Read South Giziga ACT 13 Bible Online

ACT 13 - South Giziga bible

ACT 13

¹Mijiviɗey ati mizli mudubuna gwat da mizli ada a wuzla Cikil ngi misikristu ngi Antiyosoyo: i ti Barnabas, Simeyoŋ mazilaka ti mi gala Titra, Lukiyus ngi hirwuy Sirene, Manaheŋ, mendele ngi buy Herod, waɗ Sawul.

²Ngi hin numuŋ ada na, taŋ ara dilkam a mbuŋ Bumbulvuŋ, yo ara gam dalyam, ˀUf Mipal a ɓi na: «Wikiy vu ti Sawul ati Barnabasa, hĩˀĩ vur slra ya mawuɗ i vula taŋ di.»

³A dirba taŋ migam dalyam, a diram dibiɗ na, a bucaka taŋ haŋ a hirnga, a pulaka taŋ a ram.

⁴Barnabas ati Sawul mupuraka ˀUf Mipal a slina taŋ le ng'ar slra na, a pam sar nga Silisi. A cam palalam, a ram kini ngir ti Sipre.

⁵Ti taŋ mindilam a Salamin na, a tilam mi ti ɓi ngi Buymisemuŋ ar hay ngi diradibiɗ ngi Yudeheye. Zaŋ-Marke mijini taŋ angi slra, naŋ da ati taŋ aya.

⁶A dirba taŋ mutuwuɗaka matura wãˀ na, a ndilam a Pafos, a zliram ti mbur misi ketele a diga, a wa vu naŋ ka mijiviɗ kini. I mbur Yude, a zilaka Bar-Yesu.

⁷I mbur ngi wuzla mizli ngi mamay buy Sergiyus Polus, i mbur misi lesle. A zila Sawul ati Barnabasa, yo a biga taŋ di njah wãˀ, naŋ da ti may ngi cine mingiɓi ngi Buymisemuŋ.

⁸Amma Elimas, mbur misi ketele, mbiɗeˀvra ngi slimiɗ naŋ kahana, a tika taŋ, yo a tika buyo ɓa a tiɓiu ta.

⁹Dar Sawul mazilaka Polo, i minaha le ti ˀUf Mipal, hiri taˀ angi Elimasa,

¹⁰a ɓaŋ na: «Ka mbur mundus ti wer malambaˀ ati ketele a kwacay ɗike! Mangal ngi Satan, mesene ngi gi gwat mijeŋŋe! Ki wuɗ ki pula hirya jiviɗ ngi Bumbulvuŋ mikaslsla na ta kpak kwa?

¹¹Pura, wurenna, haŋ ngi Bumbulvuŋ a ro taˀ ar ka, kisa hulufu, ko k'anta sa pura pasa mata, hã tapas naŋ misa ɓi le muŋ ma.«Angi nah na vuna si na, luvuŋ titra a sirta Elimas tuwa timbiɗim, a mbiɗi daˀ ar leˀeŋ, ngi pura mbur ɓa a ɗiɗaŋ.

¹²Buy mupura gwat migi nah na, a tiri mbur mitiɓi, asi ɓi mudubunakaŋ di vur Bumbulvuŋ na, a caŋ le haɗi asi vu.

¹³Pol ati cil naŋhaya, a cam palalam a Pafos, a ram nga Perge, hirwuy Pamfili. Dar Zaŋ-Marke, a pula taŋ a diga, a mi nga Zeruzalem.

¹⁴Taŋ kwana, a bam tir walahay Perge, a zuɓam jiviɗi, a ndilam a Antiyos, hirwuy Pisidi. Ngi pas sabat ada na, a cam ng'ar hay ngi diradibiɗ, a cifam jojoˀ.

¹⁵A dirba slufa Ɓimuɗuva ati ɓi ngi mijiviɗey na, mizli madiɗa ngir hay ngi diradibiɗe, a ɓam, ɓa a ɓaka taŋ: «Sukum ndrahay, da kum ada ti ɓi ngi vula gidaŋ da mizli na, ɓakaŋ.»

¹⁶Dar Pol a slikiɗ, a guvuca haŋ da mizli, a zla a ɓi: «Mizli Israyeley ati kum mizli madilkam a mbuŋ Buymisemuŋ, cinaka mingiɓi ɗu!

