Read South Giziga ACT 10 Bible Online

ACT 10 - South Giziga bible

ACT 10

¹Mbur mekelem ada a buy mimadiɗa, a zilaka Korney. I mbur miwi sojehey skat ar vurum ngi Roma mazilaka vurum Itali.

²I mbur misipi jiviɗi, yo mazluwun ti Buymisemuŋ, naŋ ati hay naŋ gar. Ada jina misi murga ngi Yudeheye haɗi teˀe, a ndir ar li tumbulo Buymisemuŋ.

³Ngi pas mekelem ada, hirak ng'avi pas ngi ɓula away ngi hay na, a pur modro ngi Bumbulvuŋ ti kleŋ, a pura kaɗaŋ kaɗaŋ, ara ci ngi hay naŋ, ara zilaŋ: «Korney, Korney!»

⁴Korney a ɗuva hiri taˀ angaŋ, zluwun ara gaŋ, a mbiɗaŋ di: «I mi migi ka Bumbulvuŋ? Modro ngi Bumbulvuŋ a ɓaŋ: «Diradibiɗ ɗik ati gimezle ɗik da misi murgahay na, Buymisemuŋ a tiɓa le.

⁵Wurenna, slin mizli nga Zafa, ɓa a soko ti Simoŋ mekelem ada, micakaŋ slimiɗ ti migala Piyer.

⁶Masay naŋ i Simoŋ mekelem ada, i mbur mufukuɗa garaka, hay naŋ gweˀ a mi mubuliy.»

⁷A dirba modro miɓaŋ ɓi tuwa, mucuh si na, Korney a zilo mizli cuw a wuzla gawla naŋhay waɗ soje naŋ pal, miteŋteŋ, mizik le ava.

⁸A slufa taŋ ɓi modro miɓaŋ di tuwa gar, a slina taŋ nga Zafa so.

⁹Li naŋ muwuno, naɓa taŋ a jiviɗi, taŋ gweˀ avu walahaya, Piyer a jiɗ le nga hirnga gbale, ɓa a dir dibiɗi, a gi ng'avi pas deŋ gu.

¹⁰Amma maya zla jaŋ, a wuɗ gwat ngi zum. A ra da ka ŋ gwat ngi zumo ti di aruŋ na, a pur gwat gurjik ti kleŋ.

¹¹A singila muŋ na, a wucuh le wucah. Gwat ara po sar, naŋ kaɓa godo madiɗaŋ, a sin kini ta, a jaka mivay naŋhaya le kaw kaw mufaɗ taŋ, a so rasl a ruwuy.

¹²Sukwi ngi gwat misi titirihey gar a huroˀo, gwat misahmi ati gwat makurmuɗom ti kwacayay, waɗ ɗiyuwoy.

¹³Dar a cin ˀay ngi mbur maɓaŋ: «Piyer, slikiɗi, sli ˀay naŋ ɓa ki zum!»

¹⁴Piyer a mbiɗaŋ di: «Bumbulvuŋ, ndiɗaˀ wãˀ, asi gwat mitika le gar malla gwat malambaˀ ngi zum ta gar na, yi zum ɗaˀ ta wãˀ si!»

¹⁵ˀAy ngi mbur tuwa, a ɓaŋ sar mucuw naŋ ma: «Da gwat Buymisemuŋ mitiɓa le i gwat ngi zum na, anja ka ki tiri di i gwat lambaˀ ta.»

¹⁶A gi kanah kanah hã is makir, joˀ gwat tuwa a mi kutum nga muŋ a muŋ.

¹⁷Hirak ti Piyer mawuluk ɓa a si na pulaˀvra ngi gwat naŋ mupura ti kleŋ nah na, naɓa mizli Korney mislino taŋ, mucufuɗaka hay ngi Simoŋ aka aka tuwa, t'ada dedeŋ a mizlingreŋ.

¹⁸A zlaka a tilam mi ti gidaŋ ngi haya, a ɓam: «Simoŋ micakaŋ slimiɗ ti migal Piyer na, naŋ ar hay hana kwa?»

¹⁹Ti nah na, Piyer ara wuluk ar gwat naŋ mupura ti kleŋ tuwa aruŋ ni. Amma ˀUf Mipal a ɓaŋ: «Mizli cuw [3] ani a cufuɗukuw.

²⁰Slikiɗ, pi sar cak kutum, aram bumoˀ, ko ki wuluk cuw cuw ta, asi i ya mislino taŋ.»

²¹Piyer a po sar ng'avi mizli tayna tuwa, a ɓa taŋ: «Y'ani, yi mbur kum maram ti pur naŋ tuwa. Ki soko na mbri so?»

²²A mbiɗakaŋ di: «Korney, mbur miwi sojehey skat, mbur mikaslsla, mazluwun ti Bumbulvuŋ, mizli Yudehey keɗeɗe gar mangilam di wuy na, mislino ndra i naŋ. Asi modro ngi Bumbulvuŋ a njikaŋ di, a ɓaŋ ɓa aru ti ka ngi hay naŋ, ɓa a sa cine mingiɓi ɗike.»

²³Dar Piyer a ci ti taŋ ngi hay, a hinam. Li naŋ muwun si na, a ram bummoˀ. Mekelemey a wuzla sukum naŋ mitiɓi ngi Zafahay a ki sakaŋ.

²⁴Yo ngi hin mucuw naŋ so na, a ndil a buy mimadiɗa. Korneye kwana, ara kutuko taŋ, a zilo muy naŋhay le ati yeme naŋhaya.

