Read South Giziga JHN 17 Bible Online

JHN 17 - South Giziga bible

JHN 17

¹Yesu, a dirba naŋ miɓi kahana na, a zuɓa hiri nga muŋ, a ɓi: «Baha, pas a ndila le, ga dudok da Mangal ɗike, ɓa Mangal ɗik a guw dudok aya,

²yo ɓa a vula siifa ngi sete da mizli, ka muvulaŋ taŋ gar na, kaɓa ka muvulaŋ madiɗa a hirnga mizli titirahay gar.

³Da mizli a sinukuw le, Buymisemuŋ mijeŋŋe pal i ka, yo Yesu Kristu, mbur ka mislino di na, da a sinaka le na, naɓa siifa ngi sete i nah.

⁴I guw dudok le asi ruwuyo, yo slra ka muvuliy di ngi gi na, i kiɗa mi nah le.

⁵Wurenna so na, Baha, giy dudok a ciki ɗike, dudok ya misi ti naŋ a ciki ɗik zleˀe, dumbuŋ angi duniya muɗuv virzi t'aruŋ.

⁶Mizli ka mubo ti taŋ tir duniya, ka muvuliy taŋ na, yi biga taŋ slimiɗ ɗike le. Taŋ i ngi ɗikey, ki vuliy taŋ le, a jaka mingiɓi ɗike le a hirnga.

⁷Wurenna a sinaka le, gwat ka muvuliy di gar na, a so ti vu ka.

⁸Yo mingiɓi ya miɓa taŋ di gar na, a bo ti vu ka. A tiɓaka le, a sinaka le gisiŋ gisiŋ, yi bo ti vu ka. A tiɓaka le, i ka mislino ya.

⁹Ya madir dibiɗ na, vur taŋ. Y'anta dir vur duniya ta, amma yi dir vur mizli ka muvuliy taŋ na, asi i ngi ɗikey.

¹⁰Gwat ɗu gar na, i ngi ɗiki, yo gwat ɗik gar kwana, inga ya aya. Ya mulum dudok na, vur taŋ.

¹¹Zle dana, y'anta ar duniya mata, taŋ a ndiram ar duniya ɓula, amma ya i ra ru ng'avi ka. Baha mipal, jigina taŋ ti gidaŋ ngi slimiɗ ɗik ka miciy di na, ɓa a tiram purla kaɓa ndra mupurla ati ka na ya.

¹²Ti ya misi zleˀe ati taŋ na, yi jigina taŋ le ti gidaŋ ngi slimiɗ ɗik ka miciy di na. Yi cik vu le angi taŋ, ko mbur pal mizizi asi taŋ, anta, sey mbur mihĩˀĩ ngi zizi na, ɓa Ɓimutohoko a gi muduba.

¹³Wurenna, i ra ru ng'avi ka. Ya maɓa ɓi hana na, ti ya misi ar duniya aruŋ, ɓa a lumaka mumul ɗu wãˀ a mevel taŋ.

¹⁴Yi ɓa taŋ mingiɓi ɗike le, yo duniya a gi mesene le ti taŋ, asi taŋ i ngi duniyahay ta, kaɓa ya misi yi ngi duniya ta na ya.

¹⁵Y'anta tumbuluw ɓa ki hila taŋ tir duniya ta, amma ɓa ki jigina taŋ avu Malambaˀvu na.

¹⁶Taŋ i ngi duniyahay ta, kaɓa ya misi yi ngi duniya ta na ya.

¹⁷Mingiɓi ɗike naŋ kaslsla. Tiri ti taŋ ngi ɗikey wãˀ ti mingiɓi ɗik mikaslsla na.

¹⁸Yi slina taŋ ng'ar duniya, kaɓa ka mislino ya ng'ar duniya na ya.

¹⁹Yo i ra vula hirnga ɗu ti haŋ ɗu vur taŋ, ɓa a tiram ngi ɗikey wãˀ ti mingiɓi ɗik mikaslsla.

²⁰«I dir dibiɗ vur taŋ pal ta, amma vur mizli masa tiɓikiy mbele mingiɓi taŋ na ya.

²¹Anja taŋ gar a tiram purla kaɓa ka Baha, ka mujom ati ya, ya kwana, ya mujom ati ka na ya. Anja taŋ kwana, a ndiram jom ati ndra ya, ɓa duniya a tiɓa i ka mislino ya.

²²Ya kwana, dudok ka muvuliy di na, yi vula taŋ di le ya, ɓa a tiram purla ka ndra mupurla ati ka na ya.

²³Ya, ya jom ati taŋ, ka kwana, ka jom ati ya, ɓa a ndilaka jum mupurla wãˀ na, ɓa duniya a sina, i ka mislino ya, yo ki wuɗa taŋ le kaɓa ka muwuɗiy na ya.

²⁴Baha, mizli ka muvuliy taŋ na, yi wuɗ ɓa taŋ kwana, a ndiram ati ya ar li ya misi anga na ya, ɓa a singilaka dudok ka muvuliy di na, asi ki wuɗ ya le zle ti duniya mizli virzi t'aruŋ.

²⁵Baha mijeŋŋe, duniya a sinuw ta, amma ya i sinuw le. Taŋ hanayna, a sinaka le, i ka mislino ya.

²⁶Yi biga taŋ slimiɗ ɗike le. I sa biga taŋ di ava ma, ɓa wuɗavu ɗik, ka mawuɗiy na, a ndir a hur taŋ, yo ya kwana a hur taŋ ma.»