Read South Giziga JHN 8 Bible Online

JHN 8 - South Giziga bible

JHN 8

²Ngi miprik prik na, a mo ng'ar hay ngi Bumbulvuŋ a Zeruzaleme, mizli gar ara soko ng'avaŋ. A cifi, dar a zla a dubuna taŋ gwat.

³Buy ngi ɓimujuwahay ati Farisahay a sakaŋ ti ngwas mulumaka kasl ar li gi madama, a cicaka deŋ a wuzla mizli,

⁴a ɓaka Yesu: «Kumani, ngwas misenna, a joko di kasl ar li gi madama.

⁵Ar ɓimujuwa na, Moyis a ɓa ndra, ngwas misi ka hanayna, i ngi kuyup taŋ ti ɗugur. Ani ka ki ɓi ara mbrike?»

⁶A ɓam kahana, ɓa a cam a kwacay naŋ, ɓa a lumam ɓi ngi kupaŋ di. Amma Yesu a guɓ, a zla a tuh gwat a ruwuy ti muzuŋ haŋ.

⁷Taŋ ara cufuɗakaŋ ava na si, Yesu a zuba hirnga, a ɓa taŋ: «Anja mbur pal a wuzla kumo migi mungra ɗaˀ ta na, a zla hizig naŋ ti ɗuguro dumbuŋ.»

⁸Joˀ a guɓ a muŋ, a zla ara tuh gwat a ruwuy tuwa ma.

⁹Taŋ micinaka mingiɓi hana na, a dirba nah, a sumuɗom purlahha purlahha, a zlo avu mizli micawwahay. Yesu a ndir pal naŋ ati ngwas mideŋ a wuzla tuwa.

¹⁰Dar Yesu a slikiɗ deŋ, a ɓaŋ: «Taŋ ama ska ngwasa? Mbur mujuw ti kiita anta kwa?»

¹¹Ngwas a mbiɗaŋ di: «Ko mbur pal anta, Buy.» Joˀ Yesu a ɓaŋ: «Ya kwana, y'anta juw ti kiita ta ya. Aru, zle dana, anja ki gi mungra mata.»

¹²Akẽh na, Yesu a ɓa mizli tuwa ma: «Yi li minjahha ngi duniya. Mbur maru asi ya na, anta sa ru digi angi luvuŋ ta wãˀ, a sa lum li minjahha maru ti mbur ng'ar siifa.»

¹³Dar Farisahay a ɓakaŋ: «Ka ki ga sedewo ngi hirnga ɗike tehhe a muŋ si kwa? Mingiɓi ɗik i ngi tiɓi ta.»

¹⁴Yesu a mbiɗa taŋ di: «Ko da i ra ga sedewo ngi hirnga ɗu tehhe a muŋ kwana, na, sedewo ɗu, naŋ kaslsla ngbaŋ, asi li ya muso ti raˀa ati li ya maru ng'ara na, yi si na le. Amma kumo, li ya muso ti raˀa ati li ya maru ng'ara na, ki si na ka ta

¹⁵Kumo, ki slam kiita ka ngi mizli si. Ya, y'anta sli kiita da mbur ta.

¹⁶Yo da a gi le ɓa i sli kiita na, yi sli di i kiita mikaslsla wãˀ, asi i ya masla pal ɗu ta. Ndra cuwa ati Baha mislino ya.

¹⁷Na zle, a tohoko ar Ɓimujuwa kumo na, sedewo ngi mizli cuwo naŋ jeŋŋe.

¹⁸I ra ga sedewo ngi hirnga ɗu tehhe a muŋ, Baha mislino ya kwana, ara gi sedewo a hirnga ɗu ma.»

¹⁹Dar a ɓakaŋ: «Bunuk vuna naŋ amaka?» Yesu a mbiɗa taŋ di: «Ki sinikiy ya ta, yo ki sinaka Baha ta ma. Da ki sinikiy le zleˀe na, anja ani, ki sinaka Baha le zleˀe ya.»

²⁰Yesu miɓa ɓi hana na, naɓa ara dubun gwat da mizli ar hay ngi Bumbulvuŋ angi li ngi cikila dala. Ko mbur mija haŋ ava anta, asi pas naŋ a ndila t'aruŋ.