²⁵Hirak ti Piyer mandilo na, Korney ara ji di hirnga, a hin krap a mbuŋ naŋ ɓa a ɗuvaŋ hirnga.

²⁶Joˀ Piyer a ɓaŋ: «Slikiɗ deŋ ti deŋ, ya vuna, yi mbur titra ya.«Dar a jinaŋ ngi slikiɗe.

²⁷Piyer a ci ngi haya bal ti kiɗa slir ati naŋ. Keɗ na, zigiduw taˀ, a kusom le.

²⁸Dar a zla a ɓi: «Ɓa mbur Yude, a ndir ɓaˀ ngi ru ngi hay mbur Yude ta, malla ko ngi ru blaw blaw kwana, ki sinaka le, i mungra madiɗaŋ. Amma ya, Buymisemuŋ a bigiy di le, ɓa i pura mburo i misi dili malla i manja dili na, a gi ta.

²⁹Ka muzulo ya na, yi so manja wuluk cuw cuw na vurˀe. Amma wurenna so na, yi wuɗ ɓa i si na ɓi ka muzulo ya hĩˀĩ vurˀe na.»

³⁰Korney a mbiɗaŋ di: «Dana a gi le ani hin makir. Ti pas ngi ɓula away ngi hay kahana na, yi ro dir dibiɗ a hay ɗu. Gurjik si na, mbur misi ti zana miwilik wilik deŋ a mbuŋ ɗu.

³¹Joˀ a ɓiy: ‹Korney, Buymisemuŋ a cine diradibiɗ ɗike le, yo a ro keŋŋe ti gimezle ɗik da misi murgahay na.

³²Slin mizli nga Zafa ɓa a ziloko Simoŋ mazilaka ti migal Piyer na, ɓa a so ng'aka. Masay naŋ i Simoŋ mufukuɗa garak, hay naŋ gweˀ a mi mubuliy.›

³³Yi slin kutum ng'avi ka si, ani ki ngum so le ti mevel purla jaka. Wurenna so na, ndr'ani gar a mbuŋ ɗik aka, ɓa ngi cine ɓi ngi Bumbulvuŋ mislino ka, ɓa ki ɓa ndra di na.»

³⁴Dar Piyer a zla a ɓi: «Yi si na le gisiŋ, Buymisemuŋ anta pur mburo ti pur ta.

³⁵Yo a wuzla sukwi ngi mizli gar, da mburo ra zluwun di, ara gi gwat mijeŋŋe na, Buymisemuŋ a hĩyãŋ.

³⁶A slino mingiɓi naŋ da Israyeley, a sa taŋ ti Ɓimezle ngi vula zuyo, tisi Yesu Kristu, naŋ Bumbulvuŋ ngi mizli gar.

³⁷«A dirba Zaŋ mitil mi ti ɓi ngi ci mizli ar yama, ɓi migi angi hirwuy Yude gar na, ki sinaka le, a zlo zle a ruwuy Galile.

³⁸Ki sinaka le, Yesu ngi Nazarete, Buymisemuŋ a vulaŋ gidaŋ ngi ˀUf Mipala le, a liˀi ti gimezle ar lihey gar, a mbulo mizli muroko asi haŋ ngi Satanaya le gar, asi Buymisemuŋ naŋ da ati naŋ.

³⁹«Gwat naŋ miga angi hirwuy Yude waɗ a Zeruzalem gar na, ndr'i sedewo naŋhay. Naŋ vuna, a kiɗaka vagay, law avu dum.

⁴⁰Angi hin mimakir naŋ na, Buymisemuŋ a slikiɗaŋ le a muŋ, a ga ɓa a biga vu naŋ,

⁴¹da mizli gar ta ɓula, amma sey da migi sedewo naŋhay Buymisemuŋ muwuna taŋ zleˀe daf dumbuŋ, da ndra mizli muzumam gwat ati misam gwat bumoˀ, a dirba naŋ mislikiɗ ti wuzla mumucahay na.

⁴²Dar a ɓa ndra ɓa i tilam di mi da mizli, ɓa i gaka taŋ sedewo nah, i ɓaka taŋ: ‹Yesu i mbur, Buymisemuŋ micifa, ɓa a ga kiita da mizli misi ti siifahay ati mumucahay.›

⁴³Mijiviɗey gar migam sedewo na, ar naŋ, a ɓam na: ‹Ko wa gar mitiɓaŋ le na, mungra naŋhay a puyam le, ti gidaŋ ngi slimiɗ naŋ.›»

⁴⁴Ti Piyer mira ɓa ɓi hana aruŋ si na, ˀUf Mipal a pi sar ar mizli macinam Ɓi ngi Buymisemuŋ gar.

⁴⁵Yude mitiɓihey mikisoko Piyer tuwa, mupuraka hã ˀUf Mipal a pi sar le angi mizli Yudehey ta tuwa ya na, ɓi naŋ a zuma taŋ hirnga le.

⁴⁶Asi mike na, ara cinam mizli tayna tuwa ara ɓam ti mi taŋ misinaka ta, ara hunumaka Buymisemuŋ Mimadiɗa. Dar Piyer a zla a ɓi:

⁴⁷«Na, mizli tayna a lumam ˀUf Mipala le ka ndra vuna ya, mbur matika taŋ ngi ci ar yama ada kwa?»

⁴⁸Piyer a ɓi ɓa a caka taŋ ar yam ti zila slimiɗ ngi Yesu Kristu. Joˀ a cufuɗakaŋ ɓa a cifi ngi hin neˀ ati taŋ.