Read South Giziga ACT 1 Bible Online

ACT 1 - South Giziga bible

ACT 1

¹Naŋ kine, Teyofil, ngama ɗu mezleŋ, angi ɗerewol ɗu mudumbuŋ na, yi ɓi di ɓi ngi gwat Yesu miga gar waɗ gwat naŋ mudubuna da mizli zle avu zlivirzi naŋ,

²hã ndila hin taŋ muzuɓaka nga muŋ. Dumbuŋ ti taŋ muzuɓaka nga muŋ t'aruŋ na, mizli naŋ muwuna taŋ ɓa a tiram mislin naŋhay na, a biga taŋ mingiɓi naŋ le ti ˀUf Mipal.

³A dirba bonoy naŋ, naŋ misa na ma na, a biga taŋ vu ti jiviɗ wal wal haɗi, naŋ da ti siifa. A biga taŋ vu, ara purakaŋ, hã hin kukur mufaɗ. A ɓa taŋ ɓi ngi Zumabuy ngi Buymisemuŋ le.

⁴Ngi pas numuŋ ada na, ara zumam ɗaf bumoˀ, a ɓa taŋ, anja ɓa a pulaka Zerusaleme ta, amma ɓa a kutukoko gwat Cine miɓa taŋ di di ɗaˀ tuwa. A ɓa taŋ: «I gwat kum micinaka, ya muɓukum di ti balam ɗu tuwaŋ.

⁵Asi Zaŋ a ci di mizli ar yam tewle, amma kumo, angi hin neˀ nga mbuŋ aka na, a sa cukum ar ˀUf Mipal.»

⁶Dar misliney mukusomo, a cufuɗakaŋ: «Buy, ka masa ɗiya zumabuy ngi Israyel na, wurenna kwa?»

⁷Naŋ a ɓa taŋ: «Hin naŋ ati pas naŋ, Baha muɗuva ti gidaŋ naŋ na, kumo, ki sinaka gu ta.

⁸Amma kumo, kisa lumam gidaŋ, i ˀUf Mipal masa sawa ar kum. Dar kisa tiram sedewo ɗuwoy a Zeruzalem, angi hirwuy Yude gar, a Samari waɗ hã asi hirwuy mira kiɗo mi.»

⁹A dirba mingiɓi hana na, a cuh nga muŋ, taŋ ara purakaŋ. Gazlavay a sirta sirit a mihiri taŋ.

¹⁰Ti taŋ muroko hiri tataˀ ng'avi Yesu macuh nga muŋ tuwa na, mizli cuw ti zana babarahay ɓaˀ ɓaˀ avu vu, a bigaka taŋ vu kutum aciki taŋ akẽh si.

¹¹Dar a ɓaka taŋ: «Mizli Galilehey, ki cicam dedeŋ akẽh, hiri tataˀ nga muŋ vur mike? Yesu muzuɓaka nga muŋ na, a sa mawa ti jiviɗ mupurla, ka kum mupurakaŋ, naŋ mucuh nga muŋ vuna ma.»

¹²Dar misliney a pam sar baɗ tir li miɗingir mazilaka muwã Tutumbur tuwa, a mam nga Zerusalem a muŋ.Wala ngi muwã nah ati Zerusaleme, a gi gwat ngi kilometir purla si.

¹³Ti taŋ mimoko nga Zeruzalem na, a jiɗam ng'ar hay minjirngasl a hirnga cala, viŋ taŋ macifam anga hõyyõ zleˀe.Taŋ Piyer, Zaŋ, Zak, Andre, Filip, Tomas, Bartelemi, Matiye, Zak mangal ngi Alfe, Simoŋ mawuɗ hirwuy naŋ waɗ Yudas, mangal ngi Zak.

¹⁴Taŋ gar ati ngwas mekelemey ada, yo Mariya mumuŋ ngi Yesu waɗ sukum ngi Yesuhoy, taŋ jom arleˀe, a diram dibiɗ bulaw le ta.

¹⁵Ti di nah na, mitiɓihey a gam gwat ngi skat ti kukur cuw gu, a kusom le. Piyer a slikiɗ deŋ a wuzla taŋ, a ɓa taŋ:

¹⁶«Sukum ɗuwoy, ɓi ngi ˀUf Mipal mubo di ti balam Davit, ar Ɓimutoho na, anja a gi muduba. Yudas mitiri mibigi jiviɗ da mizli mijaka Yesu na, Davit a ɓa le daf dumbuŋ.

¹⁷Yudasa, naŋ zleˀe a wuzla ndra, a vulakaŋ slra mupurla ati ndra vuna ya.

¹⁸Yo mbur nah na, a hiɗik guva ti dala muwurkakaŋ di slra malambaˀ tuwa, dar a diɗ hirnga jik nga ruwuy, kwacay a nduz bav, tanday curɗoɗ avra.

¹⁹Mizli Zerusalemey gar a cinaka labara nah le. Vurˀe, a zilaka guva nah ti mi taŋ, ‹Hakeldama›, mbiɗeˀvra: Guva ngi pumbusu.

²⁰Dambalaka a tohoko le ar Dimise, a ɓi na: ‹Anja hay naŋ a tiri diŋ, yo anja mbur a cifi anga ta.› Yo a tohoko ma na: ‹Anja mbur mekelem a zuɓa slra naŋ.›

²¹«Ti ndra miram digi, Buy Yesu ɓaˀ a mbuŋ ndra ar lihey gar na, mizli mekelemey ada mandiram zlaɓ zlaɓ ati ndra,

²²zle avu hin ngi Zaŋ mici mizli ar yam, hã a ndila hin muzuɓaka Yesu nga muŋ ti wuzla ndra. Anja mbur purla a wuzla taŋ, a jumo ng'avi ndra, ɓa i gaka sedewo ngi slikiɗ ngi Yesu ti wuzla mumucahaya.»

²³A bigam mizli cuw: Zosef mazilaka Barsabas, a cakaŋ slimiɗ ti migala, Yustus, waɗ Matiyasa.

²⁴Dar a zlaka diradibiɗ, a ɓam: «Bumbulvuuŋ, ka misina mevel ngi mizli gar. Biga ndra mbur ka muwuna a wuzla mizli mucuw hanayna,

²⁵ɓa a cifi mislin ar li ngi Yudas mupula, ɓa aru ng'ar li nga naŋ mihĩˀĩ na.»

²⁶Joˀ a gam ceregezleŋ. Ceregezleŋ a diɗ angi Matiyas. Zle tapasa, a jum ng'avi mislin mukuruˀ ngaŋ kaˀhaya.