Read South Giziga JHN 21 Bible Online

JHN 21 - South Giziga bible

JHN 21

¹A dirba nah, Yesu a biga vu da mizli ngi seˀehey a miyam madiɗa ngi Tiberiya ma. Ɓi nah a gi anihĩ:

²Simoŋ Piyer, Tomas mazilaka Misa, Natanayel ngi Kana, hirwuy Galile, ziri ngi Zebedehey waɗ mizli ngisi Yesu mekelemey cuw, taŋ bumoˀ.

³Simoŋ Piyer a ɓa taŋ: «I ru nga ji kilifi.» Mekelemey tuwa a ɓakaŋ: «Akum bumoˀ.» Dar a bam, a cam palalam. Amma ngi duvuɗ nah na, ko a lumam kilif pal ta.

⁴Yesu a bugo vu deŋ a miyam akẽh, naɓa li a wun le si, amma i Yesu na, mizli ngi seˀehey tuwa a si na ka ta

⁵Dar Yesu a ɓa taŋ: «Gawlahay, ki jam kilife le neˀ kwa?» A mbiɗakaŋ di: «I jam ta.»

⁶A ɓa taŋ: «Hizigaka zuva tir vay hazum ngi palalama, ɓa kisa lumam.» Joˀ a hizigaka zuva tuwa, a nih mbaf ti kilife, hã a ɗiɗoko di tisi yama gu mata.

⁷Dar mbur Yesu mawuɗaŋ zleˀe tuwa a ɓa Piyere: «I Buy Yesu!» Simoŋ Piyer micina i Buy Yesu na, a juwa zana hirlak, vur a cuko zana le zleˀe, a diɗ griv ng'ar yama.

⁸Mizli ngi si Yesu mekelemey a soko ti palalama, a ɗiɗoko zuva mimbaf ti kilif tuwa a haŋ. Taŋ zleˀe kileŋ avu mibuzugumo, a gi gwat ngi metir skata.

⁹Taŋ mupoko sar tir palalama na, a puram vu hilɓiɓ ti kilif ɓaˀ araŋ waɗ ɗaf.

¹⁰Yesu a ɓa taŋ: «Soko ti kilif kum mujoko di wurenna na so.»

¹¹Joˀ Simoŋ Piyer a ci ng'ar palalama, a ɗiɗo zuva mimbaf ti kilife nga ruwuy, kilif madiɗahay anga skat ti kukur zlum ngaˀ makir. Kilif ara haɗa ngbaŋ, amma ko zuva a ngir ta.

¹²Yesu a ɓa taŋ: «Soko, zumam.» Ko mbur pal a wuzla taŋ mutum vu ɓa a cufuɗaŋ: «I ka waka?» na, anta. Asi a sinaka le i Buy Yesu.

¹³Dar Yesu a so zuɓa ɗaf tuwa, a vula taŋ di, a vula taŋ kilife ma.

¹⁴Hana i sar mimakir naŋ, Yesu mibiga vu da mizli ngi seˀeheye, zle ti naŋ mislikiɗ ti wuzla mumucahaya.

¹⁵A dirba zuma ɗafa, Yesu a ɓa Simoŋ Piyere: «Simoŋ, mangal ngi Zaŋ, k'ada wuɗiy fineˀ mizli tayna kwa?» A mbiɗaŋ di: «Kanah Buy, ki si na le, i ra wuɗuw.» Dar Yesu a ɓaŋ: «Jigina zir tumuŋ ɗuwoy.»

¹⁶Yesu a ɓaŋ sar mucuw naŋ ma: «Simoŋ, mangal ngi Zaŋ, k'ada wuɗiy kwa?» A mbiɗaŋ di: «Kanah Buy, ki si na le, i ra wuɗuw.» Yesu a ɓaŋ: «Jigina tumuŋ ɗuwoy.»

¹⁷A ɓaŋ sar mimakir naŋ ma: «Simoŋ, mangal ngi Zaŋ, k'ada wuɗiy kwa?» Yesu miɓa Piyere sar mimakir naŋ: «Kˀada wuɗiy kwa?» na, a gaŋ kuy ta, a slaŋ di, a ɓaŋ: «Buy, ki si na gwataya le gar, ki si na le, i ra wuɗuw ngbaŋ!» Joˀ Yesu a ɓaŋ: «Jigina tumuŋ ɗuwoy.

¹⁸Gisiŋ gisiŋ, yi ɓuw na: ti ka misi ti gawla ɗik zleˀe na, i ka majuwa kanda ɗike ti haŋ ɗike, yo ki ru ar li ka muwuɗ le gar. Amma ti ka misa gi midigila le na, kisa pula haŋ mbak mbaka, i mbur mekelem masa juwuw kanda, yo asa ru ti ka ar li ka mawuɗ ru anga ta.»

¹⁹Yesu miɓi kahana na, ɓa ngi biga muc ngi Piyer masa muc ngi ga dudok da Buymisemuŋ. A dirba mingiɓi hana, a ɓaŋ ma: «Sipiy.»

²⁰Piyer a mbiɗi hiri, a pura mbur Yesu mawuɗaŋ zleˀe tuwa, ara supo taŋ. I mbur muguɓ ng'avi Yesu ti taŋ mazumam ɗaf zleˀe, mucufuɗaŋ: «Buy, masa vuluw ɓa a jukuw i waka» tuwa.

²¹Piyer mupura na, a ɓa Yesu: «Buy, mbur hana, masa gi ava i mike?»

²²Yesu a mbiɗaŋ di: «Da ko yi wuɗ le ɓa a ndir ti siifa hã ti ya masa mawa tekeɗe kwana, a cuw ka le kwa? Ka, ka sipiy!»

²³Zle avu mingiɓi hana, mitiɓihey a ɓam ar wala taŋ: «Mbur ngisi Yesu nah na, anta sa muc ta.» Dambalaka mbur nah anta sa muc ta na, Yesu a ɓa Piyere kine ta, amma a ɓi: «Da yi wuɗ le ɓa a ndir ti siifa hã ti ya masa mawa tekeɗe kwana, a cuw ka le kwa» kini ngbaŋ.

²⁴Miga sedewo ngi ɓi hana, yo mutoho na, i mbur ngisi Yesu nah vuna. Yo i sinaka le, sedewo nah, naŋ kaslsla.

²⁵Yesu a gi gwat mekelemey le wal wal haɗa. Da a tohoko taŋ le purla purla gar zleˀe na, yi wa, ko angi duniya kurzluˀ gar kwana, li ngi pi ɗerewol tayna, anta.