¹⁷Buymisemuŋ ngi ndra Israyeley, a wuna dideˀ ndraˀahaya le. A ska mizli le ti taŋ misi angi hirwuy Ezipte. A dirba nah, a bo ti taŋ ti gidaŋ ngi hirbazla naŋ.

¹⁸Gwat ngi vi kukur mufaɗ a wuzlaɓuh mikirɗak kirɗaka, ara vula taŋ gwat ngi zum.

¹⁹Yo a dirba naŋ miziza sukwi wal wal tarnaˀ angi hirwuy Kanaˀan na, a wunka taŋ hirwuy taŋ, ɓa a zumaka wãˀ.

²⁰Hana gar na, a zik gwat ngi vi skat mufaɗ ti kukur zlum. A dirba nah, a vula taŋ migi kiitahay, hã ndila hin ngi mijiviɗ Samuyel.

²¹Angi nah na, a cufuɗam ɓa a vulaka taŋ buy madiɗa. Joˀ Buymisemuŋ a vula taŋ Sawul, mangal ngi Kis, a bo ti ngi tizer ngi Benjameŋ. A zum buyo vi kukur mufaɗa.

²²A dirba Buymisemuŋ mibi di avra tir buyo na, a sa vula taŋ Davit, ɓa a cifi buyo. Buymisemuŋ a ɓi vurˀe na: ‹Davit, mangal ngi Zese, yi luuma na, i mbur ngisi mevel ɗu, masa kiɗa mi ngi ga gwat ya mawuɗ gar na, i naŋ.›

²³Buymisemuŋ mubo ti Yesu, Milaha Israyeley na, ti ngi tizer ngi Davit nah vuna, a ɓa le ɗaˀ le zleˀe.

²⁴Dumbuŋ angi so naŋ na, Zaŋ a tila mi da mizli Israyeley gar, ɓa a mbiɗaka mevel taŋ, ɓa a ca taŋ ar yam.

²⁵Yo hirak ti Zaŋ makiɗa mi ngi slra naŋ na, a ɓi: ‹Kumo, ki waka na, yi waka? Yi Mesi ta, amma mbur ada sawa a dirba ɗu, ko yi ndila ter ngi puska zeweɗ ngi tarak naŋhaya ta.›

²⁶«Sukum ɗuwoy, ko kum i ziri ngi dideˀ ndra Abraham, malla ziri ngi mizli a wuzla kum madilkam a mbuŋ Buymisemuŋ kwana, ɓi ngi laha vu misenna, Buymisemuŋ a slino di da ndra.

²⁷Mizli Zerusalemey ati buy taŋhay a sinaka Yesu ta. Taŋ migaka kiita ngi muc da Yesu na, mingiɓi ngi mijiviɗey miɓaka, taŋ maslufaka ar hin ngi sabat gar na, dambalaka a gam di i nah.

²⁸A cufuɗaka Pilata ɓa a zizaŋ wãˀ, manja a lumam ɓi midar ɓa a kiɗakaŋ vagay aseˀe vuna.

²⁹Yo a dirba taŋ migaka kaɓa ɓi mutohoko vurˀe gar na, a poko di sar tir dumo, ara kaka ar vigiɗ.

³⁰Amma Buymisemuŋ a slikiɗa le a muŋ ti wuzla mumucahaya.

³¹Dar Yesu a biga vu naŋ hin mbeˀ mbeˀ da mizli, taŋ musoko bumoˀ zle a Galile nga Zerusaleme. Wurenna taŋ i migi sedewo naŋhay a mbuŋ mizli Israyeleye.

³²«Ndra ya kwana, i tulukum mi ti Ɓimezle hana. I ɓi Buymisemuŋ miɓa ɗaˀ le da dideˀ ndrahay zleˀe.

