Read South Giziga JHN 19 Bible Online

JHN 19 - South Giziga bible

JHN 19

¹Akẽh na, Pilat a ɓi ɓa a ram ti Yesu, ɓa a slikiɗakaŋ.

²Naɓa sojehey a fuɗam loppol ngi hadaw le zleˀe, a cakaŋ di kulaˀ a hirnga, waɗ a gijuwakaŋ zana gagaza avu vu.

³A kirohoko ng'avaŋ, a ɓakaŋ: «Zuy zuy aya, Buy ngi Yudehey!» Joˀ a zlaka a kiɗakaŋ.

⁴Pilat a bo ma, a ɓa Yudeheye: «Cinam, y'ani bukum di ng'avra aka, anja ki sinaka sin le, ko yi lum ɓi ava ɓa ngi jaŋ ti kiita ta.»

⁵Yesu a bo ng'avra, loppol ngi hadaw kulaˀ a hirnga, waɗ zana gagaza gijaw avu vu. Pilat a ɓa taŋ: «Mbur tuwa n'anihĩ!»

⁶Amma masay madiɗahay ati mizli taŋhaya mupuraka keɗ na, a zlaka a tilam mi, a ɓam: «Dira avu dum mizliraŋ! Dira avu dum mizliraŋ!» Pilat a ɓa taŋ: «Kum vuna, aram di, dirakaŋ. Da avu ya na, ko yi lum ɓi ava ɓa ngi jaŋ ti kiita ta.»

⁷Yudehey a mbiɗakaŋ di: «Ndrˀada ti ɓimujuwa. Kaɓa ɓi nah miɓi na, sey a mucu, asi a wa vu naŋ i Mangal ngi Buymisemuŋ.»

⁸Pilat micina mingiɓi hana na, a gaŋ zluwun fineˀ misi zleˀe ma.

⁹A mi ngi hay a muŋ, a ɓa Yesu: «Ka vuna, ki so ti dama kpak ka?» Amma ko Yesu a mbiɗaŋ di neˀ ta.

¹⁰Joˀ Pilat a ɓaŋ: «Ki ngum ɓi ta na, avu ya vuna kwa? Ya ti gidaŋ ngi puluw, yo ya ti gidaŋ ɓa a dirukuw ma gar na, ki si na ta kwa?»

¹¹Amma Yesu a mbiɗaŋ di: «Da Bumbulvuŋ a puluw jiviɗ nah zleˀe ta na, k'anta ti gidaŋ ar ya ko neˀ ta. Vurˀe, mbur muvuliy ɓa ki jiy na, mungra nga naŋ a funa ngi ɗike le.»

¹²Zle ti nah na, Pilat a pur jiviɗ ɓa a pula Yesu. Amma Yudehey a zlaka a tilam mi, a ɓam: «Da ki pula le na, ɓa ki ngama ngi buy mimadiɗa [10] ta! Asi ko wa gar mawa vu naŋ ka buy madiɗa na, naɓa i mesene ngi buy mimadiɗa.»

¹³Pilat micina mingiɓi hana cin na, a bi ti Yesu ng'avra, naŋ vuna a cifi ar janga ngi gi kiita, ar li mazilaka «midirkaka ti ɗugur». A zilaka ti mi Hebere: «Gabata» [11].

¹⁴Naɓa i hin ngi juwa vu vur muguzlum ngi Pak, hirak ngrˀavu wuzla papas. Pilat a ɓa Yudeheye: «Buy kumo n'ani!»

¹⁵Amma a zlaka a tilam mi, a ɓam: «Kiɗa vagay! Kiɗa vagay! Dira avu dum mizliraŋ!» Pilat a mbiɗa taŋ di: «Ɓa yi dira buy kum madiɗa avu dum sukwa?» Masay madiɗahay a mbiɗakaŋ di: «Buy ndra mekelem anta, sey buy mimadiɗa tewle!»

¹⁶Dar Pilat a vula taŋ Yesu ɓa a dirakaŋ avu dum mizlira so. Dar a ram ti Yesu so.

¹⁷Yesu ti haŋ naŋ a zuɓa dum naŋ mizlira, a bi, a ndil di angi li mazilaka guduguzluŋ hirngaŋ «Golgota» ti mi Hebere.

¹⁸A dirakaŋ a diga waɗ mizli mekelemey cuw angi dum mizlirahay vuna ya, pal ti ka pal ti ka, Yesu naŋ a wuzla.

¹⁹Pilat a tuh gwat le avu dum misliprakka zleˀe, a ɓi a luwaka law a hirnga dum mizlira tuwa. A tohoko na: «Yesu mbur Nazaret, Buy madiɗa ngi Yudehey.»

²⁰Yudehey haɗa a slufaka ɓimutoho nah le, vur li taŋ midiraka Yesu anga na, naŋ gweˀ avu walahay madiɗaŋ. Yo a tohoko ti mi Heber, ti mi Grek waɗ ti mi Lateŋ.

