Read South Giziga JHN 4 Bible Online

JHN 4 - South Giziga bible

JHN 4

¹Yesu a cine na, Farisahay a cinam na, naŋ ara lum mizli haɗa aseˀe, yo ara ci mizli ar yama fineˀ Zaŋ.

²Wãˀ naŋ na, Yesu ti hirnga naŋ, anta ci mizli ar yama ta, i mizli ngi seˀehey macaka taŋ.

³Yesu a pula hirwuy Yude, a mi nga Galile a muŋ.

⁴Ɓa ngi ru nga Galile vuna, sey a cuh tir hirwuy Samari.

⁵Naŋ kine, a ndil angi walahay mekelem ada angi hirwuy Samari, a zilaka Sikar, gweˀ avu guva ngi Zakop muvula da mangal naŋ Zozef.

⁶Vigiɗ ngi yam ngi Zakop ada angi li nah vuna. Yesu a gir le ti ru, a cifi a mi yam tuwa. Naɓa a gi ng'avi pas deŋ gu.

⁷Ngwas Samari a so ɓa a nuw yam. Yesu a ɓaŋ: «Vuliy yam ngi si takwa.»

⁸Naɓa mizli ngi seˀehey a ram le zleˀe nga hiɗika gwat ngi zum ar walahay.

⁹Amma ngwas Samari tuwa a ɓa Yesu: «Mbri mbri maka? Ka mbur Yude ma na, ki cufuɗ yam avu ya, ngwas Samari ma kwa?» Asi mike na, Yudehey anta wuɗam jum arleˀe ati Samariheye ta.

¹⁰Yesu a mbiɗaŋ di: «Anja da ki si na gwat Buymisemuŋ mavula le, yo da ki si na mbur hana maɓuw: ‹vuliy yam ngi si vuna le zleˀe› na, anja ani i ka macufuɗaŋ, ɓa a vuluw yam maɓul goŋ goŋ jaka.»

¹¹Ngwas tuwa a ɓaŋ: «Buy, jugulgwuy anta avu ka ta, yo vigiɗe naŋ jileŋ. Ki sa lumo yam maɓul goŋ goŋ vuna amaka?

¹²I dideˀ ndra Zakop muvula ndra vigiɗ ngi yam hana. Naŋ ti hirnga naŋ, a si yam ngi raˀa le. Ziri naŋhay ati ginew naŋhay kwana, a sam le ma. Ki wa kaɓa ka fineˀ Zakop vuna sukwani?»

¹³Yesu a mbiɗaŋ di: «Ko wa gar masi yam hana na, yam a sa gaŋ a muŋ ma.

¹⁴Amma da mbur misa si yam, ya masa vulaŋ di na le na, yam anta sa gaŋ mata wãˀ. Yam ya masa vulaŋ di na, a sa tiri miviɗiviɗi ngi yam maɓul goŋ goŋ, mavulaŋ siifa ngi sete jaka.»

¹⁵Ngwas tuwa a ɓaŋ: «Inga vuliy yam nah vuna sini buy, ɓa yam anta sa giy mata, yo ɓa yi so nga nuw yam aka mata.»

¹⁶Yesu a ɓaŋ: «Ara zilo zil ɗike, ɓa ki soko ng'aka.»

¹⁷Ngwas a mbiɗaŋ di: «Y'anta ti zil ta.» Yesu a ɓaŋ: «Ka miɓi k'anta ti zil ta na, kaslsla gisiŋ.

¹⁸Asi ki ɗuv ziley le zlum, yo mbur ka misi ati naŋ wurenna na, i zil ɗik ta gwaɗ naŋ. Ki ɓa le kaslsla.»

¹⁹Ngwas tuwa a ɓaŋ: «Yi pura na, ki mijiviɗi buy.

²⁰Dideˀ ndra Samariheye, a putukulom a mbuŋ Buymisemuŋ a hirnga muwã misenna, amma kum Yudeheye, ki ɓam ki putukulom a mbuŋ Buymisemuŋ, sey a Zeruzalem.»

²¹Yesu a ɓaŋ: «Ngwasa, tiɓa ɓi ɗu, pas naŋ ara ndilawa, ɓa mizli anta sa putukulom a mbuŋ Cine ndra Buymisemuŋ a hirnga muwã hana malla ko a Zeruzalem mata.

²²Kum Samariheye, Buymisemuŋ, kum maputukulom a mbuŋ naŋ na, ki si na ka ta Amma ndra Yudeheye, i putukulomo a mbuŋ Buymisemuŋ ndra misinaka le, vur ɓi ngi laha vu a so ti vu Yudehey.

²³Amma pas naŋ ara ndilawa, a ndilo le vuna si, ɓa mizli maputukulom a mbuŋ Cine ndra Buymisemuŋ gisiŋ gisiŋ na, a sa putukulom a mbuŋ naŋ ti musuɗuk waɗ ti kaslsla wãˀ. Asi mike na, Cine ndra Bumbulvuŋ a sipi di i mizli maputukulom a mbuŋ naŋ misi ka tayna.

²⁴Buymisemvuŋ i musuɗuku, vurˀe, mizli maputukulom a mbuŋ naŋ na, anja a putukulom ti musuɗuk naŋ waɗ ti kaslsla naŋ.»

²⁵Ngwas a ɓaŋ: «Yi si na le, Mesi, mbiɗeˀvra Kristu na, a sa sawa. Da a so le na, a sa njika ndra gwataya gar.»

²⁶Yesu a ɓaŋ: «Ya maɓuw hana, i ya vuna si.»

