Read South Giziga ACT 11 Bible Online

ACT 11 - South Giziga bible

ACT 11

¹Misliney ati mitiɓi ngi Yudeheye, a cinam na, mizli Yudehey ta kwana, a tiɓaka ɓi ngi Buymisemuŋ le ya.

²Ti Piyer mindilo a Zerusalem na, mizli micam le a mizawa, a mbiɗakaŋ hirnga,

³a ɓakaŋ: «Ki ci le a hay sukwi ngi mizli macam mizaw ta, hã ki zumam gwat le bumoˀ.»

⁴Dar Piyer a slufa taŋ ɓi nah zle avu zli virzi naŋ ti sila ti sila. A ɓa taŋ:

⁵«Ti ya misi ar walahay Zafa ar li diradibiɗ na, i pur gwat ti kleŋ. Gwat ara po sar ti muŋ, naŋ kaɓa godo madiɗaŋ, a sin kini ta, a jaka mivay naŋhaya le kaw kaw mufaɗ taŋ, a po sar ti muŋ, a so sesẽŋ kasl avu ya.

⁶Yi ɗuva hiri taˀa, keɗ keɗ na, sukwi ngi gwat misahmi ngi ruwuyoy, useˀ ngi ɓuhoy, gwat mukurmuɗ ti kwacayay ati sukwi ngi ɗiyuwoy.

⁷Dar yi cin ˀay ngi mbur, a ɓiy: ‹Piyer, slikiɗ, sli ˀay naŋ ɓa ki zum!›

⁸Amma yi mbiɗaŋ di: ‹Buymisemuŋ, ndiɗaˀ wãˀ, asi gwat mitika le, malla gwat misi dili gar na, a ci ɗaˀ a balam ɗu ta wãˀ si.›

⁹ˀAy tuwa a cino ngi mucuw naŋ paɗ a muŋ, a ɓiy ma: ‹Gwat Buymisemuŋ mitiɓa le i ngi zum na, ka ki tiri di gwat lambaˀ ta.›

¹⁰A gi kanah kanah hã is makir, dar gwat tuwa gar a mi nga muŋ a muŋ.

¹¹Angi nah vuna si na, keɗ na, mizli makir dedeŋ ar hay ndra misi anga tuwa, a slinoko taŋ baɗ a buy mimadiɗa nga vi ya.

¹²Dar ˀUf Mipal a ɓiy ɓa i ram ati mizli tayna manja wuluk cuw cuw. I sukum ɗu mitiɓi mimerkeɗ hanayna mikisikiy, dar i cam ngi hay Korneye.

¹³A slufa ndra, naŋ mupura modro ngi Bumbulvuŋ mibigaŋ vu a hay naŋ, miɓaŋ: ‹Slin mbur nga Zafa ɓa ara zilo Simoŋ mazilaka ti migal Piyer na.

¹⁴A sa buguw gwat masa lihuw, ka ati hay ɗik gar.›

¹⁵Ti ya mizla ɓa i ɓi si na, ˀUf Mipal a po sar ar taŋ kaɓa ti naŋ mipo sar zleˀe ar ndra na ya.

¹⁶Dar i wulka mingiɓi ngi Buy Yesu keŋ, a ɓi: ‹Zaŋ a ci mizli ar yam tewle, amma kumo, kisa lumam ci ar yam ti ˀUf Mipal.›

¹⁷Da Buymisemuŋ a vulo taŋ gwat mupurla ati ngi ndra le, asi tiɓi Buy Yesu Kristu na, yi mbur ngi tika Buymisemuŋ ar slra naŋ kwa?»

¹⁸A dirba taŋ micinaka mingiɓi hana na, mevel taŋ a tisl le, dar a hunumaka Buymisemuŋ, a ɓam: «Pura, Buymisemuŋ a pula jiviɗ le da mizli Yudehey ta, ɓa a mbiɗam mevel, a lumam siifa ya.»

¹⁹Hirak ti mikiɗaka Etiyen vagay tuwa na, ara guzuvuraka Cikil ngi misikristuhoyo, a zliɗam hirnga mber mber, mekelemey a ndilam hã a Fenisi, a Sipre, yo a Antiyos. Amma a tilam mi ti ɓi ngi Bumbulvuŋ sey da Yudehey tewle.

²⁰Dambalaka mitiɓi mekelemey a wuzla taŋ, i mizli Sipre ati Sireney, taŋ mindilam a Antiyos na, a tilam mi ti Ɓimezle ngi Buy Yesu da Grekey aya.

²¹Bumbulvuŋ ara jina taŋ haɗi teˀe, hã mizli haɗi a mbuɗoko ng'avu Bumbulvuŋ, a tiram mitiɓihey.

²²Cikil ngi misikristu ngi Zeruzalemeye, a cinaka ɓi nah le, dar a slinaka Barnabas nga Antiyoso.

²³Ti naŋ mindil na, a pura gimezle Buymisemuŋ miga da mizli na le, a mumul haɗi, a vula taŋ gidaŋ ɓa a ndiram gumbaˀ avu Bumbulvuŋ ti mevel taŋ wãˀ.

²⁴Asi mike na, Barnabas i mbur mikaslsla, a nih le ti ˀUf Mipal waɗ ti tiɓi. Zigiduw haɗi a jumo ng'avu Bumbulvuŋ kahana.

²⁵Joˀ Barnabas aru nga puro Sawul a Tarse.

²⁶A luuma a diga, dar a so di nga Antiyos. A gam vi soŋ wãˀ bumoˀ ar li gi slra a wuzla Cikil ngi misikristu tayna, yo a dubunaka gwat da zigiduw taˀ kuy kuy. Mizli a zlaka zila mizli ngisi Yesuhoyo «misikristuhoy» dumbuŋ na, a Antiyos vuna.

²⁷Ti di nah na, mijiviɗey a ram baɗ a Zerusaleme nga Antiyos.

²⁸Mbur pal a wuzla taŋ, a zilaka Agabus, ˀUf Mipal a njikaŋ di na, may a sa gi haɗi asi ruwuy gar. A gi le gisiŋ ti Klod mazum buyo.

²⁹Dar mitiɓihey a ɓam ar wala taŋ, ko wa gar a vul gwat neˀ avu gidaŋ naŋ, ɓa a slinam di ngi jina sukum taŋ mitiɓihey misi angi hirwuy Yude gar.

³⁰A gaka le kanah. A sa vulaka gwat nah, a haŋ Barnabas ati Sawul miram di da mizli micawwahaya.