²¹Yo Yesu a ɓa taŋ ma: «I ra cuh le, kisa sipikiy, amma kisa micam ar mungra kumoyo. Li ya maru ng'ara na, ki ram gu ta.»

²²Dar Yudehey a ɓam ar wala taŋ: «May naŋ ada ngi kiɗa hirnga naŋ tehhe a muŋ kwa mbrike? Vur mike na, a ɓi: ‹Li ya maru ng'ara, ki ram gu ta.›»

²³Yesu a mbiɗa taŋ di: «Kum i ngi ruwuyoy aka, amma ya yi so ti muŋ. Kum i ngir duniya misenna, ya yi ngir duniya misenna ta.

²⁴Ya muɓukum: kisa micam ti mungra kumoy na, vurˀeŋ. Naŋ kine, da ki tiɓikiy i ya misi Ya Yahha [5] na ta na, kisa micam ar mungra kumoyo.»

²⁵Joˀ a ɓakaŋ: «Ka ki waka?» Yesu a mbiɗa taŋ di: «I ɓi ya mupula ngi ɓukum di mbak le ta, zle angi zlivirzi naŋ na.

²⁶Y'ada ti ɓi haɗa ngi ɓi waɗ ngi sli a hirnga kumo. Amma mbur mislino ya na, naŋ jeŋŋe gisiŋ, yo ɓi ya maɓa njah da duniya gar na, i ɓi ya micino di ava.»

²⁷Yesu miɓa taŋ, vur Cine na, taŋ a slaka wala nah ta.

²⁸Dar Yesu a ɓa taŋ: «Mangal ngi mburo, da kum misa zuɓaka le nga muŋ na, kisa sinaka i ya misi Ya Yahha na, yo y'anta gi gwat ngi mongoy ɗu ko neˀ ta, i ɓi di i ɓi Baha mudubuniy di.

²⁹Mbur mislino ya, naŋ da ati ya, a puliy fuk pal ɗu ta, asi yi gi di i gwat maciraŋ hiri ndrehhe.»

³⁰Akẽh na, ti Yesu maɓi kahana na, mizli haɗa a tiɓakaŋ.

³¹Joˀ Yesu a ɓa Yudehey mitiɓakaŋ tuwa na: «Da ki cicam le zlak ar mingiɓi ɗu na, kum i mizli ngi si yahay gisiŋ.

³²Ki sa sinaka ɓi mikaslsla, ɓi mikaslsla a sa tiri ti kum mizli mulumam hirnga taŋ le.»

³³Taŋ a mbiɗakaŋ di: «Ndr'i dideˀ ngi Abrahamay, yo mbur mitiri ti ndra beke ɗaˀ anta. Ki zla mbri ɓa ki ɓa ndra: ‹I sa lumam hirnga ndra ti lum na ka?›»

³⁴Yesu a mbiɗa taŋ di: «Gisiŋ gisiŋ, yi ɓukum na: mbur magi mungra gar na, i beke ngi mungra.

³⁵Beke i mbur ngi hay ndrehhe ta, amma mangala a ndir i mbur ngi hay ndrehhe.

³⁶Da i Mangal mucukukum tir beke so na, kisa tiram mizli mulumam hirnga le gisiŋ gisiŋ.

³⁷Yi si na le, kum i dideˀ ngi Abrahamay. Amma ki ra sipikiy, ɓa ki kiɗikiy vagay, asi mingiɓi ɗu anta ci a mevel kumo ta.

³⁸Yi ɓi di i ɓi ngi gwat ya mupura avu Baha, yo kumo kwana, ki gam di i gwat kum micinaka avu cine kum aya.»

³⁹A mbiɗakaŋ di: «Cine ndra i Abraham.» Yesu a ɓa taŋ: «Da kum i ziri ngi Abrahamay na, gam gwat ka ngi Abraham vuna so.

⁴⁰Ya i ɓukum di i ɓi mikaslsla, ya micina avu Buymisemuŋ. Ani wurenna ki ra sipikiy ɓa ki kiɗikiy vagay. Abraham a gi gwat kahana ɗaˀ ta.

⁴¹Kumo, ki gam di i gwat ngi cine kum.» A mbiɗakaŋ di: «Cine ndra purla si, i Buymisemuŋ. A yam ndra ngi madama ta.»