²⁷Hirak ti nah na, mizli ngi si Yesuhoy a ndiloko. Taŋ mupuraka Yesu maɓam ati ngwas na, a zuma taŋ hirnga le. Amma ko mbur mucufuɗaŋ: «Ki wuɗ mi ava ka?» malla: «Ki ɓam ɓi ati naŋ vur mike» na, anta.

²⁸Dar ngwas a pula kukulum naŋ, a kil ng'ar walahay, a ɓa mizli:

²⁹«Soko, puraka mbur ani, a ɓiy ɓi ngi gwat ya miga taŋ zleˀe le gar. Asinta, i Mesi tuwa kwani?»

³⁰Mizli a bam tir walahaya, a ram ng'avi Yesu.

³¹Hirak ti nah na, mizli ngi seˀehey a hurdumom avaˀa, a ɓakaŋ: «Kumani, inga zum ɗagay so.»

³²Amma naŋ a ɓa taŋ: «Y'ada ti gwat ngi zum, kum misina ka ta»

³³Angi nah na, mizli ngi seˀehey a cufuɗam vu ar wala taŋ, a ɓam: «Arona, mbur a vulaŋ gwat ngi zumo le aka kwa mbrike?»

³⁴Yesu a ɓa taŋ: «Gwat ngi zum ɗu, i gi gwat Buymisemuŋ mislino ya mawuɗo, waɗ kiɗa mi ngi slra naŋ.

³⁵Kum vuna, kum ada ɓam: ‹A ndir kiya mufaɗ aruŋ ɓa sifi a gi› kanah ta kwa? Amma ya i ɓukum na: zuɓaka hiri, puraka: gwatay a naham le, ɓa a gaka sifi taŋ muduba ta kwa?

³⁶Migi sifi ngi gwata, ara lum migir naŋ si, ara kuso gwat ngi sifiheye vur siifa ngi sete, hã mbur mizligi gwat ati mbur migi sifi naŋ, a mumulom jom arleˀeŋ.

³⁷Mizli ndrahay maɓam: ‹Mbur mekelem a zligi, mbur numuŋ a gi sifi naŋ› na, naŋ kaslsla gisiŋ.

³⁸Yi slinukum nga gi sifi ngi gwat mugirukum ko neˀ le ta, i mizli mekelemey migiram anga. Joˀ kumo, ki ciram tisi slra muvula taŋ gir zleˀe haɗa na.»

³⁹Samarihey haɗi ar walahay nah, a tiɓaka Yesu le, asi ngwas miɓa taŋ: «A ɓiy ɓi ngi gwat ya miga taŋ zleˀe le gar» na.

⁴⁰Samarihey mindiloko gweˀ avu Yesu tuwa ma na, a tumbulokoŋ ɓa a ndir ati taŋ, joˀ Yesu a zik ati taŋ hin cuw.

⁴¹Mizli haɗi a tiɓaka Yesu ti gidaŋ ava ma, vur mingiɓi naŋ maɓa ti balam naŋ muduba.

⁴²Dar a ɓaka ngwas tuwa: «Ndra matiɓam na, vur ɓi ka miɓa ndra di na mata, amma i cinam mingiɓi naŋ le ti slimiɗ ndra, yo i sinaka le, naŋ i Milaha duniya gisiŋ.»

⁴³Hin cuw a dirba nah na, Yesu a pula li nah, a mi nga Galile a muŋ.

⁴⁴Asi Yesu a ɓa le njah zleˀe si: «Anta ɗuvaka hirnga da mijiviɗ angi hirwuy naŋ tehhe a muŋ ta.»

⁴⁵Amma ti naŋ mindil angi hirwuy Galile na, Galilehey a tiɓakaŋ kuy kuy, asi taŋ kwana, a ram le zleˀe a gi muguzlum Pak a Zeruzalem aya, yo a puraka gwat Yesu miga taŋ a diga na le gar.

⁴⁶Dar Yesu a mo nga Kana, hirwuy Galile, walahay naŋ mimbiɗa yam, a tiri di mbaazla tuwa. Mbur madiɗa ngi sojehey ada a diga, mangal naŋ a ro ti jiji a Kapernahum.

⁴⁷Ti naŋ micina Yesu a so le ti Yude nga Galile na, aru ng'avaŋ, a tumbuloŋ ɓa aru nga Kapernahum, ɓa a mbulo mangal naŋ mawuɗ a muco.

⁴⁸Yesu a ɓaŋ: «Da ki puram cekenehey ati gwat migam ɗaˀtahay ta na, ki tiɓam ta wãˀ.»

⁴⁹Madiɗa ngi sojehey a ɓaŋ: «Da ki so wurenna ta na, mangal ɗu a sa muc, buy!»

⁵⁰Yesu a ɓaŋ: «Aru, mangal ɗike, naŋ da ti siifa.» Mbur tuwa a tiɓa mingiɓi ngi Yesu miɓaŋ di na le, a zuɓa jiviɗ, a ru.

⁵¹Ti naŋ misi a jiviɗ aruŋ si na, gawla naŋhay a soko, a sa jam di hirnga, a ɓakaŋ: «Mangal ɗike, naŋ da ti siifa!»

⁵²A cufuɗa taŋ: «Mangal a zla gi zuwen hirak ngi pas wanaka?» A mbiɗakaŋ di: «Ngi dambu, hirak ngi pas mingil ˀay na, vu muculok avu vu a tislaŋ.»

⁵³Cine ngi mangal a wulka na, Yesu miɓaŋ: «Mangal ɗike, naŋ da ti siifa tuwa» na, hirak ngi pas nah vuna. Zleˀ ti nah na, naŋ vuna ati hay naŋ gar a tiɓaka Yesu.

⁵⁴Yesu a gi hana i cekene mucuw naŋ. A ga a dirba naŋ mumo ti Yude nga Galile.