Read South Giziga JHN 3 Bible Online

JHN 3 - South Giziga bible

JHN 3

¹Mbur mekelem ada a wuzla Farisahay , a zilaka Nikodem, i mbur purla ngi si mizli madiɗa ngi Yudehey.

²A so luuma Yesu ngi duvuɗ, a ɓaŋ: «Kumani, i sinaka le, Buymisemuŋ a slino ka ɓa ki dubuna ndra gwat, asi cekene ka maga na, ko mbur maga gu kanah anta, sey da Buymisemuŋ naŋ da ati naŋ far.»

³Yesu a mbiɗaŋ di: «Gisiŋ gisiŋ, yi ɓuw na: Zumabuy ngi Buymisemuŋ , ko mbur mapura gu anta, sey da a yakaŋ le sar mucuw naŋ a muŋ far.»

⁴Nikodem a ɓaŋ: «Mbur migi midigila le si na, a yakaŋ mbri mbri maka? A ci sar mucuw naŋ gu nga kwacay mumuŋ, ɓa a yaŋ ma kwa?»

⁵Yesu a mbiɗaŋ di: «Gisiŋ gisiŋ yi ɓuw na: Zumabuy ngi Buymisemuŋ, ko mbur maci anga gu anta, sey da a yakaŋ le ti yam ati ˀUf far.

⁶Mbur titra a yi di i mbur titra ya, amma ˀUf ngi Buymisemuŋ kwana, a yi di i ˀuf aya.

⁷Ya muɓuw: ‹Anja sey a yukum paɗ ti muŋ› na, anja a guw welele ta.

⁸Himiɗ a gi ng'ar li naŋ muwuɗ le gar. Ki cine hurum naŋ ɓula, amma a so ti damaka, malla aru kini nga maka na, ki si na ta. ˀUf ngi Buymisemuŋ miya mburo le gar na, a gi di kanah ya.»

⁹Nikodem a ɓaŋ: «Ɓi misenna a gi gu mbri mbrike?»

¹⁰Yesu a mbiɗaŋ di: «Ki mudubuna gwat da Israyeley, ko ki si na gwat tayna ta mbrike?

¹¹Gisiŋ gisiŋ, yi ɓuw na: i ɓam di i ɓi ngi gwat ndra misinaka le, i gam di i sedewo ngi gwat ndra mupuraka le. Amma ko kum anta tiɓaka sedewo ndra ta.

¹²Ya mira ɓukum ɓi ngi gwat ngi ruwuyoy na, kum anta ki tiɓaka ta. Na, da yi ɓukum di i ɓi ngi gwat ngi muŋhoy zleˀe na, kisa tiɓaka mbri mbrike?

¹³Ko mbur mijiɗ ɗaˀ nga muŋ anta ndiɗaˀ, sey Mangal ngi mbur mupo sar paɗ ti muŋ.

¹⁴Moyis a luwa kawa le ar dum a muŋ a wuzlaɓuh mikirɗak kirɗaka, naŋ kine, anja a luwaka Mangal ngi mbur a muŋ kanah ya,

¹⁵ɓa ko wa gar mitiɓaŋ le na, a lum siifa ngi sete.

¹⁶«Naŋ kine, Buymisemuŋ a wuɗ duniya le haɗi, hã a vulo Mangal naŋ kirmalay, ɓa mbur gar mitiɓaŋ le na, a zizi ta, amma a lum siifa ngi sete.

¹⁷Asi Buymisemuŋ a slino Mangal naŋ ar duniya, ɓa a ga kiita da duniya ta, amma ɓa duniya a lih mbele naŋ.

¹⁸Ko wa mitiɓaŋ le na, a gakaŋ kiita ta. Amma ko wa mitiɓaŋ ta na, kiita a jaŋ le si, asi a tiɓa slimiɗ ngi Mangal kirmalay ngi Buymisemuŋ ta.

¹⁹Kiita a gi anihĩ: li minjahha a so le ar duniya, amma mizli a hĩyãm luvuŋ fineˀ li minjahha tuwa, asi gwat ngi gi taŋ i malambaˀa.

²⁰Naŋ kine, ko wa gar magi gwat malambaˀ na, a hirsa li minjahha, a ngum so ng'ara ta, a zluwun vur gwat ngi gi naŋ malambaˀhay tuwa masa njikam.

²¹Amma mbur magi gwat mikaslsla na, a so angi li minjahha, ɓa gwat ngi gi naŋhay ar naŋ mujom ati Buymisemuŋ na, a njikam.»

²²A dirba nah, Yesu ati mizli ngi seˀehey a ram nga hirwuy Yude. A zik ati taŋ a diga neˀ, yo ara ci mizli ar yam.

²³Zaŋ kwana, ara ci mizli ar yam a Aynoŋ, gweˀ avu Salim, vur yam ada haɗi a diga. Mizli a soko ng'ava, dar a ca taŋ ar yam.

²⁴Asi ti nah na, a caka Zaŋ ar dangaya t'aruŋ.

²⁵Dar mekelemey a wuzla mizli ngi si Zaŋhay a zlaka tiri ati mbur Yude, asi ɓi ngi mezegwel taŋ ngi buna haŋ ati saray.

²⁶A ram ng'avi Zaŋ, a ɓakaŋ: «Kumani, mbur misi ati ka a dubazaw Zurdeŋ, ka miga sedewo naŋ tuwa na, ani a zla le, ara ci mizli ar yam aya. Mizli gar ara kilam ng'avaŋ!»

²⁷Zaŋ a mbiɗa taŋ di: «Da a vulaka gwata paɗ a muŋ da mburo ta na, a lum gwat ko neˀ gu ta.

²⁸Kum ti hirnga kum, kum i sedewo ngi ɓi ya miɓa zleˀe na: ‹Ya i Mesi ta, amma a slinoko ya a mbuŋ naŋ.›

²⁹Zil ngi ngwasa, i mbur maɗuvaŋ. Amma ngama ngi zile a cici deŋ, a cin ti cin. ˀAy ngi zil maɓi, a gaŋ mumul haɗa. Ya i mumul kanah ya, a ndila le wãˀ.

³⁰Anja naŋ a gil, ya kwana, yi mi nga dirba.»

³¹«Mbur muso paɗ ti muŋ na, naŋ dum hirnga ngi mizli gar. Mbur ngi ruwuy kwana, naŋ i mbur ngi ruwuy aya, a ɓi ɓi ngi gwat ngi ruwuy aya. Mbur muso paɗ ti muŋ,

³²a gi sedewo ngi gwat naŋ mupura ati naŋ micinaŋ, amma ko mbur matiɓa sedewo naŋ anta.

³³Mbur matiɓa sedewo naŋ na, a tiɓa ɓi ngi Buymisemuŋ le, naŋ kaslsla.

³⁴Naŋ kine, mbur Buymisemuŋ mislino di le na, a ɓi di i ɓi ngi Buymisemuŋ, asi Buymisemuŋ ara nahaŋ haɗa ti ˀUf naŋ.

³⁵Cine a wuɗ Mangala, a vula gwatay gar asi haŋ naŋ.

³⁶Mbur matiɓa Mangala na, naŋ ti siifa ngi sete. Mbur macina mi da Mangala ta na, anta sa lum siifa ta, amma Buymisemuŋ a sa ndir ti himaˀ a hirnga naŋ.»