⁴²Yesu a ɓa taŋ: «Da Buymisemuŋ i Cine kum zleˀe na, anja ni ki wuɗikiy le, vur ya mubo, ya muso na, ti vu Buymisemuŋ vuna. Yi so ngi mongoy ɗu ta, i naŋ mislino ya.

⁴³Ki cinaka ɓi ya maɓukum di na ta vur mike? Asi ki ndilaka ngi cine mingiɓi ɗu ta.

⁴⁴Cine kum i Satan, yo ki wuɗam gi di i gwat cine kum mahĩyãŋ. Naŋ i mikiɗa hirnga zle angi zli virzi naŋ. A cici ɗaˀ ar ɓi mikaslsla ta, asi ɓi mikaslsla anta ava ta. Da ara sli slir na, a ɓi di i ɓi ngi kpak nga naŋ, vur naŋ i misli slir, yo i buy ngi slirey vuna.

⁴⁵Amma ya i ɓi di i ɓi mikaslsla, kum matiɓaka ta na, vurˀeŋ.

⁴⁶Mabiga i gi mungra le na, i wa a wuzla kumo ka? Na, da yi ɓi di i ɓi mikaslsla na, ki tiɓaka ɓi ɗu ta vur mike?

⁴⁷Mbur muso ti vu Buymisemuŋ na, a cine mingiɓi ngi Buymisemuŋ. Amma kum i mizli ngi Buymisemuŋhoy ta, kum majikam slimiɗ asi ɓi ɗu ta na, vurˀeŋ.»

⁴⁸Yudehey a mbiɗakaŋ di: «Na, ndra muɓukuw: ‹Ki mbur Samari, setene ada a hirnga ɗike› na, naŋ kaslsla ta kwa?»

⁴⁹A mbiɗa taŋ di: «Ĩˀĩ, setene anta a hirnga ɗu ta.Yi ɗuv di i hirnga da Baha, amma kumo ki ra zirɗaka mi ɗu.

⁵⁰Na zle, yi sipi di i dudok da hirnga ɗu ta. Mbur masipiy di da ya ada. Yo migi kiita, i naŋ.

⁵¹Gisiŋ gisiŋ, yi ɓukum na: Da mbur a ja mingiɓi ɗu le a hirnga na, anta sa muc ta ndiɗaˀ wãˀ.»

⁵²Dar Yudehey a ɓakaŋ: «I sinaka le wurenna muduba, setene ada a hirnga ɗike! Abraham a muc le, yo mijiviɗey kwana, a micam le. Na, ka ki ɓi ani: ‹Da mbur a ja mingiɓi ɗu le a hirnga na, anta sa muc pam le ta.›

⁵³Ki funa dideˀ ndra Abraham mumuc na le sukwani? Mijiviɗey kwana, a micam le ma. Na zle, ki wa vu ɗike, ki waka?»

⁵⁴Yesu a mbiɗa taŋ di: «Da i ya maga dudok da hirnga ɗu tehhe a muŋ zleˀe na, naɓa dudok ɗu a bigi gwat neˀ ta. Magiy dudok i Baha, i naŋ kum maɓam i Buymisemuŋ kumo na.

⁵⁵Kumo, ki sinakaŋ ɗaˀ ta, amma ya i sinaŋ le. Da yi ɓi le i sinaŋ ta na, ɓa yi tiri misi slir le ka kum vuna ya. Amma yi sinaŋ le, i ra ja mingiɓi naŋ a hirnga.

⁵⁶Dideˀ kum Abraham a mumul le ngi sa pura hin ɗu. A pura le, yo a mumul haɗa.»

⁵⁷Angi nah na, Yudehey a ɓakaŋ: «Ko vi kukur zlum kwana, ki ndila t'aruŋ, ki ɓi ki pura Abrahama le mbrike?»

⁵⁸Yesu a mbiɗa taŋ di: «Gisiŋ gisiŋ, yi ɓukum na: Ti Abraham misi anta aruŋ na, Y'ada.»

⁵⁹Dar a hilam ɗugur ɓa a hizigakaŋ. Amma Yesu a ɗum ɗum, a bi tir hay ngi Bumbulvuŋ.