³³Wurenna, ndra ziri taŋhaya, Buymisemuŋ a ga ndra di le wãˀ ti naŋ mislikiɗa Yesu, kaɓa mutohoko ɓi naŋ angi Dimis ngi Davit, sapitir mucuw naŋ, miɓi: ‹Ki Mangal ɗu, I yuw le nga dana na.›

³⁴Buymisemuŋ a slikiɗa Yesu le ti wuzla mumucahaya, anja ɓa a mo nga zĩˀĩ mata. A ɓa ɓi naŋ le zleˀe, a ɓi na: ‹I sa ɗuwulukum mi mipal, migisiŋ gisiŋ, ya miɓa ɗaˀ le da Davit zleˀe.›

³⁵Vurˀe, a ɓi ar li mekelem ani ma: ‹K'anta sa pula mbur ɗik mipala ɓa a zĩˀĩ ta.›

³⁶Dambalaka Davite, a dirba naŋ miga slra ngi Buymisemuŋ angi hin naŋ na, a muc le, a dikakaŋ aciki dideˀ naŋhaya, a zĩˀĩ le ngbaŋ.

³⁷Amma mbur Buymisemuŋ mislikiɗa ti wuzla mumucahay na, a zĩˀĩ ta.

³⁸Sukum ɗuwoy, sinaka sin le so, ɓi ngi puya mungra mutulukum di mi ani na, mbele naŋ. Yo gi jeŋ nah na, ko ki lumaka angi Ɓimuɗuva ngi Moyise gu ta.

³⁹Mbur mitiɓa le na, a lih le wãˀ.

⁴⁰«Jam lesl so, anja ɓi ngi mijiviɗey miɓaka ani na, a gi ar kumo ta, a ɓam na:

⁴¹‹Kum mizli mahuhumom vu kum ti gidaŋ, puraka ɗi, gam gigisl, yo anja ki zizam! Asi mike na, i sa gi gwat angi hin kum misi dana, ko da mbur a slufukum di le tekeɗe kwana, kum anta sa tiɓaka ta.›»

⁴²Pol ati Barnabasa, ti taŋ mabam le na, a tumbuloko taŋ, ɓa a sa moko pas sabat mambiɗawa ma, ɓa a sa maka taŋ hiri ngi ɓi nah vuna ava.

⁴³A dirba zigiduw muwuh na, Yudehey ati mizli micam Yude ti cihey haɗi a ki saka Pol ati Barnabasa. Ar kiɗa slir taŋ na, a vulaka taŋ gidaŋ ɓa a ndiram zlak ar gimezle ngi Buymisemuŋ.

⁴⁴Hin ngi sabat mumbuɗo ma na, vendeke ngi mizli ngir walahay gar, a kusoko ɓa a cinam mingiɓi ngi Bumbulvuŋ.

⁴⁵Yudehey mupuraka zigiduw kanah na, a jam mevel haɗi, a ɓam: «Ɓi Pol maɓa hana gar na, i slir!» Dar a zakaŋ.

⁴⁶Joˀ Pol ati Barnabas a ɓaka taŋ manja zluwun: «Anja a tilam mi ngi ɓi ngi Buymisemuŋ zleˀe dumbuŋ da kum jaka. Amma ani, ki ngumam ta, kum ti haŋ kumo, ki slaka kiita ngi hirnga kumo le, ki ndilaka ngi luuma siifa ngi sete ta. Na ndr'i mbiɗam hiri ng'avi mizli Yudehey ta na so.

⁴⁷Asi Bumbulvuŋ a ɓa ndra di le njah wãˀ kahana, a ɓi: ‹Yi cufuw ka ki li minjahha ngi sukwi ngi mizli gar, ɓa ki ru ti ɓi ngi laha vu hã ar kiɗa mi ngi hirwuy gar.›»

⁴⁸Mizli Yudehey ta micinaka mingiɓi hana na, a mumulom haɗi. A vulaka dudok da mingiɓi ngi Bumbulvuŋ. Mizli muwuna taŋ hĩˀĩ ngi luuma siifa ngi set na, a tiram mitiɓihey.

⁴⁹Mingiɓi ngi Bumbulvuŋ a tisla hirwuy vay nah gar.

⁵⁰Amma Yudehey a paka mi da ngwas midar daray madilkam a mbuŋ Buymisemuŋ waɗ da mizli madiɗa ngir walahaya, a slikiɗam ɓi, a zlaka a sipaka ti Pol ati Barnabasa nder nder, a ɓulaka taŋ ti ngi hirwuy taŋ avra.

⁵¹Ti Pol ati Barnabasa, a tukoko taŋ lagwada ngivi sar taŋhaya, a ram nga Ikoniyom.

⁵²Amma mizli ngisi taŋhaya, taŋ ti mumul haɗi, yo taŋ ndus ndus ti ˀUf Mipal.