Read South Giziga JHN 16 Bible Online

JHN 16 - South Giziga bible

JHN 16

¹«Yi ɓukum ɓi hana gar na, ɓa ki cam ar mungra ta.

²A sa ɓulukum avra tir hay ngi dira dibiɗeye. Mifineˀ nah ma na, pas naŋ ara ndilawa, tapasa mbur mukuɗukum le vagay vagay na, a sa wa kaɓa a gi di i mikuli da Buymisemuŋ.

³A sa gam kahana, asi a sinaka Baha ta, ko a sinikiy ya ta ma.

⁴Amma ya muɓukum ɓi hana na, da pas naŋ misa gi le na, ɓa kisa wulkaka keŋ, yi ɓukum di le zleˀe. «Yi ɓukum ɓi nah zle angi zlivirzi naŋ ta na, vur y'ada zleˀe ati kumo.

⁵Amma wurenna, i ra cuh le ng'avu mbur mislino ya, ko mbur pal a wuzla kum macufuɗiy: ‹Ki ru nga maka› na, anta.

⁶Ya muɓukum di na, ki ra likam haɗa haɗa a mevel kumo.

⁷Ani wurenna, i ra ɓukum ɓi mikaslsla wãˀ: ya macuh le na, i jiŋ kum. Naŋ kine, da yi cuh ta na, naɓa Mijiniˀis kumo, naŋ anta sa so ng'avu kumo ta. Amma da yi cuh le jak na, i sa slinukum di.

⁸Yo ti naŋ misa so le na, a sa biga da mizli ngi duniyahaya, a zluɓam le avu ɓi ngi mungra, ɓi mijeŋŋe, waɗ avu ɓi ngi kiita ngi Buymisemuŋ.

⁹Mizli ngi duniyahay a zluɓaka le avu ɓi ngi mungra na, asi t'anta tiɓikiy ta.

¹⁰A zluɓaka le avu gi gwat mijeŋŋe, asi i ra cuh ng'avi Baha, kum anta kisa purikiy mata.

¹¹A zluɓaka le avu kiita ngi Buymisemuŋ, asi a gaka kiita le da buy malambaˀ ngi duniya misenna.

¹²Y'ada ti ɓi haɗa ngi ɓukum di aruŋ, amma ki ɓusaka cin naŋ gu wurenna t'aruŋ.

¹³Da ˀUf mijeŋŋe misa so le na, a sa ru ti kum ar ɓi mikaslsla gar wãˀ. Asi a sa ɓi di i ɓi ngi mongoy naŋ ta, amma a sa ɓi di i ɓi naŋ masa cina, yo a sa bugukum ɓi ngi gwat masa gi gar.

¹⁴A sa giy dudok da ya, vur a sa bugukum di i ɓi naŋ masa lumo di avu ya.

¹⁵Gwat Baha misi ti naŋ gar na, inga yahay. Ya muɓukum a sa ɓukum di i ɓi naŋ mulumo di avu ya na vurˀeŋ.

¹⁶«Nga mbuŋ neˀ aka na, kum anta sa purikiy mata. Yo a dirba nah neˀ ma na, kisa purikiy ma.»

¹⁷Dar mizli ngi seˀe mekelemey a ɓam ar wala taŋ: «A wuɗ a ɓa ndra vuna mbrike? A ɓa ndra: ‹Nga mbuŋ neˀ na, kum anta sa purikiy mata. A dirba nah neˀ ma na, kisa purikiy ma.› Yo ma na: ‹I ra ru ng'avi Baha.›

¹⁸‹Neˀ nah vuna›, a mbiɗeˀvra mbrike? Ndr'anta slaka wala ngi ɓi naŋ mawuɗa ɓa vuna ta.»

¹⁹Yesu a si na le, taŋ ti may ɓa a cufuɗakaŋ, a ɓa taŋ: «Ya muɓukum: ‹Nga mbuŋ neˀ na, kum anta sa purikiy mata, a dirba nah neˀ ma na, kisa purikiy ma› na, kum macufuɗam vu ar wala kum na aseˀe kwa?

²⁰Gisiŋ gisiŋ, yi ɓukum na: kisa tuwam kaɗam kaɗam, kisa niˀicam, amma duniya a sa mumul. Ki sa likam, amma lik kum a sa tiri mumul.

²¹Da ngwas ara yi na, a hiɗ hiri, asi pas naŋ a ndila le. Amma da a ya zuŋ le na, anta si na bonoy naŋ miga na mata, a mumul haɗa, vur a yi mbur le a ruwuyo.

²²Kum wurenna, ki ra ndurɓom hiri kanah ya, amma yi sa purukum a muŋ ma, joˀ mevel kum a sa mumul, ko mbur masa tukukum mumul nah, anta.

²³Naŋ kine, tapasa, kum anta sa cufuɗam ɓi neˀ avu ya mata. Gisiŋ gisiŋ, yi ɓukum na: da ki ra cufuɗam gwat avu Baha ti slimiɗ ɗu na, a sa vulukum di.

²⁴Hã wurenna, ki cufuɗam gwat neˀ le ti slimiɗ ɗu ta. Cufuɗam, kisa lumam, hã mumul kum a sa gi i mumul mikaslsla wãˀ.

²⁵«Yi ɓukum ɓi hana gar na, yi wukum di weˀ ti wi, amma pas naŋ ara ndilawa, tapasa, y'anta sa ɓukum kanah mata. Amma yi sa ɓukum ɓi vur Baha njah muduba.

²⁶Tapasa, ɓa yi ɓukum: i sa tumbulo Baha vur kum na, i ɓukum ta. Ki sa cufuɗaka Baha ti slimiɗ ɗu.

²⁷Asi Baha ti hirnga naŋ ara wuɗukum, asi ki wuɗikiy le, yo ki tiɓaka le, yi bo ti vu Buymisemuŋ.

²⁸Yi bo ti vu Baha, i so le ar duniya. Wurenna i ra pula duniya, i ra ru le ng'avi Baha.»

²⁹Dar mizli ngi seˀehey a ɓakaŋ: «Ani wurenna, ki ra ɓi njah njah, ki ra pula ɓi ɓi miweˀ ti wi muduba.

³⁰Wurenna i sinaka le, ki si na gwataya le gar, k'anta wuɗ mbur a cufuɗuw ti cufuɗ ko neˀ ta. Ndra matiɓaka ki so ti vu Buymisemuŋ gisiŋ na, vurˀeŋ.»

³¹Yesu a mbiɗa taŋ di: «Ki tiɓaka le muduba sukwa?

³²Puraka, pas naŋ ara ndilawa, wurenna a ndilo le vuna si, kisa zliɗam hirnga pal pal, mbur gar aru ngi hay naŋ ngi hay naŋ. Ki sa pulikiy deŋ pal ɗu. Amma ya pal ɗu ta, Baha naŋ da ati ya.

³³Yi ɓukum ɓi hana, ɓa kum mujom ati ya na, ki ndiram zuy zuy. Ki sa sam bonoy ar duniya hana, amma ki zluwunam ta, yi pa hirnga le da duniya!»