a ɓa mizli ngi seˀeheye: «Anja didak a muɗukum ta. Tuɓaka Buymisemuŋ, yo tiɓikiy ya aya.

²Li ada haɗa a hay Baha, ya muɓukum: ‹I ra ru nga ɗiyukum li kum masa ndiram ara› na, vurˀeŋ.

³Da yi ru le a ɗiyukum li na, i sa mawa, yisa hulukum a haŋ, hã kisa ndiram angi li ya misi anga na ya.

⁴Li ya maru ng'ara na, ki sinaka jiviɗ naŋ le.»

⁵Tomas a ɓaŋ: «Buy, i sinaka li ka maru ng'ara vuna ta, i sa sinaka jiviɗ naŋ gu mbri mbrike?»

⁶Yesu a ɓaŋ: «Yi jiviɗ, yi ɓi mikaslsla, yo yi siifa. Ko mbur maru ng'avi Baha gu anta, sey a bi ti vi ya.

⁷Da ki sinikiy ya le na, kisa sinaka Baha ya. Zle wurenna, ki sinakaŋ le, ki purakaŋ le si.»

⁸Filip a ɓaŋ: «Buy, inga biga ndra Bunuk vuna, naɓa a kiɗa ndra may le si.»

⁹Yesu a ɓaŋ: «Yi zik le haɗa ati kumo, dambalaka ki siniy t'aruŋ kwa Filip? Mbur mupuriy le na, naɓa a pura Baha le si. Ki ɓi: ‹Buga ndra Bunuko› na, mbri mbrike?

¹⁰Ya, ya jom ati Baha, yo Baha kwana, naŋ jom ati ya na, ki tiɓa t'aruŋ kwa? Mingiɓi ya maɓukum di na, i ɓukum di ngi mongoy ɗu ta. I Baha misi jom ati ya na maga slra nga naŋ jaka.

¹¹Ya maɓi: ‹Ya jom ati Baha, Baha kwana, naŋ jom ati ya› na, tiɓaka sini. Yo da ki tiɓaka mingiɓi ɗu ta tekeɗe kwana, tiɓam, asi slra ya maga taŋ hanayna tekeɗe sini.

¹²Gisiŋ gisiŋ, yi ɓukum na: mbur matiɓiy na, a sa ga slra ya maga taŋ na ya. A sa gi slra madiɗa mifineˀ tayna ma jaka, asi i ra ru le ng'avi Baha.

¹³Ko mike gar, kum misa cufuɗam le ti slimiɗ ɗu na, i sa gaŋ, ɓa Cine a lum gi dudok tisi naŋ mujum ati Mangala.

¹⁴Da ki ra cufuɗam gwat avu ya ti slimiɗ ɗu na, i sa gaŋ.

¹⁵«Da ki ra wuɗikiy na, naɓa ɓimuɗuva ɗuwoyo, kisa jaka taŋ a hirnga.

¹⁶Yo yi sa tumbulo Baha ɓa a vulukum Mijiniˀis mekelem masa ndir caˀa ati kum.

¹⁷Naŋ i ˀUf mijeŋŋe. Naŋ na, duniya a tiɓaŋ gu ta, asi naŋ anta puraŋ ta, yo a sinaŋ ta. Amma kumo, ki sinakaŋ le, vur naŋ da ati kumo, yo naŋ da a hur kumo ma.

¹⁸Y'anta sa pulukum i mutuhoy ta, i ra mo ng'avu kum.

¹⁹Neˀ nga mbuŋ ka na, duniya anta sa puriy mata. Amma kumo, kisa purikiy, y'ada ti siifa. Yo kumo kwana, kisa ndiram ti siifa ya.

²⁰Tapasa, kisa sinaka, ya jom ati Baha, kumo, kum jom ati ya, yo ya kwana jom ati kum aya.

²¹«Ɓimuɗuva ɗuwoyo, mbur maja taŋ a hirnga, yo masipa taŋ na, naɓa i mbur muwuɗ ɗu. Mbur muwuɗ ɗu vuna, Baha a sa wuɗaŋ, yo ya kwana, yi sa wuɗaŋ, yi sa bigaŋ vu.»

²²Yudas, mbak Yudas Iskariyoto le, a ɓaŋ: «Buy, kisa biga vu da ndra mbak da duniya le mbri mbrike?»

²³Yesu a mbiɗaŋ di: «Da mbur ara wuɗiy na, a sipa mingiɓi ɗu. Baha a sa wuɗaŋ, Baha ati ya i sa soko, i sa paka hay ndra wãˀ a hur naŋ.

²⁴Mbur mawuɗ ya ta na, naŋ anta ja mingiɓi ɗu a hirnga ta. Ɓi kum micinaka avu ya na, i ɓi ngi mongoy ɗu ta, amma i mingiɓi ngi Baha mislino ya.

²⁵Ya muɓukum ɓi hana na, zle ti ya misi ati kum aruŋ.

²⁶Mijiniˀis, ˀUf Mipal, Baha masa slinukum di ti slimiɗ ɗu na, a sa dubunukum gwataya pay, yo ɓi ya muɓukum di gar na, a sa so keŋ ar wuluk kumo.

²⁷«Yi pulukum di i zuy, i ra vulukum zuy ɗu. Y'anta i vulukum di kaɓa ngi duniya mavula na ta. Anja didak a muɗukum ta, ki zluwunam ta.

²⁸Ki cinaka le, yi ɓukum: ‹I ra cuh le, yo i sa mo ng'avu kum.› Da kum ada wuɗikiy zleˀe na, anja ani ki mumulom le ti ru ɗu ng'avi Baha na, vur Baha i madiɗa fineˀ ya.

²⁹Yi ɓukum di le zle wurenna, daf le angi gwat nah masa gi, ɓa tapas naŋ misa gi le na, kisa tiɓam.

³⁰Zle dana, y'anta sa ɓi ɓi ati kumo haɗa mata, asi buy ngi duniya misenna ara sawa. Ko naŋ anta ti gidaŋ neˀ a hirnga ɗu ta wãˀ.

³¹Amma ara sawa, ɓa duniya a sina, i ra wuɗ Baha, yo gwat ngi gi ɗu, naŋ kaɓa Baha miɓiy di ɗaˀ le. Slikiɗam, cuhukum le ti ka!»