²¹Joˀ masay madiɗa ngi Yudehey a ɓaka Pilata: «Anja ki toho: ‹Buy madiɗa ngi Yudehey› ta, amma toho na: ‹Mbur hana a ɓi, yi Buy ngi Yudehey.›»

²²Pilat a mbiɗa taŋ di: «Gwat ya mutoho le na, i toho le si.»

²³A dirba sojehey mikiɗaka mi ngi dira Yesu avu dum mizlira na, a hilaka zana naŋhaya, a wunkaka taŋ taˀ taˀ mufaɗa, da mburo da mburo. Mindir i zana naŋ madiɗaŋ, tuf anta ava ta, i gabaga mijaka kifilih kine, zle a muŋ hã a ruwuy.

²⁴Sojehey a ɓam ar wala taŋ: «I ngiraka zana madiɗa hana ta, zuwen kuɗukum caca, da masa zuma i waka na.» Ɓa gwat Ɓimutoho miɓa na a gi muduba, a ɓi: «A wunkaka zana ɗuwoyo le ar wala taŋ, yo a kiɗam caca le ti zana ɗu madiɗa.» Gwat sojehey migam na, i nah so.

²⁵Mumuŋ ngi Yesu, sukum ngi mumuŋ, Mariya ngwas ngi Klopas waɗ Mariya ngi Magdala, a roko dedeŋ gweˀ avu dum mizlira midiraka Yesu anga tuwa.

²⁶Yesu mupura mumuŋ waɗ mbur ngi seˀe, naŋ mawuɗ haɗa tuwa deŋ acikeˀe na, a ɓa mumuŋ: «Ngwasa, mangal ɗik anihĩ.»

²⁷Yo a ɓa mbur ngi seˀe tuwa kwana: «Munuk anihĩ.» Zle tapasa na, mbur ngi si Yesu tuwa, aru ti Mariya ngi hay naŋ.

²⁸A dirba nah, Yesu a si na le, zle angi nah na, gwat gar a kiɗ mi le muduba. Ɓa Ɓimutoho a gi hã avu kiɗa mi naŋ muduba na, Yesu a ɓi: «Yam ara giy.»

²⁹Kukulum ada akẽh zleˀe mbaf ti mbaazla mikwereke. A yupom gugumay angi mbaazla tuwa, a ngikaka avu dum, a tilakaŋ di ng'avi mi.

³⁰Yesu mititila titileˀ si na, a ɓi: «Gwat gar a kiɗ mi le!» A ga hirnga gangal, a mucu.

³¹Tapasa, naɓa i hin ngi juwa vu vur hin ngi sabat. Yudehey anta a wuɗam vagay ngi mizli a ndiram ar dum mizlira tapas sabata ta, asi sabata, i hin madiɗa wãˀ. Vurˀe, a cufuɗaka Pilata ɓa a pula taŋ jiviɗ a ngila taŋ saraya, ɓa a pam taŋ sar avra.

³²Dar sojehey a soko, a ngilaka sar ngi mizli midiraka taŋ ati Yesu tuwa, ngi mudumbuŋ ati ngi mucuw naŋ.

³³Sojehey mindilam avu Yesu na, a puraka a muc le si, a ngilakaŋ saraya mata.

³⁴Amma mbur soje pal a zligaŋ ar cakaya ti ziwit, pumbus lahaɗ ati yam a bo a haŋhaŋ si.

³⁵Mbur mupur naŋ na, a ga sedewo nah le, yo sedewo naŋ kaslsla. Na zle, mbur nah a si na le, a ɓi di i ɓi mikaslsla gisiŋ, ɓa kumo kwana, ki tiɓam aya.

³⁶Naŋ kine, gwat hana gar migi na, ɓa Ɓimutoho a gi mi muduba: «Anta sa ngilakaŋ tesle ko pal ta.»

³⁷Ar li mekeleme, Ɓimutoho a ɓi ma: «A sa puraka mbur taŋ mizligakaŋ ti ziwite.»

³⁸A dirba gwat migi nah na, Zozef ngir walahay Arimate, a cufuɗa Pilata, ɓa a pulaŋ jiviɗ nga zuɓa vagay ngi Yesu. Zozef i mbur ngi si Yesu, amma anta bidas ta ɓula, vur a zluwun ti Yudeheye. Pilat a pulaŋ jiviɗe, joˀ Zozef ara zuɓa vagay ngi Yesu.

³⁹Nikodem, mbur muru ada zleˀe nga pura Yesu ngi duvuɗ tuwa, a ndilawa ya. A so ti mukuturɓuy mir ati alowe lahaɗ lahaɗ, gwat ngi kilo kukur makir.

⁴⁰Taŋ cuw taŋ a zuɓaka vagay ngi Yesu tuwa, a tuwuɗaka ti gabaga, a pakaŋ urdi tuwa kaɓa mezegwel ngi Yudehey magaka da vagay ngi mburo.

⁴¹Angi li taŋ midiraka Yesu avu dum na, jarne ada akẽh. Zivi nawaya ada angi jarne nah vuna, a kam vagay ngi mbur ɗaˀ ara t'aruŋ.

⁴²A kaka vagay ngi Yesu ar zivi nah, asi naŋ gweˀ, yo i hin ngi juwa vu ngi sabat ngi Yudehey ma.